Mateus 17

येसुन खरि फिप्पा

1 मन्न रूर्यान ङिक येसुई पत्रुस, याकूब रे नुन भाई युहन्नाः जेँन ङ्याबो धुर थोमदीन लाह्ः वप्पो। 2 ख्युन ङू नुन खरि फिप्पो। नुन ध्वा ङिह्‌मा लैम चम्कि रह्बो रे नुन घोलाङ बत्ति लैम पाह्ल्म रह्बो। 3 आलै हरक्‌क मोसा रे एलिया रङ्बो रे येसुन ङ्याबो ल्होई र्‌वामः जाःबो। 4 पत्रुसजै येसू र्‌वाबो, "हे प्रभु, ङि स्यीह् ङिह्पा मिह्दा लः रह्दँ। नान इच्छ्या राङिन ङा स्यीह् सुम थाम आति दोङ्नान ङ्युँ, ती नान भिह्तु, ती मोसान भिह्तु रे ती एलियान भिह्तु।" 5 पत्रुसजै ल्होई र्‌वातौर्‌वातौ चहकिलो नमलू स्वास्वा नुन तिप्सोई ख्युकाङ्मोः कप्पो आलै नमलून झिङलै केह्दी स्वाबो, "अन ङन स्याङ्पान ङोह्जो जेङ्पा, अन्न ङ्याबो ङा मिह्दा किम्म ङिह्पा, अन्न ल्होई ङ्याना।"✝17:5 उत २२:२; कानुन १८:१५; भजन २:७; यसै ४२:१; मत्ती ३:१७; १२:१८; मर्क १:११; लुक ३:२२ 6 जब चेलावजै अन ताह्बो, तब ख्यु मिह्दा ङिनङिन साः खल्बु क्याप्पो। 7 जेङ्नै येसुई स्वास्वा ख्युकाङ्मोः ज्यारज्यार र्‌वाबो, "च्याँ, नङिना।" 8 जब ख्युई तो सेन्तौ येसु नङ्म घङ सुई मरङ्बो। 9 जब ख्यु धुरलै धुल्यङ खेपा ङ्याह्, येसुई ख्युकाङ्मोः आग्या खेबो, "जब थाल सिमिन ङोह्जो सिह्पालै सम्पु राह्‌राह्‌ मच्याँ, तबथाल ङेनजै अन दर्सन्न ल्होई सुई नर्‌वा।" 10 आलै चेलावजै नू झाःम र्‌वार्‌वा लोप्पो, "तब तैङ कानुन लन्नान्न सिमिवजै पहिली एलिया स्वात्वानान र्‌वार्‌वा र्‌वाङ?"✝17:10 मला ४:५ 11 येसुई ख्युकाङ्मोः र्‌वाबो, "एलिया तेम्माई स्वानान, रे नुई ल्होई पुरू ह्‌याङ दोङ्लाई खेनान ङ्याह्।" 12 जेङ्नै ङा ङेनकाङ्मोः र्‌वाचे, "एलिया लैःलै स्वापा ङ्याह्, आलै सिमिवजै नू मस्योःबो, जेङ्नै नू ख्युई जेँन स्याङ खेबो। उजुखेखेई सिमिन ङोह्जोई र्‌वार्‌वा ख्युन ल्हालै तूरि कुत्वानान ङ्याह्।"✝17:12 मत्ती ११:१४ 13 तब नुई बप्‌तिस्मा बिन्नान्न यूहन्नान भारेः ख्युकाङ्मोः र्‌वापा जेङ्पा र्‌वार्‌वा चेलावजै हाकोबो।

मुई सेम्पा चोलोङ्चा

14 येसु चेलावन ङ्याबो सिमिन मोङ रह्पू होलहोल स्वातौ सिमिदीजै नुन ल्हेग खल्बु क्यापक्याप र्‌वाबो, 15 "प्रभु, ङन ङोह्जोः दया ख्या! नाम्क्यान्न ताह्पान कारनजै नुई मिह्दा तूरि देप्पाई ङ्याह्। नु घरीघरी बेहोस राँ रे मेह् या त्यू घ्याँ। 16 ङै नू नान चेलावन स्याह् सप्पा, जेङ्नै ख्युई ताःफान मतैबो।" 17 येसुई र्‌वाबो, "ए ङाईदी बिस्वास ङिह्पा रे भ्रमग परि रह्पान पुस्ता, हातौन बेर ङा ङेनकोन ङ्याबो लुईनान ङ्युँ? हातिर्यान बेर ङै ङेनकाङ्मोः कूचे? नू स्यीह् सह्रा।" 18 आलै येसुई मन मू ङार्ङार धाम्बो रे मन चोलोङ्चा तुरुन्तै ताःबो। 19 ङिक चेलावजै येसू फाक लोप्पो, "ङी चन मन मू तैङ छ्यू मतैपा?" 20 येसुई र्‌वाबो, "ङेनकोन अबिस्वासन कारनजै जेङ्पा। तेम्माई ङा ङेनकाङ्मोः र्‌वाचे, ङेनकोन ङ्याबो छून र्‌युदीतौन बिस्वास ङिङिन अन धुरग स्यीह्‌लै वया र्‌वाङिन वैनान ङ्याह् रे ङेनकोन भिह्तु खे मतैनान तये राह्‌नान मह्‌या।✝17:20 मत्ती २१:२१; मर्क ११:२३; १ कोर १३:२ 21 जेङ्नै झामन मु चन सोअताप रे बर्त मछ्युङ्मी मगेन्नान।"

जेँ सिह्‌नान्न भारेः येसुई ह्‌याङ र्‌वापा

22 चेलावन ङ्याबोई गालील छेत्रग रातौ येसुई ख्युकाङ्मोः र्‌वाबो, "ता सिमिन ङोह्जोः जुङजुङ सिमिवन लाह्ग थोन्नान ङ्याह्। 23 ख्युई नू सन्नान ङ्याह्। जेङ्नै सुमङीग नु ह्‌याङ सिह्पालै सम्पु ग्युर्नान ङ्याह्।" अन ताह्ताह् चेलाकाङ्मोः बैराः जाःबो।

कर फाःम येसुन छोए

24 येसु रे नुन चेलाव कफर्नहुमग स्वा ताप्मी आराधनालयन कर तुईनानवजै स्वास्वा पत्रुसग लोप्पो, "तै ङेनकोन गुरुई आराधनालयन कर फाःनौ?" 25 पत्रुसजै झब बिम्बो, "फाःनान।" आलै नु यिमन झिङ जाःमी येसुई ल्होई छ्यूबो, "ए सिमोन, नान सोच तै ङिह्पा? अन सन्सारन झलीवजै सुलम कर तुईनान? जेँनै ङोह्जोवलम तुईनान कि घङवलम?" 26 "घङव लमै तुईनान," पत्रुसजै झब बिम्बो। येसुई र्‌वाबो, "आन ङोह्जो अलःवजै कर फाःमत्वानान। 27 जेङ्नै ङि अन सिमिकाङ्मोः ठेस मबिम्मता। ना वया रे योह्ग जाल फ्याँ। पुरून खेरे ङू जालग थेप्पान ङाह् छ्यूछ्यू नुन ङुर पोवा। नुन ङुरग नाई मुलन सिक्‌कादी दोःनान ङ्याह्। मन चन आराधनालयन कर तुईनानवन स्याह् वव्वै ङीमन कर फाःमता।"