Apocalipse 6

စာစောန်ထဲဟှ တဇိလေကြောန်း

1 သိုးသားဂန်းဟှားဟှာ တဇိခွန်နစ်ချစ်မာ ပထမတချစ်ဟှို ဖွမ့်ဟှူ ခီမာ ငါကေ့လိုက်ဟှူ ခီမာ မိုးကြိုးသံနတူဟှူ သံမျိုးန သတ္တဝါလေးပါးထဲမာ တပါးဟှ "လာဂေ့" ဆိုဘီး ပြောဇာဟှို ငါကြားရဟှယ်။ 2 အယ်ခီမာ ငါကေ့လိုက်ဟှူ ခီမာ ဗြင်းဖ္လူတကောန်ဟှို တွိရဟှယ်။ ဗြင်းစီဟှူသူဟှာ လေးဟှို ကိုင်ဟှားဟှယ်။ သူ့ဟှို သရဖူဟှို ပေးဟှယ်။ သူဟှာ အောန်ဗွဲခံဘီးဟှူသူ နေန အောန်ဗွဲခံဟှို့တွပ် ထွပ်ဟှားဟှယ်။

3 သိုးသားဂန်းဟှားဟှာ ဒုတိယတဇိဟှို ဖွမ့်လိုက်ဟှူ ခီမာ ဒုတိယသတ္တဝါဟှ "လာဂေ့" ဆိုဘီး ပြောဇာဟှို ငါကြားဟှယ်။ 4 အယ်ခီမာ ဗြင်းနီတကောန်ဟှာ ထွပ်လာဘီး စီးဟှူသူဟှာ လူလေဟှို ရှင်းရှင်းသတ်ဂေ့ဟှို့တွပ် မ္လေဂီးထတ်မာ ငြီဝပ်ရှင်းဟှို ရောက်သီးဟှူ ခွမ့်ဟှိုရဟှယ်။ ရရာတိုင်း ကီးဟှူ ထားတလတ်ဟှိုလည်း သူ့ဟှို ပေးလေဟှယ်။

5 သိုးသားဂန်းဟှားဟှာ တတိယတဇိဟှို ဖွမ့်လိုက်ဟှူ ခီမာ တတိယသတ္တဝါဟှ "လာဂေ့" ဆိုဘီး ပြောဇာဟှို ငါကြားရဟှယ်။ ငါဟှာ ကေ့လိုက်ဟှူ ခီမာ ဗြင်းမဲတကောန်ဟှို တွိရဟှယ်။ အယ်ဗြင်းထတ်မာ စီးနေဟှူသူဟှာ သူ့ရဲ့လတ်မာ ခီခွမ်ဟှို ကိုင်ဟှားဟှယ်။ 6 အယ်ဘီးန သတ္တဝါလေးပါးလယ်ဟှ ထွပ်လာဟှူ စကားသံနတူဟှူ သံဟှ "ဂျောင်ဆန်တခွပ် ဆိုဟှာ ဒေနာရိတပြား၊ မုယောဆန်သောင်းခွပ် ဆိုဟှာ ဒေနာရိတပြားဖြစ်ဟှယ်။ ဆီန စဗျစ်ဝိုင်ဟှို ပျစ်စီးစေန" ဆိုဇာဟှို ငါကြားရဟှယ်။

7 သိုးသားဂန်းဟှားဟှာ စတုတ္တတဇိဟှို ဖွမ့်လိုက်ဟှူ ခီမာ စတုတ္တသတ္တဝါဟှ "လာဂေ့" ဆိုဘီး ပြောဇာဟှို ငါကြားရဟှယ်။ 8 ငါကေ့လိုက်ဟှူ ခီမာ ဗြင်းမွဲတကောန်ဟှို တွိရဟှယ်။ အယ်ဗြင်းထတ်မာ စီးနေဟှူသူဟှာ သေမန်း ဆိုဘီး နာမယ်ဖြစ်ဟှယ်။ သူ့ရဲ့နော့-က်မာ မရဏာနိုင်ငံ*၆.၈ မရဏာနိုင်ငံ၊ လူသေလေရဲ့ ကမ္ဘာ (ရှု ၁.၁၈)။ဟှာ လိုက်လာဟှယ်။ သူးနို့ဟှာ ထားဘေးနရော၊ ငတ်မွတ်ခေါန်ပါးဟှူ ဘေးနရော၊ သေဘေးနရော၊ မ္လေဂီးထတ်မာရှိဟှူ သားရဲလိဆန်ဘေးနရော လူလေဟှို သတ်ဟှို့တွပ် မ္လေဂီးရဲ့ လေးပေါင်တပေါင် ခွမ့်အာဏာဟှို ရဂေ့ဟှယ်။

9 သိုးသားဂန်းဟှားဟှာ ပဉ္စမတဇိဟှို ဖွမ့်လိုက်ဟှူ ခီမာ ဘုရားသခင်ရဲ့ စကားတော်နရော၊ သစ်စာရှိဟှူ သတ်သေခံချစ်နရော၊ သေသတ်ခံရဟှူ သူလေရဲ့ ဝိညာဉ်လေဟှို ယဇ်ပလ္လင်အော့-က်မာ ငါဗြင်ရဟှယ်။ 10 အယ်လူလေဟှာ "သန့်ရှင်း ဖြောန့်မတ်မှန်ကန်ဘီး စိုးပိုင်တော်မူဟှူ သခင်၊ ကျွန်တော့်လေရဲ့ သွီးတွပ် မ္လေဂီးထတ်မာ နေဂေ့ဟှူလူလေဟှို တရားစီရင်ဘဲန၊ ကလဲ့စားချေဘဲန ဖယ်မျှထိကြာအောန် နေဟှို့နူး" ဆိုဘီး သံက္လယ်ဂီးန အော်ပြောဂေ့ဟှယ်။ 11 အယ်ခီမာ သူးနို့လေဟှို ဝတ်လောင်ဖ္လူဟှို ပေးဘီးဟှာ သူးနို့မျိုးဘဲ့ သေသတ်ခံရဟှို့ မှုဆောန်ဟှူ ညီကို မောန်နှမလေ ရေတွပ်တိုင်း ပ္လဲ့ဇောင်ဟှို့ခီထိ ရှစ်ဟှားနားယူဂေ့ဟှို့တွပ် သူးနို့လေဟှို မိန့်တော်မူဟှယ်။

12 ✝ ၆.၁၂ က ဗျာ ၁၁.၁၃; ၁၆.၁၈; ခ မ ၂၄.၂၉; မာ ၁၃.၂၄,၂၅; လု ၂၁.၂၅ သိုးသားဂန်းဟှားဟှာ ဆဋ္ဌမ တဇိဟှို ဖွမ့်လိုက်ဟှူ ခီမာ ငလျင်ဟှာ ပြင်းပြင်ထန်းထန်ဟှား လှောက်ဟှူကြောန့် နေဟှာ ဘဲ့မွီးန လောက်ဟှားဟှူ ဝတ်ကြမ်းမျိုး မဲဟှားဘီး လဟှလည်း သွီးမျိုး ဖြစ်ဟှားဟှယ်။ 13 ကောန်းဂန်ဟှ ကြယ်လေဟှာ ရရာတိုင်း ပြင်းဟှူလေ လှောက်ဟှူ ခီမာ သဖန်းဗန်ဟှ သီးစီးလေဟှ ကွီက္လမျိုးဘဲ့ မ္လေဂီးထတ်ဟှို က္လဂေ့ဟှယ်။ 14 ✝၆.၁၄ ဗျာ ၁၆.၂၀ကောန်းဂန်ဟှလည်း စာစောန်ဟှို လိလိုက်ဟှူမျိုး ပျော့-က်ဟှားဘီး တောန်န ကျွန်းရှိမျှဟှာ သူးနို့နေရာဟှနေဘီး ဝိဟှားဂေ့ဟှယ်။ 15 အယ်ခီမာ မ္လေဂီးမာရှိဟှူ မန်းဂီးလေ၊ အာဏာပိုင်လေ၊ စစ်ဗိုလ်ချူပ်လေ၊ ဌေးလေ၊ ခွန်အားကီးဟှူ သူလေန ကျွန်န လွတ်လတ်ဟှူ သူလေ ရှိမျှဟှာ လှိုင်ဂူလေမာရော၊ တောန်လေထတ်မာ က္လော့-က်ဆောန် ကြားလေမာရော ပူးနေဘီးဟှာ 16 ✝၆.၁၆ လု ၂၃.၃၀တောန်လေန က္လော့-က်ဆောန်လေဟှို "နို့လေထတ်ဟှို ပြိုက္လဘီးဟှာ ပလ္လင်ထတ်မာ ထိုင်ဟှူ သခင်ရဲ့ မျစ်နှာတော်န သိုးသားဂန်းဟှားရဲ့ မျစ်ဒေါသဟှနေဘီး နို့လေဟှို ဖောင်းဘီးကွယ်ဂေ့ပါ။ 17 ဖြားဖြစ်ကြောန့်နူးဆိုဟှာ အယ်သခင်လေရဲ့ မျစ်ဒေါသ ထန်ရှားဟှူ နေ့ရစ်ဂီးဟှာ က္လလာဘီး ဖြစ်ဟှူကြောန့် ဖယ်သူဟှ ခံနိုင်ဟှို့နူး" ဆိုဘီး ပြောဂေ့ဟှယ်။