1 Nenga mgogolu kilongosi,

ningukuyandikila wenga ghanja ghangu Gayo, ningukupala kiuchakaka.

2 Ghanja ghangu, ningukuyupila kwa Saapanga uyendeleli maha kumighalu ghako hyogha, ningukutakila ukomu kumhigha ghako kunu ukiyendelela maha kuumonga ghako na Sapanga. 3 Nihekelela nesu walongo mayaghani pawahika baha, wakalola uchakaka ghako kunani gha chakaka, hina, wenga machuwa hyogha ungulama kuuchakaka. 4 Kwahela mghalu ungunihekelesa kupiti kuhyoghanila vila wana ghangu wangulikala kuchakaka.

5 Mpalwa wa nenga, wenga uwela ng'ogha na ukambenga lipindi lyogha paunguwatumikila walongo wakwinila, na hata kwa wahenja pamonga na yiwa unguwamanya ng'ogha, 6 weni walilongela lipinga lya weni kumkwinila Kilisito lya baha ghala wayahyoghanila na kuyalola kukovekelana na upalo ghako, chondi uwatangi wayendeleli na mwanja ghao kwa vila ingumhekelesa Sapanga. 7 Mwanja hau wanguyenda ni gha kumtumikila Kilisito. Wapokela ng'ogha mtanga wowosi kwa wandu wamkwinila ng'ogha Kilisito. 8 Hinu twenga weni kumkwinila Kilisito tungupalwa kuwatanga wandu handa hagha, ili na twenga tugholi pamonga na weni lihengu lya kutangasa chakaka.

9 Niliyandikila lipinga lya wandu weni kumkwinila Kilisito lihamba, ila Deotelefe mweni kihelehele handa ndiwa mkulu ghao kangupala ng'ogha kunihyoghanila. 10 Panitehika nitelongela na mweni kuulongolo gha lipinga lya weni kumkwinila Kilisito mighalu hyogha anguighola. Angutungonga na kutulongelela milando mihakata, ila ng'ogha hagha weka, hilahila angulema kuwapokela na kuwapokela wandu weni kukwinila pawawela na mwanja wa kuhika haku. Na anguwalemesa wandu waghangi wenikupala kuwapekela wahenja na anguyesa hata kuwawinga wala weni kuyesa kuwapokela wahenja.

11 Ghanja ghangu, ukutoho kukovekela mlandano mhakata, ila mlandano wa maha. Kila yula mweni kughola ghamaha ni wa Sapanga, ila yula mweni kughola mahakata kangummanya ng'ogha Sapanga.

12 Kila mundu kangumsifila Demeteleo kwa ghala maheli angughola, matendu ghaki yeni yanguilongela yiwa mweni ni mundu maheli, twenga hilahila tungumlongelela maheli, na wenga ungumanya yiwa kila tungukilongela ni chakaka.

13 Niwela na mighalu mitangala gha kuwalongela, ila ningupala ng'ogha kuwayandikila mlihamba. 14 Niwela na litumaini kukutyangila lipindi lya pabehi. na tutewesa kulikala pamonga na kulongela ndunda ndunda.

15 Ningukuyupila kwa Sapanga akupeghi kulikala kwa kuponga,

waghanja ghako wa baha Efesu wangukujambusa. Na wenga wajambusi waghanja wa twenga weni kuwela haku kwa lihina lyaki.