1 Mloli, vila Tati katupala nesu hata tungukemwa wana wa Sapanga! Na kiuchakaka twenga ni wana wa Sapanga, ndiwa kwaikiva wandu weni kumyitikila ng'ogha Sapanga ungutumanya ng'ogha twenga, kwaikiva ungummanya ng'ogha Sapanga. 2 Wapalwa wa nenga, hinaa twenga ni wana wa Sapanga, Sapanga kambila kutulangiha vila tutewela lipindi lila litehika. ila tungumanya yiwa Kilisito paatehika kangi, tutelandana na mweni kangi tutemlola handa kawela. 3 Kila mmonga mweni litumaini hali ku Kilisito, na ayendeleli kulighulula ili aweli kaghululika handa Kilisito.

4 Kila mundu mweni kughola sambi kanguyitikila ng'ogha laghilo lya Sapanga kwaikiva kughola sambi ni kuleka kuyitikila laghilo lya Sapanga. 5 Mwenga mngumanya yiwa Kilisito ahikile ili ahumisi sambi, na yiwa mweni kahela sambi. 6 Hinu, kila mundu mweni kulikala kwa kukongana na Kilisito kanguyendelela ng'ogha kughola sambi, ila yula mweni kuyendelela kughola sambi hayu kangumanya ng'ogha kangi kangummanya ng'ogha Kilisito yiwa kaghani.

7 Hinaa wana ghangu, mkotoho kujumila kungongwa na mundu yeyosi. Mundu yeyosi mwenikughola matendu yeni kujumilika na Sapanga, hayu angujumilwa na Sapanga handa vila Kilisito angujumilika na Sapanga. 8 Mundu yula mweni kughola sambi, hayu anguhuma kwa Lihyukana, kwaikiva mweni agholile sambi haku mtumbulo. Ila Mwana wa Sapanga ahikile kumlimawogha kuyalamisa mahengu gha Lihyukana.

9 Kila mwenikuwela mwana wa Sapanga kangughola ng'ogha sambi, kwaikiva hayu kana ndyangilu hyonu apeghilwi na Sapanga mghati ghaki, kangughola ng'ogha sambi kwaikiva ndyangilu gha Sapanga iwela mghati ghaki. 10 Mundu yeyosi mweni kughola ng'ogha mighalu yenikumhekelesa Sapanga, na kumpala ng'ogha mlongo ghako hayu kang'ogha mwana wa Sapanga na kwa nagha ndiwa wanguwesa kumanyikana ghani mwana wa Sapanga na ghani mwana wa Lihyukana.

11 Ujumbi muuhyoghanila kuhuma mtumbulo ndiwa hau, yiwa kila mundu ampali myaki! 12 Mkotoho kuwela handa Kaini mweni kulongoswa na Lihyukana amkomi Abeli, mlongo ghaki. Kwa kyani amkomili? Amkomili kwaikiva matendu ghaki Kaini yawelile mahakata ila matendu gha mlongo ghaki yawelile yakijumilwa na Sapanga.

13 Hinu walongu ghangu, mkotoho kulikangasa handa wandu wa kumlimawogha wanguwahyomela mwenga. 14 Twenga tumanya yiwa tupita kala kuhuma makakala gha kihu na kuyingila kuukomu, kwaikiva tunguwapala wakwinila wayetu. Mundu mweni kuwapala ng'ogha waghangi , angulikala kukihu. 15 Kila mundu mweni kumhyomela mlongo ghaki hayu kamkoma wandu, na mwenga mngumanya yiwa mundu yeyosi mweni kukoma kahela ukomu mghati ghaki. 16 Kwa ndambu hai tunguwesa kumanya upalo, Yesu Kilisito ahovili kwaikiva gha twenga, kangi na twenga tungupalwa tuhumisi kulama kwa twenga kwaikiva gha wakwinila wayetu. 17 Hinu paikwela mundu kawela na vindu vitangala haku kumlimawogha, na akamlola mlongo ghaki kana lung'ai, mweni akawela na moyu ukamala akotoho kumuwonela myaki luhungu, hayu kanguwesa ghuli kulonga yiwa kangu mpala Sapanga? 18 Wana ghangu, tukotoho kupalana kwa milando weka ila tupalane kwa matendu na kwa kugholelana maha.

19 Kwa ndambu hai ndiwa tutewesa kuwela na uhighilisu yiwa twenga ni wandu wa uchakaka, na tutewela ng'ogha na holu kumioyu gha twenga kuulongolo gha Sapanga. 20 Mioyu gha twenga paitutosa, tunguwela na kuponga kumioyu gha twenga kwaikiva tungumanya Sapanga ni mkulu kupiti mioyu gha twenga, na yiwa mweni angumanya kila kindu. 21 Wapalwa wa nenga, handa patuwela ng'ogha na sambi, ndiwa tunguwesa ng'ogha kuwela na holu kuulongolo gha Sapanga patungumluwa Sapanga, 22 na kupokela kwa mweni chochosi tungukiyupa, kwaikiva tunguyitikila malaghilo ghaki na kughola ghala anguyapala. 23 Laghilo lyaki ndiwa hali, yiwa tumkwinila mwana ghaki Yesu Kilisito, na kupalana handa vila atulaghilile. 24 Mundu mweni kuyitikila malaghilo gha Sapanga kanguyendelela kulikala pamonga na Sapanga. Na Sapanga angulikala kuumonga na twenga Kupitila Mpumulo wa Sapanga yula atupeghili, tungumanya yiwa Sapanga anguyendelela kulikala pamonga na twenga.