Mateus 20

अङ्‌गुर भारी धोन खेनान सिमिवन द्रिस्तान्त

1 येसुई र्‌वाईर्‌वाई होई, "स्वर्गन राज्य अङ्‌गुर भारिन रेम्पान द्रिस्तान्तन रुह्ङलैम ङ्याह्। नापपर्मै मन रेम्पा जेँन अङ्‌गुर भारी धोन खेनान्न खेः धोन खेनान्न सिमिकाङ्मोः फाम्म गेप्पो 2 आलै दिन्न ज्याला मुलन सिक्‌कादी बिन्चे, र्‌वार्‌वा कान खेः धोन खेनान्न सिमिकाङ्मोः अङ्‌गुरन भारी धोनग फेप्पो।" 3 ङिजेन नौ बजेराः ह्‌याङ नुई कान सिमिकाङ्मोः धोन मर्हारे भाछ्योवा चोकग च्याङ्च्याङ छ्युङ्पा रङ्बो। 4 रे नुई ख्युकाङ्मोः र्‌वाबो, "ङेनको रे अङ्‌गुरन भारी वया, रे तै लः ङ्याह् ङा ङेनकाङ्मोः बिन्नान ङ्युँ।" 5 ख्यु धोनग होई। मन्न छाम्म नुई ङिजे बाह्र बजेराः रे ह्‌याङ तीन बजेराः यङ उजुई खेखे घङ सिमिकाङ्मोः धोनग फेप्पो। 6 ह्‌याङ पाँच बजेराः वैतौ यङ नुई कान सिमी धोन मर्हारे भाछ्योँवा बजारग थाङथाङ छ्युङ्‌पाई रङ्बो। नुई ख्युकाङ्मोः र्‌वाबो, "ङेन स्यीह् तैङ ङिह्‌म पुरू धोन मीम थाङथाङ छ्युङ्पा ङिह्पा?" 7 ख्युई झब बिम्बो, "ङी सुई धोन मबिम्बो।" तब नुई र्‌वाबो, "उजु जेङ्न ङेन रे ङन अङ्‌गुरन भारी धोन खेमः वया।" 8 "ङ्याजे रामी अङ्‌गुरन भारिन ताःपोई जेँन धोन खेनानवन ठेकदारग र्‌वाबो, ‘खेः धोन खेनान्न सिमिकाङ्मोः स्वा र्‌वार्‌वा ख्युई धोन खेपान ज्याला भिना। ज्याला पुरून खेरे ङिक स्वानानवलम सुरु खेखे अन्त्यग पुरून खेरे ङू स्वानानकाङ्मोः भिना।’ 9 आलै ठेकदारजै पाँच बजेराः धोन सुरु खेनानकाङ्मोः पहिली स्वा र्‌वार्‌वा पुरूग मुलन सिक्‌का ती ती ज्याला बिम्बो। 10 मन्तौ पुरून खेरे ङू धोनग जाःनानवजै चन लैः देत्तरा र्‌वार्‌वा नावा खेबो। जेङ्नै ख्युई र्‌वार्‌वा मुलन सिक्‌का ती ती मात्र देप्पो। 11 आलै ज्याला देप्मी ख्युई जेँ-जेँन ज्याला वप्पो रे बारीन ताःपोन स्याह् वैवै गनगन खेमः जाःबो। 12 ख्युई र्‌वाबो, ‘सेह्‌ना, अन ङिक स्वानान्न सिमिवजै ता घन्तादी मात्र धोन खेबो, ङी ता ङिह्‌म पुरू छाप्पाः धोन खेपा। जेङ्नै नाई ता ख्युकाङ्मोः र्‌वार्‌वा ङिन झोरै ज्याला बिम्बो!’ 13 जेङ्नै ताःपोई ख्युन बर्ग तीपाः झब भिनैभिनै र्‌वाबो, ‘सेह्‌ना ग्याप्पा, ङै नाः अन्याय खेपा मीपा। ना ता मुलन सिक्‌कादीग ङिह्‌म्पुरू धोन खेमः मन्जुर रह्पा नङ्पा तै? 14 ना जेँन देत्त्वानान्न ज्याला वव्वै यिम वया। ङा अन धोनग ङिक स्वानान्न सिमी र्‌वार्‌वा नान झोरै बिनसुम खेनान। 15 तै ङाः जेँन सोह्ङ जेँजै बिन्सुम रह्पाकाङ्मोः बिन्चेन आङ मीपा तै? ङन उदारताग ना तैङ थादोवा खेनान?’" 16 ल्होई चाराईचाराई येसुई र्‌वाबो, "झामखेखेई ङीस्योवा ङूस्योवा राह्‌नान ङ्याह् रे ङूस्योवा चन ङीस्योवा राह्‌नान ङ्याह्।"✝20:16 मत्ती १९:३०; मर्क १०:३१; लुक १३:३०