1 हेरोद झलीन पाली यहूदिया प्रदेसन बेथलेहेम सहरग जब येसु केह्बो, स्यारन देसलै जोतिसिव यरूसलेमग स्वा ताप्पो। 2 आलै ख्युई लोप्पो, "यहूदियान झली राह्‌राह्‌ केह्‌नान्न सिमि खाः ङ्याह्? तैङर्‌वाङिन ङी नुन घर स्यारग रङ्पा रे नू ध्वाः खेमः स्वापा ङिह्पा।"✝

3 जब हेरोद झलीजै अन ताह्बो, नु उदास रह्बो, रे नुन ङ्याबो सोलोः यरूसलेम यङ उदास रह्बो। 4 आलै नुई ङोत्वा पुजारी पुरूव रे जनताः कानुन लन्नान्न सिमिकाङ्मोः रूबो, रे "मसिह खाः केह्‌नान जेम?" र्‌वार्‌वा लोच्‌चे खेबो। 5 ख्युई झब बिम्बो, "यहूदियान बेथलेहेम सहरग। तैङर्‌वाङिन भबिस्यबक्ताई अन्न भारेः सर्पा ङ्याह्: 6 ‘ए बेथलेहेम, यहूदिया मुलुकन सहरव, ना तै खेखेई यहूदान सासकवन घूँ सुई खेरै फान मत्वानान मह्‌या, तैङर्‌वाङिन नान स्याह्‌लै सासकदी गेग्गे स्वानान ङ्याह्, सुई ङन सिमि, इस्राएलग सेन्चे खेनान ङ्याह्’।" 7 तब हेरोदजै मन स्यारन जोतिसिकाङ्मोः तै मर्‌वारे स्वा र्‌वार्‌वा घर ठिक्‌क कन्न भेला रङ्पा जेङ्पा, र्‌वानान्न ल्होई ख्युनलम क्युई रह्बो। 8 नुई ख्युकाङ्मोः झाःम र्‌वार्‌वा बेथलेहेम सहरग फेप्पो, "वया, रे लः खेखे मन वैचाः फारा। नू धोमी ङाः ताह्फेरा, रे ङा रे नू ध्वाः खेनान ङ्युँ।" 9 तब झलीन ल्होई ताह्ताह् ख्यु जेँन लमग होई। कन घर ख्युई स्यारग रङ्पा ङ्याह्, मन घर ख्युन ङूह्ङूह् होई, रे वैचा रह्पू ताप्मी मन घर स्याह्ई खल्बो। 10 ख्युई मन घर रङरङ यामयाम स्याङ्बो।✝ 11 आलै यिमन झिङ जाःजाः ख्युई वैचाः नुन मा मरियमन ङ्याबो रङ्बो, रे खल्बू क्यापक्याप नू ध्वाः खेबो। तब जेँन बकाःस पोङपोङ नू मर, रिह् स्यामन प्वे रे मूर्रन भेति फुल्बो। 12 आलै हेरोदन स्याह् होलहोल नवया र्‌वानान मङग चेतावनी देद्‌दे ख्यु घङै लम राह्‌राह्‌ जेँन देसग होल्बो।

13 मन जोतिसिव वैमी, परमप्रभुन दुतदी मङग योसेफन स्याह् रङ्बो रे नुई झाम र्‌वाबो, "च्याँ, कत्याम वैचा रे नुन माः ङ्याबो वव्वै मिस्र देसग वया, रे नाः ङै मर्‌वान बेर स्याह्ई छ्योवा। तैङर्‌वाङिन, हेरोदजै वैचाः सच्‌चे र्‌वार्‌वा नू फाच्‌चे खेमः जाःपा ङ्याह्।" 14 आलै नु च्याङच्याङ वैचा कत्याम रे नुन माः ङ्याबो वव्वै मिस्र देसग मनै छानजे होई, 15 रे हेरोद मह्‌सिन बेर स्याह्ई छ्युङ्बो। भबिस्यबक्तालम परमप्रभुई र्‌वापान बचन झामखेखे पुरा रह्बो, "ङै जेँन ङोह्जोः मिस्र देसलै स्वा र्‌वापा।"✝

16 तब जोतिसिवजै नू छकाई पप्पान ल्होई हेरोदग क्युई रह्पा, रे नुई मिह्दा सेह्ताङ खेबो। आलै जोतिसिवलम क्युई रह्पान भेला अन्सार बेथलेहेम रे मन छेत्रन झिङन ङेह् परा रे मनलै ज्योम्मु पुरू वैचाकाङ्मोः सत्फाम्बो। 17 तब यर्मिया भबिस्यबक्ताजै र्‌वापान बचन पुरा रह्बो, 18 "रामाग छिदी ताह्बो, केह्ः छ्यूछ्यू दापा रे तूँलाक्या राह्‌राह्‌ दाःपान केह्ः किम, राहेल जेँन वैचावन भिह्तु दापाई छ्युपा, सान्तोना नुई अस्वीकार खेबो, तैङर्‌वाङिन नुन वैचाव ता मलुईबो।"✝

19 हेरोद सिमी परमप्रभुन स्वर्गदुतजै मिस्र देसग योसेफन स्याह् मङ मङ्बो। 20 रे झाम र्‌वाबो, "च्याँ, वैचा रे नुन माः ङ्याबो वव्वै इस्राएल देसग वया, तैङर्‌वाङिन वैचाः सच्‌चे फान्नानव सितपा ङ्याह्।"✝

21 योसेफ च्याङच्याङ वैचा रे नुन माः ङ्याबो वव्वै इस्राएल देसग होल्बो। 22 जेङ्नै यहूदियाग जेँन पा हेरोदन ठाउँग अर्खिलाउसजै राज्य खेपा ङ्याह् र्‌वानान्न ल्होई ताह्ताह् नु स्याह् वैचे ङिह्‌म्बो, रे मङग चेतावनी देद्‌दे नु गालीलन प्रदेसग होई। 23 नु वैवै नासरत र्‌वानान्न सहरग छ्युङ्बो। झामखेखे भबिस्यबक्तावलम र्‌वापान बचन पुरा रह्बो, "नू नासरी र्‌वानान ङ्याह्।"✝