1 ✝အယ်ဘီးန ကောန်းဂန်သစ်န မ္လေဂီးသစ်ဟှို ငါဗြင်ရဟှယ်။ ဖြားဖြစ်ကြောန့်နူးဆိုဟှာ ရင်ဟှ ကောန်းဂန်န မ္လေဂီးဟှာ ပျော့-က်ဟှားဘီး ပန်လယ်လေလည်း မှေ့ဟှမ်း။ 2 ✝အယ်ဘီးဟှာ သန့်ရှင်းဟှူ ယေရုရှလင်ဗြို့သစ်ဟှာ ဒို့သားတွပ် တန်ဆာဆင်ဟှားဟှူ ဒို့သမီးမျိုး ပြင်ဆင်ဘီး ဘုရားသခင်နားဟှ ကောန်းဂန်ဘောင်ဟှ ဆင်းလာဇာဟှို ငါဗြင်ရဟှယ်။ 3 အယ်ဘီးန ပလ္လင်ထဲဟှ ရရာတိုင်း က္လယ်ဟှူသံဟှ "ကေ့ကေ့ပါ။ ဘုရားသခင်နေဟှူ တဲတော်ဟှာ လူလေထဲမာရှိဘီး ကိုယ်တော်ဟှာ သူးနို့နတူးဒူ စံမြန်းမယ်။ သူးနို့ဟှလည်း ကိုယ်တော်ရဲ့ လူမျိုးတော်ဖြစ်ဂေ့ဘီး၊ ဘုရားသခင်ကိုယ်တိုင် သူးနို့လေနရှိဘီး သူးနို့လေရဲ့ ဘုရားသခင် ဖြစ်တော်မူမယ်။ 4 ကိုယ်တော်ဟှာ သူးနို့လေရဲ့ မျစ်စိဟှ မျစ်ရယ်ရှိမျှဟှို သုပေးလေ့မယ်။ သေရှင်းလည်း ရှိဟှို့မှုဘီ။ ဝန်းနဲကြွေကွဲဇာ၊ ငိုဇာန နာကျင်ဟှူ ဝေဒနာလေလည်း ရှိဟှို့မှုဘီ။ ဖြားဖြစ်ကြောန့်နူးဆိုဟှာ ရင်းရင်ဒူးဟှ ဖြစ်ဟှားဟှူ ဇာလေဟှာ ပျော့-က်ဟှားဘီ" ဆိုဘီး ပြောဇာဟှို ငါကြားရဟှယ်။

5 ပလ္လင်ထတ်မာ ထိုင်နေဟှူ သခင်ဟှလည်း "ကေ့ကေ့ပါ။ ငါဟှာ ဂူလောင်းဟှို သစ်ဖြစ်စေဟှယ်" ဆိုဘီး မိန့်တော်မူဘီးန အယ်စကားဟှာ သစ်စာစကား၊ မှန်ဟှူစကား ဖြစ်ဟှူကြောန့် ရေးဟှားပါ ဆိုဘီး မိန့်တော်မူလေဟှယ်။ 6 မှုပီးဘီ။ "ငါဟှာ အာလဖန ဩမေဃဖြစ်ဟှယ်။ စနဆောင်းလည်းဖြစ်ဟှယ်။ ရေငတ်ဟှူသူဟှို သတ်စမ်းရေဟှို ဖိုးယူဘဲနပေးဟှယ်။ 7 အောန်မြင်ဟှူသူဟှာ အယ်ဇာလေဟှို မွီဆစ်ခံရလေ့မယ်။ ငါဟှာ သူ့ရဲ့ ဘုရားသခင်ဖြစ်မယ်။ သူဟှလည်း ငါရဲ့ သားမီးလေ ဖြစ်လေ့မယ်။ 8 အယ်ဘေမဲ့ ကြော့-က်တတ်ဟှူသူလေ၊ ယောင်ကြည်ဘဲဟှူသူလေ၊ ရွံဇာကောန်းဟှူသူလေ၊ လူသတ်ဟှူသူလေ၊ တရားဘဲဟှူမေထုန် လောက်ဟှူသူလေ၊ ပြုစားဟှူသူလေ၊ ရောက်ထုဟှို ကိုးကွယ်ဟှူသူလေန လီညာဟှူသူ ဂူလောင်းဟှာ ကန့်နလောန်နေဟှူ မီးအိုင်ထဲဟှို ရော့-က်ရဂေ့လေ့မယ်။ အယ်ဇာဟှာ ဒုတိယ သေရှင်းဖြစ်ဟှယ်" ဆိုဘီး မိန့်တော်မူလေဟှယ်။

9 အယ်ဘီးန နော့-က်ဆောင်းဘေးဒန် ခွန်နစ်ခုနပ္လဲ့နေဟှူ ဖလားခွန်နစ်လောင်းဟှို ကိုင်ဟှားဟှူ ကောန်းဂန်တမန် ခွန်နစ်ပါးထဲဟှ တပါးဟှာလာဘီး ငါ့နစကားပြောဘီး "လာပါ။ သိုးသားဂန်းဟှားရဲ့ မီးမဖြစ်ဟှူ ဒို့သမီးဟှို ငါပြမယ် ဆိုဘီး" ငါ့ဟှို ပြောဟှယ်။ 10 အယ်ကောန်းဂန်တမန်ဟှ ရရာတိုင်း ကီးဘီး ဗြစ်ဟှူတောန်ထတ်ဟှို ဝိညာဉ်တော်အားဖြင့် ငါ့ဟှို ခေါ်ဆောန်ဟှားဘီး ဘုရားသခင်နားဟှ ကောန်းဂန်ထတ်ဟှ ဆင်းလာဟှူ သန့်ရှင်းဟှူ ယေရုရှလင်ဗြို့ဟှို ငါ့ဟှို ပြလေဟှယ်။ 11 အယ်ဗြို့ဟှာ ဘုရားသခင်ရဲ့ ဖောင်းသရေတော်န ပ္လဲ့ဇောင်ဘီး လန်းရောန်ဟှာ က္လော့-က်မြတ်ရတနာနတူဘီး က္လော့-က်သလင်းမျိုး ရရာတိုင်း လန်းနေဟှူ နဂါးသွဲ့က္လော့-က်မျိုး ဖြစ်ဟှယ်။ 12 အယ်ဗြို့မာ ရရာတိုင်း ကီးဘီး ဗြစ်ဟှူဗြို့ရိုးရှိဘီး ခွဗော့-က်ဆယ်နှေ့ပေါ့-က် ရှိဟှယ်။ ခွဗော့-က်လေမာ ကောန်းဂန်တမန် ဆယ့်နှေ့ပါးရှိဘီး အယ်ခွဗော့-က်ထတ်မာ ဣသရေလလူမျိုးလေရဲ့ မျိုးနွယ်စု ဆယ့်နှေ့နွယ်လေရဲ့ နာမယ်လေဟှို ရေးဟှားဟှယ်။ 13 ရှေ့ဖတ်မာ ခွဗော့-က်သောင်းပေါ့-က်၊ မြော့-က်ဖတ်မာ ခွဗော့-က်သောင်းပေါ့-က်၊ တောန်ဖတ်မာ ခွဗော့-က်သောင်းပေါ့-က်၊ နော့-က်ဖတ်မာ ခွဗော့-က်သောင်းပေါ့-က် ရှိဟှယ်။ 14 ဗြို့ရိုးဟှာ အုပြစ်ဆယ့်နှေ့ခုရှိဘီး အယ်ထတ်မာ သိုးသားဂန်းဟှားရဲ့ တမန်တော် ဆယ့်နှေ့ပါးလေရဲ့ နာမယ်ဆယ့်နှေ့ခုဟှို ရေးဟှားဟှယ်။ 15 ငါန စကားပြောဟှူ ကောန်းဂန်တမန်မာ အယ်ဗြို့ဟှိုရော၊ ဗြို့ရဲ့ခွဗော့-က်န ဗြို့ရိုးဟှိုရော တိုင်းဟှို့တွပ် တိုင်းဇာ ရွှေကျူလောင်းရှိဟှယ်။ 16 အယ်ဗြို့ဟှာ လေးထောန့်ပေါင်ရှိဘီး လျားနနံဟှာ တူဟှယ်။ ကောန်းဂန်တမန်ဟှာ ရွှေကျူလောင်းန ဗြို့ဟှိုတိုင်းဟှူ ခီမာ မိုင်ပေါန်း , လော့-က် ရှိဘီး လျား၊ နံ၊ ဗြစ်လေဟှာ တူဂေ့ဟှယ်။ 17 ဗြို့ရိုးဒုဟှိုလည်း တိုင်းဟှူ ခီမာ ကောန်းဂန်တမန် တိုင်းဟှူဇာရော၊ လူလေတိုင်းဟှူဇာအားဖြင့် ဗြစ်* ပေ ရှိဟှယ်။* 18 အယ်ဗြို့ရိုးဟှို နဂါးသွဲ့က္လော့-က်န ဆော့-က်ဟှားဘီး ဗြို့ဟှာ ရရာတိုင်း လန်းဟှူ ဖန်သားမျိုး ကြည်လင်ဘီး ရွှေစင်ဖြစ်ဟှယ်။ 19 ဗြို့ရိုးရဲ့ အုပြစ်ဟှို က္လော့-က်မြတ်ရတနာ ဘောန်းဇောင်န တန်ဆာဆင်ဟှားဟှယ်။ ပထမ အုပြစ်ဟှာ နဂါးသွဲ့၊ ဒုတိယ အုပြစ်ဟှာ နီလာ၊ တတိယ အုပြစ်ဟှာ မဟူရာ၊ စတုတ္ထဟှာ မြ၊ 20 ပဉ္စမ ပြစ်ဟှာ ကြောင်၊ ဆဋ္ဌမ ပြစ်ဟှာ ပတ္တမြား၊ သတ္တမ ပြစ်ဟှာ သလင်းဝါ၊ အဋ္ဌမ ပြစ်ဟှာ မျက်ရွဲ၊ နဝမ ပြစ်ဟှာ ဥဿဖရား၊ ဒသမ ပြစ်ဟှာ မဟူရာစိမ်း၊ ဧကဒသမ ပြစ်ဟှာ နီလာသွီး၊ ဒွါဒသမ ပြစ်ဟှာ နီလာခရမ်းလေ ဖြစ်ဂေ့ဟှယ်။ 21 ဗြို့ခွဗော့-က် ဆယ့်နှေ့ပေါ့-က်လေဟှာ ပုလဲဆယ့်နှေ့လောင်းဖြစ်ဂေ့ဘီး ခွဗော့-က်တဗော့-က်မာ ပုလဲတလောင်းစီန လောက်ဟှားဟှယ်။ ဗြို့ရဲ့ လမ်းမဟှာ ရရာတိုင်း စင်ကြယ်ဟှူ ဖန်သားနတူဟှူ ရွှေစင်ဖြစ်ဟှယ်။

22 အယ်ဗြို့မာ ဗိမာန်တော်ဟှို ငါတွိရဟှ။ ဖြားဖြစ်ကြောန့်နူးဆိုဟှာ အနန္တတဂိုးန ပ္လဲ့ဇောင်ဟှူ ဘုရားသခင်န သိုးသားဂန်းဟှားဟှာ အယ်ဗြို့ရဲ့ ဗိမာန်တော်ဖြစ်ဟှယ်။ 23 ဘုရားသခင်ရဲ့ ဖောင်းသရေတော်ဟှာ အယ်ဗြို့ဟှို လန်းစေဘီး သိုးသားဂန်းဟှားဟှာ အယ်ဗြို့ရဲ့ ဆီမီးဖြစ်ဟှူကြောန့် အယ်ဗြို့ဟှို လန်းစေဟှူကြောန့် နေန လလေဟှို လိုအပ်ဟှ။ 24 လူမျိုးဘောန်းဇောင်ဟှာ အယ်ဗြို့ရဲ့ လန်းရောန်ဟှို မှီပြုဘီး သွားလာဂေ့လေ့မယ်။ မ္လေဂီးမာရှိဟှူ မန်းဂီးလေဟှာ သူးနို့လေရဲ့ ဖောင်းသရေတော်ဟှို အယ်ဗြို့ထဲဟှို ယူဆောန်လာဂေ့လေ့မယ်။ 25 အယ်နေရာမာ ညဉ့်မှေ့ဘဲဟှူကြောန့် ဗြို့ခွဗော့-က်လေဟှို ဖယ်ခါလည်း ပိဟှားဟှ။ 26 လူမျိုးဘောန်းဇောင်ဟှာ ဖောင်းသရေတော်န ဂေါင်သရေလေဟှို အယ်ဗြို့ထဲဟှို ယူလာဂေ့လေ့မယ်။ 27 စင်ကြယ်ဘဲဟှူဇာ ခုလည်း အယ်ဗြို့ထဲဟှို ဝမ်ရဟှို့ မှုဟှ။ ရွံဇာကောန်းသူန လီညာသူလေလည်း ဝမ်ရဟှို့ မှုဟှ။ သိုးသားဂန်းဟှားရဲ့ သတ်စာစောန်မာ စာရင်းဝမ်ဟှူ သူလေဟှဘဲ့ ဝမ်ရဂေ့လေ့မယ်။