1 यूहन्नाई खेरे येसुई लै चेलाव दोङ्म जाःपा ङ्याह् रे बप्‌तिस्मा यङ बिम्म जाःपा ङ्याह् र्‌वानान फरिसीवजै ताह्बो। 2 (तेम्माग येसु जेँजै ता नङ्पा, जेङ्नै नुन चेलावजै बप्‌तिस्मा बिङ्‌ङ।) 3 जब येसुई अन ताह्बो, तब नु यहूदिया ख्योवाख्योवा ह्‌याङ गालीलग होल्बो। 4 नू सामरियान लमलै राह्‌राह्‌ वैत्वाङ।

5 रे नु सामरियान सुखार र्‌वानान सहरग स्वा ताप्पो। अन सहर चन याकूबजै जेँन ङोह्जो योसेफग बिम्पा सान रह्‌म्मै परि राँ।✝ 6 स्याह्‌ याकूबन इनार ङ्याह्। येसु लेनलेन गोप्पा राह्‌राह्‌ अन इनारन नाः छ्युङपाई ङ्याह्। अन्तौ क्वाईमाल्‌ला: ङिजे रह्पा ङ्याह्।

7 ती सामरियान चिमिचा त्यु काङ्मः स्याह्‌ स्वाबो। येसुई नू र्‌वाबो, "ङाः त्यु थुङ फाना।" 8 नुन चेलाव सहरग झायाप र्‌युप्मः वैपा ङ्याह्।

9 तब सामरी चिमिचाई नू र्‌वाबो, "ना यहूदी राह्‌राह्‌ ङा सामरी चिमिचान ल्हालै कुजुई त्यु थुङ्नान?" (यहूदीवजै सामरीवन ङ्याबो सङै मखेँ)✝ 10 येसुई नू र्‌वाबो, "नाई परमेस्वरन वर रे नान ङ्याबो त्यु तोल्नान सिमि स्योपा राङिन नाई नू तोल्नान ङ्याह्, रे नुई ना सम्पु त्यु बिन्नान ङ्याह्।" 11 मन चिमिचाई नू र्‌वाबो, "गुरु, नान ङ्याबो त्यु छ्यूनान्न धाङ मीपाऊ, रे इनार यङ तिङ ङ्याह्। तब नाई खालै अन सम्पु त्यु सन्नान? 12 तै ङेन ङिन खेपुल याकूबन खेरे किम जेङ्पौ? नुई ङी अन इनार दोङ्बो, रे नु जेँजै, नुन सन्तान रे नुन भस्तई अन इनारन त्यु थुङ्बो।"

13 येसुई नू झब बिम्बो, "अन त्यु थुङ्नान पुरू ह्‌याङ त्यु बुल्नान ङ्याह्, 14 जेङ्नै सुवा-सुवाजै ङै बिन्नान त्यु थुङ्नान अन हातौयै त्यु बुल्नान मह्‌या। कन त्यु ङा नू बिन्नान ङ्युँ, अन नुग मताह्‌नान्न जिन्दगीन भिह्तु थाङ्पाई छ्युङ्नान त्युन फु राह्‌नान ङ्याह्!"

15 मन चिमिचाई नू र्‌वाबो, "गुरु, ङा अनै त्यु भिना, रे ङा त्यु बुल्नान मह्‌या, रे स्यीह् त्यु दर्मः स्वापास्वात्वा खेमत्वानान"। 16 येसुई नू र्‌वाबो, "वया, नान पसा घ्वाघ्वा स्यीह् सह्‌रा।" 17 मन चिमिचाई र्‌वाबो, "ङन पसा मीपा।" येसुई नू र्‌वाबो, "नान पसा मीपा र्‌वार्‌वा नाई तेम्मा र्‌वापा, 18 तैङर्‌वाङिन नान पसा ङापा रातपा ङ्याह्, रे सु चोँ नान ङ्याबो ङिह्पा, अन नान पसा नङ्पा। नाई अन तेम्मा र्‌वापा जेङ्पा।"

19 मन चिमिचाई नू र्‌वाबो, "गुरु, ना भबिस्यबक्ता जेङ्पा र्‌वार्‌वा ङाः क्युई ङिह्पा। 20 ङ्योअन खेपुलवजै अन धुरग परमेस्वरन आराधना खेबो, आलै ङेन येहूदीव र्‌वाङ, कि आराधना खेपु यरूसलेम जेङ्पा।"✝

21 येसुई नू र्‌वाबो, "ए चिमिचा, ङाः बिस्वास ख्या, मन्न भेला स्वा जाःपा ङ्याह्, जब ङेन न ता अन धुरग, न यरूसलेमग पान आराधना खेनान ङ्याह्। 22 ङेन सामरीव तै आराधना खेँ अन मराँ। ङ्योअजै तै आराधना खेनान अन राह्‌नान, तैङर्‌वाङिन मुक्ति चन यहूदीवलम स्वाङ।✝ 23 जेङ्नै भेला स्वायङ ङ्याह्, रे मन भेला चोँई जेङ्पा, जब तेम्मा पुजारीवजै पाः आत्मा रे तेम्माग आराधना खेनान ङ्याह्। तैङर्‌वाङिन आराधना खेनान झामै आराधककाङ्मोः र्‌वार्‌वा पाई फाङ्‌ङ। 24 परमेस्वर आत्मा जेङ्पा, रे नुन आराधकवजै आत्मा रे तेम्माग आराधना खेत्वानान।" 25 मन चिमिचाई नू र्‌वाबो, "ङाः क्युई ङिह्पा, कि मसीह स्वानान (सू मसिह र्‌वाङ), रे जब नु स्वानान, तब नुई यङ ङ्योअग ल्होई पुरू स्यान्नान ङ्याह्।" 26 येसुई नू र्‌वाबो, "नान ङ्याबो ल्होई र्‌वानान, ङा नुई जेङ्पा।" 27 अन्नै भेला नुन चेलाव स्वाबो, रे नू चिमिचादीन ङ्याबो ल्होई र्‌वायङ खेपा रङरङ हालाईबो, जेङ्नै "ना तै सम खेनान?" आथबा "ङेन अन चिमिचान ङ्याबो तैङ ल्होई र्‌वायङ ङिह्पा?" र्‌वार्‌वा सुई मलोप्पो।

28 तब अन चिमिचा जेँन गाःरि ख्योवाख्योवा सहरक्याँ होई, रे सिमिकाङ्मोः र्‌वामः जाःबो, 29 "स्वा, तीपा सिमी सेह्‌ना, सुई ङै खेपा धोन पुरू ङा स्याप्पो। कार्तौ नुई मसिह ता नङ्मतौ?" 30 तब ख्यु सहरलै गेग्गे येसुन स्याह्‌ होई। 31 अन्नै भेला घूँ चेलावजै नू झाःम र्‌वार्‌वा छ्याःफुल्बो, "रब्बी, तयाः झा।" 32 जेङ्नै नुई ख्युकाङ्मोः र्‌वाबो, "ङन ङ्याबो झाचेन भिह्तु ङ्योप्पा ङिह्पा, कन ङेनकाङ्मोः क्युई मह्‌या।" 33 अन्नकारन चेलावजै राह्ङराङ्साः र्‌वाबो, "हँ सुई नू झायाप सत्त कि तै जेअँ?"

34 येसुई ख्युकाङ्मोः र्‌वाबो, "ङा फेन्नान्न इच्छ्या अन्सार खेचे, रे नुन धोन पुरा खेचेई ङन ङ्योप्पा जेङ्पा। 35 तै ङेन मर्‌वानौ, ‘हेँ लाह् ली लामा ङिह्पा, तब बालि गम्चेन भेला स्वाङ?’ ङा ङेनकाङ्मोः र्‌वाचे, जेँन बारी सेह्‌ना, बालि गम्चेन भिह्तु मिनतपा ङ्याह्। 36 सुई बालि गम्ङ नुई ज्याला देङ्‌ङ, रे मताह्‌नान्न जिन्दगीन भिह्तु फल रूङ, रे र्‌यु पन्नान रे बालि गम्नान ङ्याबो स्याँ। 37 तैङर्‌वाङिन ‘तीपाई र्‌यु पह्ङ्‌ङ, रे घङजै बालि गम्ङ,’ र्‌वानान्न बचन अनगै तेम्मा राँ।✝ 38 ङै ङेनकाङ्मोः स्याह्‌ बालि गम्मः फेप्पा, खाः ङेनजै तूरि खेपा मह्‌या। घङवजै तूरि खेपा ङिह्पा, रे ख्युन तूरि खेपान फल ङेनजै देप्पा ङिह्पा।"

39 "ङै तै खेपा नुई ङाः पुरू र्‌वाबो" र्‌वानान मन चिमिचान साँचिजै खेखे मन सहरन सामरीवन बर्ग लैजे नुन लाह्ः बिस्वास खेबो। 40 अन्नकारन जब सामरीव नुन स्याह् स्वाबो, तब ख्युई नू ख्युन ङ्याबो छ्योवा र्‌वार्‌वा छ्याःफुल्बो, रे नु ङेर्या स्याह् छ्युङ्बो।

41 आलै येसुन बचन्न कारन घङ लैजे नुन लाह्ः बिस्वास खेबो। 42 मन चिमिचाः ख्युई र्‌वाबो, "ता नाई र्‌वापान ल्होईजै खेखे ङ्योअजै बिस्वास खेपा नङ्पा। जेङ्नै ङ्योअ जेँजै ताह्पान कारनजै तेम्माई नु सन्सारन मुक्तिदाता जेङ्पा र्‌वार्‌वा ङ्योअग क्युई रह्पा।"

43 ङितौन ङिक स्याह्‌लै गेग्गे येसु गालीलग होई। 44 (येसु जेँजै साँचि बिम्बो, कि जेँन देस अलःग भबिस्यबक्ता सुई सम्मान मराँ।)✝ 45 जब नु गालीलग स्वाबो, तब नुई यरूसलेमग निस्तार तेवरन भेलाः तै खेपा ङ्याह् अन धोन पुरू रङ्पा राह्‌राह्‌ गालीलन सिमिवजै नू स्वागत खेबो, तैङर्‌वाङिन ख्यु यङ तेवरग वैपा ङ्याह्।✝

46 अन्न ङिक येसु ह्‌याङ गालीलन काना सहरग स्वाबो। खाः नुई त्यू अङ्‌गुरन खु दोङ्पा ङ्याह्। कफर्नहुमग ङोत्वा आङ खेनान्न सिमिदी ङ्याह्, नुन ङोह्जो खँ।✝ 47 येसु यहूदियालै गालीलग स्वापा ङ्याह् र्‌वानान ताह्ताह् ङोत्वा आङ खेनान्न सिमि नुन स्याह्‌ होई, आलै नुन ङोह्जो स्वास्वा सिम धोवाँ र्‌वार्‌वा नू छ्याःफुल्बो, तैङर्‌वाङिन नुन ङोह्जो सिम जाःपा ङ्याह्। 48 येसुई नू र्‌वाबो, "ङेन ताईलुवान धोन रे हालाईचेन धोनव मरङ्न बेर तै खेखेई बिस्वास मखेँ।"✝ 49 मन ङोत्वा आङ खेनान्न सिमिजै नू र्‌वाबो, "गुरु, ङन ङोह्जो सिचेन खेरे ङूई स्वायो।" 50 येसुई नू र्‌वाबो, "वया, नान ङोह्जो सम्पु ङ्याह्।" येसुई नू र्‌वापान बचन मन सिमिजै बिस्वास खेबो, रे जेँन लमग होई। 51 आलै नु वैतौवैतौ लमगै नुन राङ्पावजै नू दोदो नुन ङोह्जो सोम्बो र्‌वार्‌वा नू स्याप्पो।

52 हातौन भेलालै नू ताःमः जाःबो र्‌वार्‌वा नुई ख्युकाङ्मोः लोत्तौ ख्युई र्‌वाबो, "थ्याँ ङिजे एक बजेलै छायोई नू फेप्पो।" 53 येसुई नू "नान ङोह्जो सोन्नान ङ्याह्" र्‌वापान भेलालै जेअँ र्‌वार्‌वा पाः क्युई रह्बो। आलै नुँह्‌जै रे नुन यिमन पयार पुरूजै बिस्वास खेबो। 54 यहूदियालै गालीलग स्वास्वा येसुई खेपा अन ङेरेपन ताईलुवान धोन ङ्याह्।