Apocalipse 3

သာဒိသင်းတော်တွပ် ဒန်းစကား

1 "သာဒိဗြို့မာရှိဟှူ သင်းတော်ရဲ့ စေတမန်ဟှို အယ်မျိုးရေးလိုက်ဟှယ်။

"ဘုရားသခင်ရဲ့ဝိညာဉ် ခွန်နစ်ပါးန ကြယ်ခွန်နစ်လောင်းရှိဟှူသူဟှ အယ်မျိုးမိန့်တော်မူဟှယ်။ နန့်ရဲ့ လောက်ဆောန်ရှင်းလေဟှို ငါသိဟှယ်။ နန်ဟှာ သတ်ရှင်နေဟှယ် ဆိုဘီး နာမယ်ခံဘေမဲ့ သေနေဟှူလူ ဖြစ်ဟှယ်။ 2 ဒိနစောန့်နေပါ။ သေခါနီးဖြစ်နေဘီး ကျန်နေဟှူသူလေဟှို ခိုင်ခံ့စေပါ။ ဖြားဖြစ်ကြောန်းနူးဆိုဟှာ နန့်ရဲ့ လောက်ဆောန်ရှင်းလေဟှာ ငါ့ရဲ့ ဘုရားသခင်ရှေ့မာ ပြစ်ပြောဇာရှိသေးဟှယ် ဆိုဇာ ငါဗြင်ရဟှယ်။ 3 ✝၃.၃ မ ၂၄.၄၃,၄၄; လု ၁၂.၃၉,၄၀; ဗျာ ၁၆.၁၅အယ်ကြောန့် နန်ဟှာ ဖယ်မျိုးခံယူဘီး ကြားနာရဟှူဇာလေဟှို ဒိရဘီး အယ်ဇာလေဟှို စောန့်ထီးပါ။ နောန်ဒရပါ။ နန်ဟှာ ဒိနစောန့်ဘဲနေဟှာ ခိုးလာဟှူမျိုး နန့်နားဟှို ငါလာဇာဟှို နန်ဟှာ လောင်းဝသိဟှို့ မှုဟှ။ 4 အယ်ဘေမဲ့ သာဒိဗြို့မာ ကိုယ့်ရဲ့ဝတ်ဟှို ညစ်ညူးစေဘဲဟှူသူ နဲနဲဟှား ရှိသေးဟှယ်။ အယ်လူလေဟှာ ထိုက်တန်ဟှူသူလေ ဖြစ်ဂေ့ဟှူကြောန့် ဝတ်ဖ္လူဟှိုဝတ်ဘီး ငါ့နာမနတူးဒူး သွားလာရလေ့မယ်။ 5 ✝၃.၅ က ဗျာ ၂၀.၁၂; ခ မ ၁၀.၃၂; လု ၁၂.၈အောန်မြင်ဟှူသူဟှာ အယ်မျိုးဘဲ့ ဝတ်ဖ္လူဟှို ဝတ်ရလေ့မယ်။ ငါဟှလည်း သူ့ရဲ့နာမယ်ဟှို သတ်စာစောန်မာ လောင်းဝဖျစ်ပစ်ဟှ။ ငါဟှာ သူ့ရဲ့နာမယ်ဟှို ငါ့ဖရှေ့မာရော၊ ကောန်းဂန်တမန် ရှေ့မာရော ဝန်ခံမယ်။

6 "ဝိညာဉ်တော်ဟှ သင်းတော်ဟှို မိန့်တော်မူဟှူ ဇာလေဟှို နားရှိဟှူသူလေ ကြားပါစေ။

ဖိလဒေလဖိသင်းတော်တွပ် ဒန်းစကား

7 "ဖိလဒေလဖိဗြို့မာရှိဟှူ သင်းတော်ရဲ့ စေတမန်ဟှို အယ်မျိုးရေးလိုက်ဟှယ်။

"သန့်ရှင်းဟှူသူ၊ ရရာတိုင်း မှန်ဟှူသူ၊ ဒါဝိဒ်ရဲ့သော့-က်ဟှို ကိုင်ဟှားဟှူသူ၊ ဖယ်သူလည်း ပိနိုင်ဘဲနေအောန် ဖွမ့်ဟှားဟှူသူ၊ ဖယ်သူလည်း ဖွမ့်နိုင်ဘဲနေအောန် ပိဟှားဟှူသူဟှ အယ်မျိုးမိန့်တော်မူဟှယ်။ 8 နန့်ရဲ့ လောက်ဆောန်းရှင်းလေဟှို ငါသိဟှယ်။ ကေ့ကေ့။ ဖယ်သူလည်း ပိနိုင်ဘဲဟှူ ခွဗော့-က်ဟှို နန့်ရှေ့မာ ငါဖွမ့်ဟှားဟှယ်။ ဖြားဖြစ်ကြောန့်နူးဆိုဟှာ နန်ဟှာ စွမ်းရည်နဲနဲဟှားဘဲ ရှိဘေမဲ့ ငါ့ရဲ့ စကားတော်ဟှို လိုက်နာစောန့်ထီးဘီး ငါ့ရဲ့နာမဟှိုလည်း ပယ်ဟှ။ 9 ကေ့ကေ့။ ကိုယ့်ကိုယ်ကိုယ် ယုဒလူမျိုးဖြစ်ဟှယ် ဆိုဘီး ယုဒလူမျိုးမှုဘဲန စာတန်ရဲ့ ပေါန်းသင်းဝမ်လေဖြစ်ဂေ့ဟှူ၊ လီညာဘီးပြောဂေ့ဟှူ လူလေဟှို နန့်ရဲ့ခေရင်းမာ လာဘီး ရှိခိုးစေဘီးဟှာ ငါဟှာ နန်းနို့ဟှို ရှစ်ဟှယ် ဆိုဇာဟှို သူးနို့ဟှို သိစေမယ်။ 10 နန်ဟှာ သီးခံရှင်းနဆိုင်ဟှူ ငါ့ရဲ့ စကားတော်ဟှို လိုက်နာဘီး စောန့်ထီးဟှူကြောန့် မ္လေဂီးထတ်မာ နေထိုင်ဂေ့ဟှူ သူလေဟှို စမ်းသပ်စစ်ဆေးဟှို့ ရော့-က်လာဟှူ ခီမာ ငါဟှာ နန့်ဟှို စောန့်ရှော့-က်မယ်။ 11 ငါဟှာ ဗြန်းဗြန်ဟှားလာမယ်။ နန့်ရဲ့ သရဖူဟှို ဖယ်သူလည်း လုယူဘဲဟှို့တွပ် နန့်မာရှိဟှူဇာလေဟှို စွဲကိုင်းဟှားပါ။ 12 ✝၃.၁၂ ဗျာ ၂၁.၂ငါဟှာ အောန်မြင်ဟှူသူဟှို ငါ့ရဲ့ ဘုရားသခင် ဗိမာန်တော်မာ တိုင်ဖြစ်စေမယ်။ သူဟှာ ဖယ်ခါလည်း ပ္လန်ဟှိုထွပ်ဟှားရဟှို့ မှုဘီ။ ငါဟှာ ငါ့ဘုရားသခင်ရဲ့ နာမတော်ဟှိုရော၊ ငါ့ဘုရားသခင်ရဲ့ ဗြို့တော်ဖြစ်ဟှူ ကောန်းဂန်ဘောင်ဟှနေ ဆင်းလာဘီး ယေရုရှလင်ဗြို့သစ်ရဲ့ နာမဟှိုရော၊ ငါ့ရဲ့ နာမသစ်ဟှိုရော သူ့ထတ်မာ ရေးဟှားမယ်။

13 "ဝိညာဉ်တော်ဟှ သင်းတော်ဟှို မိန့်တော်မူဟှူ ဇာလေဟှို နားရှိဟှူသူလေ ကြားပါစေ။

လောဒိကိသင်းတော်တွပ် ဒန်းစကား

14 "လောဒိကိဗြို့မာရှိဟှူ သင်းတော်ရဲ့ စေတမန်ဟှို အယ်မျိုးရေးလိုက်ဟှယ်။

"အာမင်ဖြစ်ဟှူသူ၊ သစ်စာရှိဘီး ဖြောန့်မတ်ဟှူသတ်သေ၊ ဘုရားသခင်ရဲ့ ဖန်ဆင်းဟှားဟှူထဲမာ ဦးဆောင်းဖြစ်ဟှူသူဟှ အယ်မျိုးမိန့်တော်မူဟှယ်။ 15 နန့်ရဲ့လောက်ဆောန်ရှင်းလေဟှို ငါသိဟှယ်။ နန်ဟှာ အေးလည်း မှုဟှ။ ပူလည်း မှုဟှ။ ငါဟှာ နန့်ဟှို အေးဆိုဟှာအေး၊ ပူဆိုဟှာပူ တခုခုဟှိုဘဲ ဖြစ်စေရှင်ဟှယ်။ 16 နန်ဟှာ ပူလည်းမှုဘဲန၊ အေးလည်းမှုဘဲန၊ မပူမအေး ဖြစ်နေဟှူကြောန့် နန့်ဟှို ငါ့ဇပ်ပေါ့-က်ထဲဟှ ထွီးထုမယ်။ 17 နန်ဟှ ‘ငါဟှာ ရရာတိုင်း ကြွယ်ဝဟှူကြောန့် ဖြားဇာလည်း လိုဟှ ဆိုဘီး’ ပြောနေဟှယ်။ အယ်ဘေမဲ့ နန်ဟှာ ရရာတိုင်း စိပြစ်ဇာကောန်းဟှူသူ၊ နားဇာကောန်းဟှူသူ၊ ဆင်းရဲဟှူသူ၊ မျစ်စိကန်းနေဟှူသူန ခ္လေးပ္လန်းဗ္လန်း ဖြစ်နေဟှယ် ဆိုဇာဟှို နန်သိဟှ။ 18 နန်ဟှာ ကြွယ်ဝဟှို့တွပ် မီးနသန့်စင်ဟှားဟှူ ရွှေဟှိုရော၊ နန်ဟှာ ခ္လေးပ္လန်းဗ္လန်း ဖြစ်နေဘီး ယှစ်လေပေါ်ဘဲနေအောန် နန့်ဝတ်ဟှို့ ဖ္လူဟှူ ဝတ်ရောင်ဟှိုရော၊ နန့်ရဲ့ မျစ်စိ ပ္လန်ဘီးဗြင်လာဟှို့တွပ် မျစ်စဉ်ခတ်ဟှို့ ဆေးဟှိုရော၊ ငါ့နားမာ ဝယ်ဟှို့တွပ် နန့်ဟှို ငါဟှာ ကြံပေးရှင်ဟှယ်။ 19 ✝၃.၁၉ ဟေ ၁၂.၆ငါဟှာ ငါရှစ်ဟှူသူ မှန်မျှရဲ့ ပြစ်လေဟှို ဖော်ပြဘီးဟှာ ဆောင်းမတတ်ဟှယ်။ အယ်ကြောန့် ကိုယ့်စိကိုယ် နှိုးဆော်ဘီး နောန်ဒရပါ။ 20 နားထောန်ဂေ့။ ငါဟှာ ခွဗော့-က်ရှေ့မာ ရပ်ဘီး ခေါ့-က်ဘီးနေဟှယ်။ ဖယ်သူမဆို ငါ့ရဲ့သံဟှို ကြားဘီး ခွဗော့-က်ခွမ့်မယ် ဆိုဟှာ အယ်လူရှိဟှူ နေရာဟှို ဝမ်ဘီး သူ့နတူးဒူ စာစားမယ်။ သူဟှလည်း ငါ့နတူးဒူ စားသော့-က်ရလေ့မယ်။ 21 ငါဟှာ အောန်မြင်ဘီး ငါ့ဖနတူးဒူ ပလ္လင်ထတ်မာ ထိုင်ရမျိုးဘဲ အောန်မြင်ဟှူ သူဟှာ ငါ့ရဲ့ ပလ္လင်ထတ်မာ ငါ့နတူးဒူ ထိုင်ရဟှို့ ခွမ့်ဟှို ငါပေးမယ်။

22 "ဝိညာဉ်တော်ဟှ သင်းတော်ဟှို မိန့်တော်မူဟှူ ဇာလေဟှို နားရှိဟှူသူလေ ကြားပါစေ" ဆိုဘီး မိန့်တော်မူလေဟှယ်။