1 Nenga mgogolo kilongosi,

ningukuyandikia wenga nyongu uhaghuliwi na Sapanga pamonga na wana ghako niwapala kiuchakaka. Ng'ogha nenga weka ghangu, mweni kuwapala. Na waghangi wogha weni kuumanya hula uchakaka, 2 kwaikiva uchakaka ungulikala na twenga machuwa hyogha.

3 Umaha na ulungwana na kuponga zinguhuma kwa Sapanga Tati na kwa Yesu kilisito mwana, ziwela pamonga na twenga kuuchakaka na upalu.

4 Nihekelili nesu panihyoghanili amonga gha wana ghako wangulikala kuuchakaka, handa vila tupokelili laghilo kwa Tati. 5 Hinaa nyongu, ng'ogha yiwa ningukuyandikila laghilo lya hyonu, ila hilahila tuwela nayu kuhuma mtumbulo patumkwinila Kilisito yiwa tupalane. 6 Haku ndiwa kupalana, yiwa tuyendileli na kukovikela laghilo lyaki, hayi ndiwa laghilo lyaki handa vila myughanili kuhumila mtumbulo yiwa tuyendileli kupalana.

7 Walulunganya watangala wahumila kumlima wogha, wandu wamjumila ng'ogha yiwa Yesu Kilisito kahika kukihigha, mundu alongile hagha ni mlulunganyi na angumngingama Kilisito. 8 Hinu mlikali mihu wenibaha, ili mkotoho kuyaghamisa lihengu lyogha mgholile kukumtumikila Sapanga, bali mpokeli hupo itimila.

9 Mundu yoyosi mweni kukola ng'ogha na kuyendelela kumuvulo gha kilisito, ila kayaleka, mweni kammanya ng'ogha Sapanga. Ila yoyosi mweni kulikala kumavulo kana Tati na Mwana. 10 Hinu, handa mundu akahika kwa mwenga akotoho kuwayeghela mavulo hagha, mkotoho kumkalibisa ukaya kwa mwenga, wala mkotoho kumjambusa handa mkwinila. 11 Yoyosi kanamjambusa mundu hayu, kawela pamonga na mweni kumatendu ghaki mahakata.

12 Niwela na mighalu itangala gha kuwalongela, ila nipala ng'ogha kuwayandikila mlihamba, badili ghaki nalitumaini kuwahikila na kulongela na mwenga ndunda ndunda ili luheku lwa twenga litimili.

13 Wana wa mhacha ghako yula ahaghulilwi na Sapanga haku niwela wangukujambusa.