Apocalipse 4

ကောန်းဂန်ဘောင်းဟှ ပလ္လင်တော်

1 အယ်ဘီးန ငါကေ့လိုက်ဟှူ ခီမာ ကောန်းဂန်မာဖွမ့်ဟှားဟှူ ခွဗော့-က်တဗော့-က်ရှိဟှယ်။

အယ်ခီမာ ပထမဆောင်း ငါ့ဟှို မိန့်တော်မူဇာဟှို ကြားရဟှူ၊ တံပိုးခရာသံမျိုးဖြစ်ဟှူ သံဟှ "အယ်နေရာဟှို တတ်လာလိုက်။ အယ်ဖြစ်ပျစ်လေရဲ့ နော့-က်မာ ဖြစ်ရဟှို့ဇာလေဟှို နန့်ဟှို ငါပြမယ်။" ဆိုဘီး ပြောဟှယ်။ 2 အယ်ခီမာ ရှစ်ရှင်းဘဲ ဝိညာဉ်တော်ဟှာ ငါ့ထတ်ဟှို ရော့-က်လာလေဟှယ်။ ကောန်းဂန်ဘောင်မာ ပလ္လင်တခုရှိဟှယ်။ ပလ္လင်ထတ်မာထိုင်နေဟှူသူ တပါးရှိဟှယ်။ 3 ထိုင်နေဟှူသူဟှာ နဂါးသွဲ့န ပတ္တမြားက္လော့-က်နီမျိုး ရောန်ရှိဘီး ပလ္လင်ပတ်ပတ်လည်မာ မြမျိုးဆင်းရောန်ရှိဟှူ သက်တံ့ရှိဟှယ်။ 4 ပလ္လင်ရဲ့ ပတ်ပတ်လည်မာ တခြားပလ္လင် နှေ့ဆယ်လေးခုရှိဘီး အယ်ပလ္လင်လေထတ်မာ ဖ္လူဟှူဝတ်ရောင်ဟှို ဝတ်ဟှားဘီး ခေါန်းထတ်မာ ရွှေသရဖူဟှို ဆောန်းဟှားဟှူ သတ်ကီးဝါဂီး နှေ့ဆယ့်လေးပါးဟှာ ထိုင်နေဂေ့ဟှယ်။ 5 ✝၄.၅ က ဗျာ ၈.၅; ခ ဗျာ ၁.၄ပလ္လင်ထဲဟှ လန့်စစ်ဖ္လတ်ရှင်း၊ မိုးချောင်းသံလေ၊ မိုးကြိုးသံလေ ထွပ်လာဟှယ်။ ဘုရားသခင်ရဲ့ ဝိညာဉ်ခွန်နစ်ပါးဖြစ်ဟှူ မီးခွပ်ခွန်နစ်လောင်းဟှာ ပလ္လင်ရှေ့မာ တော့-က်လောန်ဘီး ရှိနေဟှယ်။ 6 အယ်ဘီးဟှာ ပလ္လင်ရှေ့မာ က္လော့-က်သလင်းနတူဟှူ ဖန်ရေကန်မျိုးရှိဟှယ်။ ပလ္လင်ရဲ့လယ်နရော၊ ပတ်ပတ်လည်မာရော၊ ရှေ့ဖတ်န နော့-က်ဖတ်လေမာရော မျစ်စိလေနပ္လဲ့နေဟှူ သတ္တဝါလေးပါးရှိဟှယ်။

7 ပထမ သတ္တဝါဟှာ ခြင်္သေ့နတူဘီး ဒုတိယ သတ္တဝါဟှာ နွားသားဂန်းနတူဟှယ်။ တတိယ သတ္တဝါဟှာ လူနတူဟှူ မျစ်နှာရှိဘီး စတုတ္ထ သတ္တဝါဟှာ ပ္လန်နေဟှူ လင်းယောင်နတူဟှယ်။ 8 အယ်သတ္တဝါ လေးပါးလောင်းဟှာ တောန်ပံခြော့-က်ခုစိရှိဘီး ပတ်ပတ်လည်န ထဲဖတ်မာ မျစ်စိလေန ပ္လဲ့ဘီးရှိနေဟှယ်။ သူးနို့ဟှာ နေ့ရောညဉ့်ရော နားဘဲန

"ထာဝရ ဘုရားသခင်ဟှာ

သန့်ရှင်းတော်မူဟှယ်။ သန့်ရှင်းတော်မူဟှယ်။ သန့်ရှင်းတော်မူဟှယ်။

ကိုယ်တော်ဟှာ ခုရှိဘီး ရင်ဟှလဲရှိဟှူ နော့-က်တခီမာ ကြွလာဟှို့ အနန္တတဂိုးနပ္လဲ့ဇောင်ဟှူ သခင်ဖြစ်ဟှယ်" ဆိုဘီး

ပြောဆိုဂေ့ဟှယ်။

9 အယ်မျိုး ပလ္လင်ထတ်မာထိုင်ဘီး ကမ္ဘာဆစ်ဆစ်သတ်ရှင်ဟှူ သခင်ရဲ့ ဖောင်းသရေတော်၊ ဂေါင်တော်န ကျေးဇူးတော်လေဟှို သတ္တဝါလေးပါးဟှာ ချီးမွမ်းဂေ့ဟှူ ခီမာ 10 သတ်ကီးဟှူသူ နှေ့ဆယ့်လေးပါးဟှာ ပလ္လင်ထတ်မာထိုင်ဟှူ သခင်ရဲ့ရှေ့မာ ပျပ်ဝပ်ဘီးဟှာ ကမ္ဘာဆစ်ဆစ်သတ်ရှင်ဟှူ သခင်ဟှို ကိုးကွယ်ဘီးဟှာ သူးနို့လေရဲ့ သရဖူလေဟှို ပလ္လင်ရှေ့မာ ခ္လဟှားဘီးဟှာ၊

11 "ကျွန်တော့်ဟှားလေရဲ့သခင် ဘုရားသခင်ဟှာ

ကိုယ်တော်ဟှာ ရှိမျှဂူလောင်းဟှို ဖန်ဆင်းဟှူကြောန့်

ကိုယ်တော်ရဲ့ လိုတော်ကြောန့်ဘဲ့ ရှိမျှဂူလောင်းဟှာ သတ်ရှင်ရဂေ့ဟှယ်။

အယ်ကြောန့် ကိုယ်တော်ဟှာ ဖောင်းသရေတော်၊ ဂေါင်တော်၊ တဂိုးတော်လေဟှို ခံထိုက်ဟှယ်" ဆိုဘီး

ပြောဆိုဂေ့ဟှယ်။