1 Waghanja ghangu, mkotoho kumjumila kila mundu mweni kulonga yiwa kangulongoswa na Mpumulo wa Sapanga, ila mlolesi kwa utali handa mundu hayu kangulongoswa na Mpumulo wa Sapanga au ng'ogha, kwaikiva walota watangala wa uhwangi wawela kumlimawogha hau. 2 Hai ndiwa njila gha kumanya yiwa mundu angulongoswa na Mpumulo wa Sapanga, kila mundu mweni kujumila yiwa Yesu Kilisito ahikile kumlimawogha, akawela mundu, Mundu hayu kana Mpumulo wa Sapanga. 3 Ila mundu yeyosi mweni kumjumila ng'ogha nagha, hayu kahela Mpumulo mweni kuhuma kwa Sapanga. Mundu hayu kana yula mpumulo mwenikuwela mngingama Kilisito, na mwenga mhyoghanila kala yiwa mngingama Kilisito anguhika, na hinaa kahika kala kumlimawogha.

4 Ila mwenga wana, mhuma kwa Sapanga na muwasinda kala hagha walota wa uhwangi. Kwaikiva Mpumulo mweni kuwela mghati gha mwenga kana makakala kupiti hayu mpumulo mweni kuwalongosa wandu weni kumkwinila ng'ogha Sapanga. 5 Walota hagha wa uhwangi wangulongela milando gha kumlimawogha, na wandu wa kumlimawogha wanguwahyoghanila kwaikiva ni wandu wa mlima wogha. 6 Ila twenga ni wana wa Sapanga. Mundu mweni kuwela wa Sapanga angutuhyoghanila, mundu mweni kuhuma ng'ogha kwa Sapanga kangutuhyoghanila ng'ogha. Hinu, kwa njila hai tunguwesa kumanya mlekanu paghati gha Mpumulo wa uchakaka na mpumulo wa uhwangi.

7 Wapalwa ghangu, kila mundu na ampali myaki, kwaikiva upalo unguhuma kwa Sapanga. Kila mundu mwenikuwela na upalo ni mwana wa Sapanga, na mweni angummanya Sapanga. 8 Mundu yula mweni kuwapala ng'ogha waghangi, hayu kangummanya ng'ogha Sapanga, kwaikiva Sapanga anguwapala wandu. 9 Sapanga mweni atulangilile upalo ghaki kwa twenga kwa kumyegha Mwana ghaki wa weka kumlimawogha, ili tupati ukomu kupitila mweni. 10 Haku ndiwa kupala kwa chakaka, ng'ogha yiwa twenga tutumbula kumpala Sapanga, bali mweni ndiwa atupalile hata kumyegha Mwana ghaki aweli litambiku lya kutuhumisila sambi.

11 Waghanja ghangu, handa Sapanga atupalili twenga nagha, ingutupala na twenga tupalani. 12 Katu kwahela mundu mweni kumlola kala, ila handa patungupalana, Sapanga angulikala kuumonga na twenga, na upalo ghaki ungutughola tuwapali waghangi handa mweni vila angutupala twenga.

13 Havi ndiwa tunguwesa kumanya yiwa tungulama kuumonga na Sapanga na mweni angulama kuumonga na twenga kwaikiva katupatila Mpumulo ghaki. 14 Twenga tulola na tuwatangasila waghangi yiwa Tati amyeghili Mwana ghaki aweli Mlokola wa wandu kumlimawogha. 15 Kila mundu mweni kulonga na kujumila yiwa Yesu ni Mwana wa Sapanga, Sapanga anguyendelela kuwela na umonga na mundu hayu, na mweni angulikala kuumonga na Sapanga. 16 Hinu twenga tungumanya na tungukwinila yiwa,

Sapanga angupala wandu, na kila mundu mwenikulikala kwa kuwapala waghangi, angulikala kwa kukongana na Sapanga, na Sapanga angulikala kwa kukongana na mweni. 17 Kwa njila hai, Sapanga angutimilisa upalo ghaki mghati gha twenga, ili tukotoho kuwela na holu kulichuwa lya utoso. kwaikiva ngalilu gha twenga kumlimawogha hau ingulandana na Yesu vila kawela angulama. 18 Penikuwela na kupalana kwahela holu gha chochosi, upalo weni kutimila unguwinga holu hyogha. Mundu mweni holu katimila ng'ogha kuupalo, kwaikiva holu inguhika kupitila kutila kunyokolwa.

19 Twenga tunguwela na upalo kwaikiva Sapanga atupalile mtumbulo. 20 Mundu pakalonga yiwa angumpala Sapanga, kunu angumhyomela myaki, hayu kamwangi. Kwaikiva mundu mweni kumpala ng'ogha mlongo yula angumlola, kanguwesa ng'ogha kumpala Sapanga kamlola ng'ogha. 21 Sapanga katupegha laghilo hali, mundu yeyosi mweni kumpala Sapanga angupalwa hilahila ampali mlongo ghaki.