1 ✝ ၁၅.၁ လု ၅.၂၉,၃၀ တနေ့မာ ခွန်ကော့-က်မားလေန ပြစ်သားလေဟှာ တရားစကားဟှို နားထောန်ဟှို့တွပ် ယေရှုနားဟှို ရော့-က်လာဟှူ ခီမာ 2 ဖာရိရှဲလေန ကျမ်းတတ်ဆရာလေဟှ "အယ်လူဟှာ ပြစ်သားလေဟှို လတ်ခံဘီးဟှာ သူးနို့နတူးဒူလည်း စားသော့-က်ဂေ့ဟှယ်!" ဆိုဘီး ပြစ်တန်ဂေ့ဟှယ်။ 3 အယ်ကြောန့် ယေရှုဟှ အယ်ပေါင်ဥပမာန

4 "နန်းနို့ထဲဟှ တယော့-က်မာ သိုးကောန်တရာရှိဘီး တကောန်ပျော့-က်ဟှားမယ် ဆိုဟှာ ဖယ်မျိုးလောက်ဂေ့မယ်နူး။ သိုးကိုးဆယ်ကိုးကောန်ဟှို စားကျစ်မာ ထားရစ်ဘီးဟှာ ပျော့-က်နေဟှူ သိုးတကောန်ဟှို တွိအောန်လိုက်ရှာဂေ့လေ့မယ်။ 5 အယ်သိုးဟှို ပ္လန်တွိဟှူ ခီမာ ရရာတိုင်း ဝန်းသာဘီးဟှာ ခေါင်းထတ်မာ 6 ထမ်းဘီး အီဟှို ပ္လန်ဟှားဟှယ်။ အယ်ဘီးန အီဇနီးရှင်းလေန မိဆွေလေဟှို ခေါ်ဘီးဟှာ ‘ပျော့-က်နေဟှူ သိုးဟှို ငါပ္လန်တွိဟှားဘီ။ နို့လေ ပွဲလောက်ဂေ့ဇို့!’ ဆိုဘီး ပြောလေ့မယ်။ 7 အယ်မျိုးဘဲ့ နောန်ဒရဘဲဟှူ ဖြောန့်မတ်သူ ကိုးဆယ်ကိုးယော့-က်ထတ် နောန်ဒရဟှူ ပြစ်သားတယော့-က်တွပ် ကောန်းဂန်ဘောင်မာ ပိုဘီး ဝန်းသာလေ့မယ် ဆိုဘီး နန်းနို့ဟှို ငါပြောဟှယ်။"

8 "အယ်မျိုးဘဲ့ မီးမတယော့-က်မာ ငွေဒန်းဂါး ဆယ်ပ္လားရှိဘီး ငွေဒန်းဂါး တပ္လားပျော့-က်ဟှားမယ် ဆိုဟှာ အယ်မီးမ ဖြားဇာလောက်မယ်နူး။ သူဟှာ မီးအီထွန်းဘီး၊ ရှင်းလန်းဘီးဟှာ တွိအောန် သေးသေချားချာ ရှာလေ့မယ်။ 9 အယ်ငွေဒန်းဂါးဟှို တွိဟှူ ခီမာ သူဟှာ အီဇနီးရှင်းလေန မိဆွေလေဟှို ခေါ်ဘီး ‘ပျော့-က်ဟှားဟှူ ဒန်းဂါးဟှို ငါပ္လန်တွိဘီ။ နို့လေ ပွဲလောက်ဂေ့ဇို့!’ ဆိုဘီး ပြောလေ့မယ်။ 10 အယ်မျိုးဘဲ့ ဘုရားသခင်ရဲ့ ကောန်းဂန်တမန်လေဟှာလည်း နောန်ဒရဟှူ ပြစ်သားတယော့-က်တွပ် ရရာတိုင်း ဝန်းသာလေ့မယ် ဆိုဇာဟှို နန်းနို့ဟှို ငါပြောဟှယ်" ဆိုဘီး မိန့်တော်မူလေဟှယ်။

11 ယေရှုဟှာ ဆစ်ဘီး "လူတယော့-က်မာ သားနှေ့ယော့-က် ရှိဟှယ်။ 12 သားငယ်ဟှ ဖဟှို ‘ဖ၊ နို့ရဲ့ မွီလေဟှို ပေးပါ’ ဆိုဘီး တောန်းလေဟှယ်။ အယ်ကြောန့် ဖဟှ သူ့ရဲ့ မွီအောက်စာလေဟှို သားနှေ့ယော့-က်ဟှို ခွဲဝီပေးလိုက်ဟှယ်။ 13 ရစ်နဲနဲကြာဘီးန သားငယ်ဟှာ သူ့ရဲ့ မွီအောက်စာလေဟှို ရောန်းခ္လဘီး ကပ်ထုန အီထတ်ဟှနေ ဆင်းဟှားဟှယ်။ သူဟှာ ဟှိုးဝီးဂီးမာရှိနေဟှူ တိုင်းပြည်ဟှို သွားဘီး အယ်နေရာမာ ဗရမ်းဗဒါသတ်ရှင်ဘီးဟှာ သူ့ကပ်လေဟှို ဖြုန်းစားပစ်လေဟှယ်။ 14 သူ့ရဲ့ ကပ်လေ ဂူလောင်းဟှို သောင်းဖြုန်းပစ်ဘီးဟှူ ခီမာ အယ်တိုင်းပြည် နှံ့ပ္လားမာ ဆိုးဝါးဟှူ ငတ်မွတ်ရှင်းဘေး က္လရော့-က်လာဟှူကြောန့် သူဟှာ ငတ်ပြတ်လေဟှယ်။ 15 အယ်ကြောန့် အယ်တိုင်းပြည်ရဲ့ ပြည်သားလေထဲဟှ တယော့-က်နားဟှို လောက်လောက်ဟှို့ သွားလေဟှယ်။ အယ်ပြည်သားဟှ သူ့ရဲ့လဲဗ္လန်ထဲဟှို စေလွှတ်လိုက်ဘီး ဝပ်လေဟှို ထီးခိုင်းလေဟှယ်။ 16 သူဟှာ ဝပ်လေစားနေဟှူ ပဲတောန့်လေဟှို စားရှင်ဟှူစိ ဖြစ်လာလေဟှယ်။ အယ်ဘေမဲ့ ဖယ်သူလည်း သူ့ဟှို စားဇာကျွေးဟှို့သူ မှေ့ဟှ။ 17 နော့-က်ဆောင်းမာ သူဟှာ သိတရား ဝမ်လာဘီး ‘ငါ့ဖရဲ့ လောက်သမားလေ ဂူလောင်းဟှာ ဗိုက်ဝအောန် စားနေရဂေ့ဟှယ်။ ငါဟှ အယ်မာ ငတ်ပြတ်နေဟှယ်! 18 ငါ့ဖနားဟှို သွားဘီး "ဖ၊ နို့ဟှာ ကောန်းဂန်ဟှိုရော၊ နို့ဖဟှိုရော ပြစ်မှားမိဘီ။ 19 နို့ဟှို သား ဆိုဘီး ခေါ်ဟှို့ထိုက်ဟှ။ နို့ဖရဲ့ လောက်သမား တယော့-က်မျိုးဘဲ့ ပြုမှုပါ" ဆိုဘီး ပြောမယ်’ ဆိုဘီး ကြံစည်ရှိလေဟှယ်။ 20 အယ်ကြောန့် သူဟှာ ထဘီး ဖနားဟှို ပ္လန်ဟှားဟှယ်။

"သူဟှာ ဟှိုးဝီးမာရှိနေဒူးမာ သူ့ရဲ့ဖဟှ သားဟှို ဗြင်လိုက်ဟှူ ခီမာ သနားစိ ဖြစ်လာဟှူကြောန့် ပ္လေးလာဘီး၊ သူ့ဟှို ပိုက်ဘီး နမ်းလေဟှယ်။ 21 သားဟှာ ‘ဖ၊ နို့ဟှာ ကောန်းဂန်ဟှိုရော၊ နို့ဖဟှိုရော ပြစ်မှားမိဘီ။ နို့ဟှို သား ဆိုဘီး ခေါ်ဟှို့ထိုက်ဟှ’ ဆိုဘီး ပြောလေဟှယ်။ 22 အယ်ဘေမဲ့ ဖဟှ စေခံလေဟှို ခေါ်လိုက်ဘီး ‘ဗြန်းဗြန်လောက်! ကောန်းဆောင်း ဝတ်လောင်ရှယ်ဟှို ယူလာဘီးဟှာ သူ့ဟှို ဝတ်ပေးဂေ့။ သူ့လတ်မာ လတ်စွပ်ဟှို စွပ်ပေးဘီး သူ့ရဲ့ခေမာ ခေနပ်ဟှို စီးပေးဂေ့။ 23 အယ်ဘီးဟှာ ကောန်းဆောင်း နွားသားဂန်းဟှို သွားဘီးဟှာ သတ်ဂေ့။ နို့လေ စားသော့-က်ဗွဲဂီးဟှို လောက်ဂေ့ဇို့! 24 ဖြားဖြစ်ကြောန့်နူးဆိုဟှာ ငါ့သားဟှာ ရင်းရင်ဒူးဟှ သေဟှားဘေမဲ့ ခုပ္လန်ရှင်ဟှားဘီ။ ရင်းရင်ဒူးဟှ ပျော့-က်ဟှားဘေမဲ့ ခုပ္လန်တွိဟှားဘီ’ ဆိုဘီး ပြောလေဟှယ်။ အယ်ဘီးန စားသော့-က်ဗွဲဂီးဟှို စပြုဂေ့လေဟှယ်။"

25 "အယ်ခီမာဘဲ့ သားဂီးဟှာ လဲဗ္လန်ဟှနေ အီဟှို ပ္လန်လာလေဟှယ်။ အီနားဟှို ရော့-က်လာဟှူ ခီမာ တီးမှုသံလေ၊ ကခူသံလေဟှို ကြားရဟှယ်။ 26 အယ်ကြောန့် စေခံတယော့-က်ဟှို ခေါ်ဘီး ‘ဖြားဇာလေ ဖြစ်နေဂေ့နူး။’ ဆိုဘီး မေးလေဟှယ်။ 27 စေခံဟှ ‘သင့်ရဲ့ညီဟှာ ဘေးတွိဘဲ့န ပ္လန်ရော့-က်လာဟှူကြောန့် သင့်ရဲ့ဖဟှ ကောန်းဆောင်း နွားသားဂန်းဟှို သတ်ဘီးဟှာ စားသော့-က်ဗွဲဂီး လောက်ပေးနေဟှယ်’ ဆိုဘီး ပ္လန်ပြောလေဟှယ်။ 28 သားဂီးဟှာ ရရာတိုင်း မျစ်ဘီးဟှာ အီထဲဟှို ဝမ်ဘဲန နေလေဟှယ်။ အယ်ကြောန့် သူ့ဖဟှာ ပ္လန်ဟှို ထွပ်လာဘီးဟှာ သူ့ဟှို ဖျောန်းဖျလေဟှယ်။ 29 အယ်ဘေမဲ့ သူဟှာ ဖဟှို ‘နို့ဟှာ နှစ်လေဘောင်ဂီး ကျွန်တယော့-က်မျိုး နို့ဖတွပ် လောက်လောက်ပေးဟှယ်။ နို့ဖရဲ့ မိန့်ဟှိုလည်း မြဲဒမ်း နားထောန်ဟှယ်။ အယ်ဘေမဲ့ နို့ဖဟှာ နို့ဟှို ဖြားဇာပေးဖူးနူး။ နို့ငယ်ဂျင်းလေနတူးဒူ စားသော့-က်ဗွဲလောက်ဟှို့တွပ် ဘဲ့တကောန်ဟှိုမျှ ပေးဖူးဟှ! 30 အယ်ဘေမဲ့ နို့ဖရဲ့ အောက်စာ ပစ်စီးလေဟှို မီးမပျစ်လေန ပျော်ပါးဖ္လူးစားပစ်ဘီး ပ္လန်လာဟှူ အယ်သားတွပ် ဆိုဘီး ကောန်းဆောင်း နွားသားဂန်းဟှို သတ်ဘီးကျွေးဟှယ်!’ ဆိုဘီး ပ္လန်ပြောလေဟှယ်။ 31 ဖဟှ ‘ငါ့သား၊ သားဟှ ဖနတူးဒူ မြဲဒမ်းနေဟှယ်။ ဖရဲ့ အောက်စာပစ်စီး ဂူလောင်းဟှာလည်း သားရဲ့ အောက်စာပစ်စီးလေ ဖြစ်ဟှယ်။ 32 အယ်ဘေမဲ့ သားရဲ့ ညီဟှာ ရင်းရင်ဒူးဟှ သေဟှားဘေမဲ့ ခုပ္လန်သတ်ရှင်ဟှားဘီ။ ရင်းရင်ဒူးဟှ ပျော့-က်ဟှားဘေမဲ့ ခုပ္လန်တွိဟှားဘီ။ အယ်ကြောန့် နို့လေဟှာ ဝန်းသာဘီး ပွဲလောက်နေဟှယ်’ ဆိုဘီး ပ္လန်ပြောလေဟှယ်" ဆိုဘီး မိန့်တော်မူလေဟှယ်။