1 Nenga Yudasi mtumikila wa Yesu Kilisito na mlongo wa Yakobu

ninguwayandikila mwenga wogha mkemilwi na Tati Sapanga na weni kupalwa na Sapanga, na weni kugholokelwa maha na Yesu Kilisito.

2 Ningumyupa Sapanga awapeghi luhungu ghaki, kulikala kwa kuponga pamonga na upalo ghaki mkulu.

3 Walongu wapalwa, niwelili na lukani lwa kuwayandikila kunani gha hula ulokola tuwela nau, ila nilola yiwa ni lasima niwayandikili kuwakasila muyendileli kuyangala kukukwinila kula Sapanga kawapegha wandu ghaki lihanja limonga hela kwa lipindi lyogha. 4 Ninguwayandikila lihamba hali kwaikiva kuwela na wandu watenu weni kumyitikila ng'ogha Sapanga, waliyingisa kwa kifisu na kulihanganya na mwenga, wandu hagha wangubyodosa Habali gha umaha wa Sapanga wa twenga, ili wagholi sambi na kumkanila Yesu Kilisito mwenikuwela kilongosi mkulu na Bambu wa twenga. Ila kuhuma dahile iyandikwa yiwa wandu hagha watetoswa.

5 Pamonga na yiwa mmanya kala hagha hyogha, ningupala kuwakumbusila yiwa Bambu paawalokolile kala wandu ghaki kuhuma Misili, kuulongolo akawayalamisa wala walemili kukwinila ng'ogha, 6 hilahila mkumbwiki watumikila wa kundumba wa Sapanga wala wapalile mighalu mikulunga kupiti ukulu wawela nau, wakaleka pala wangupalwa kulikala, Sapanga akawavika kufwasi gha lwisa, wakiwopwa minyololu kwa machuwa hyogha bila mwihu, mbaka pala watetoswa lichuwa lila likulu. 7 Kangi wandu wa mimbwani gha Sodoma na Gomola na mimbwani iwelile mmbalimbali, wandu hagha waigholile handa waigholile wala watumikila wa kundumba wa Sapanga waigholile. Hinu Sapanga akawapegha unyokolu kwa kunyanywa kyoto lya machuwa hyogha bila mwihu, ili iweli makaniso kwa wandu wogha.

8 Hata nagha wandu hagha weni kumyitikila ng'ogha Sapanga wangulandana na weni. Wangulongoswa na ndotu, ndotu hazi zingutaya ndaka mihigha ghao, wanguulema ukulu wa Sapanga na kulighu viumbi vikulu vya Sapanga vyenikuwela kundumba. 9 Hata Mikaeli, mtumikila mkulu wa kundumba wa Sapanga paawelili akisindana na Lihyukana kwaikiva gha mhigha wa Musa, ayesili ng'ogha kumtosa Lihyukana kwa malighu ghaki, ila ailongile, "Bambu Sapanga mweni na akukalipili." 10 Ila wandu hagha wangulonga milando mihakata kunani gha mighalu wanguimanya ng'ogha. Na kumighalu hila wanguimanya kwa kukisila handa vila mikokolu wangukisila, hai ndiwa mighalu yeni kuwayalamisa. 11 Mahakata yatewakola! Weni wangukovekela njila gha Kaini. Kwaikiva gha kupala mapesa wakakovekela ndyangilu hilahila gha Baalamu, na kuyalamika kumahakata handa gha Kola vila kakosela na kuyalamiswa. 12 Wandu hagha wanguyegha mkolughanyu kumihambu gha mwenga gha upalo. Wangulilola weni weka pawangulyegha, weni ni handa mahindu yeni kukweghwa na liyegha na yakotoho kuyegha ndonya. ingumaanisa wanguwela ng'ogha na uchakaka kungalilu ghao, kangi ni handa mibikiyenikuwela ng'ogha na matungula lipindi lya mabeno, itupulwa hyogha na iyuma, 13 hilahila ni handa mawimbi makalipa mubahali, na matendu ghao gha honi yanguhuma handa livuluvulu. Weni ni handa ndondwa zyeni kuyeleja yeleja. Wandu hagha watevikwa kumbandi gha lwisa ngulu lwa machuwa hyogha bila mwihu.

14 Enoko, mundu wa kiweka kya isaba kuhuma awoneki Adamu, akalota nagha kwa wandu handa hagha, "Uloli Bambu Sapanga anguhika pamonga na maielufu gha watumikila ghaki, 15 ili kuwatosa kila mmonga mweni kumtila ng'ogha Sapanga kwa matendu ghao gha uhakata wagholile, pamonga na weni sambi vila wamlighu Sapanga."

16 Wandu hagha wangunung'unika na weni kuhakula mahakata, weni wangukovekela lumatamata lwau luhakata, wangulidumba, na kuwasifila nesu wandu weni ukulu kwaikiva gha kuipatila fwaida.

17 Ila mwenga waghanja ghangu, mkubwiki ghala mlongelilwi haku dahile na wandumindumi wa Bambu wa twenga Yesu Kilisito. 18 Walongile, "Machuwa gha kumwihu kutehika wandu weni kumpughanya Sapanga na kughola mighalu mihakata wanguipala weni baha." 19 Hagha ndiwa wandu weni kuwabaghula wandu mapinga mkotoho kuwela pamonga, wanguwachilila ngalilu ghao weka, na wawela ng'ogha na Mpumulo wa Sapanga. 20 Ila mwenga waghanja ghangu, myendileli kugholoka maha kuukwinila muwela nau mpeghwa na Sapanga, mkiyupa kwa uwesa wa Mpumulo wa Sapanga. 21 Myendileli kulikala kuupalo wa Sapanga mkimlindila Bambu wa twenga Yesu kilisito na kwa luhungu lwaki atewayingisa kuukomu wa machuwa hyogha bila mwihu.

22 Muwawoneli luhungu wala weni kuwela kukwinila kwau kugholoka maha ng'ogha. 23 Wamonga muwalokoli kwa kuwanyasula kuhuma mulyoto, ila kwa waghangi muwawoneli luhungu kunu mkilikala kutali na weni, mkihyomela hata nguu zyau zyeni kutanywa ndaka zya lidowa lya lumatamata lwau luhakata.

24 Sapanga kana makakala na anguwesa kuwaghola mkotoho kuyalamika, na anguwesa kuwayingisa kuukulu ghaki bila uhakata wowosi mghati gha mwenga na akawapegha luheku lukulunga, 25 Sapanga mwenikuwela waweka, mlokola wa twenga, mweni kusifilwa na ukulu, makakala na ulongosi kupitila Kilisito Bambu wa twenga, kuhuma dahile hinaa na hata machuwa hyogha bila mwihu! Hina.