1 Hau ndiwa ugubutulo uwela Sapanga ampeghili Yesu Kilisito, lukani awalangihi watumikila ghaki hila mighalu yenikupalwa kuhumila machuwa gha hinaa. Hinu Kilisito amtumili mtumikila ghaki wa kundumba ili auyeghili ugubutulo hau kwa mtumikila ghaki Yohana. 2 Yohanaakalongela mighalu hyogha ailolile. Mighalu hai ni kunani gha uchakaka agubutulilwi na Yesu Kilisito, na hau ni lilando lya Sapanga. 3 Sapanga atemhighila mundu mweni kusoma na yula mweni kuhyoghanila na mweni kuyitikila milando gha ulota hau kwaikiva iwela pabehi kutimila.

4 Nenga Yohananinguwayandikila lihamba hali mwenga mapinga isaba gha wandu weni kumkwinila Kilisito haku Asia.

Ninguwatakila umaha na kulikala kwa kuponga kuhuma kwa Sapanga yula kawela na yula awelili na yula atewela na kuhuma kwa Mipumulo isaba wenikuwela kuulongola gha kitamilo kyaki kya ukulu, 5 na kuhuma kwa Yesu Kilisito, na yula machuwa hyogha angulongela ujunbi wa chakaka, mweni ndiwa wa mtumbulo kuhinduka na mweni ni kilongosi wa wankosi wogha wa kumlimawogha,

Yesu angutupala na kwa kihu kyaki katuvika pekesu kuhuma kuvihungu vya sambi tuwela navyu, 6 akatughola twenga tuweli kuunkosi ghaki na watambika wa Sapanga, tumtumikili Sapanga mwenikuwela Tati ghaki. Ukulu na uwesa umghati ghaki machuwa hyogha bila mwihu! Hina.

7 Uloli! anguhika paghati gha mahindu kuhuma kundumba, na kila lisu litemlola, pamonga na wala wamuhomili kwa mgoha na misumali, na wandu wa makabila hyogha kumilima hyogha watelumbilila kunani ghaki, chakaka ndiwa itewela.

8 Bambu Sapanga mweni makakala hyogha angulongela nagha, "Nenga ndiwa Alufa na Omega ingumanisa ndiwa wa mtumbulo na wa mwihu, ni mwenikuwela, niwelili na nitehika nenga ni Sapanga."

9 Nenga Yohana, mlongo wa mwenga kukumkwinila Kilisito, tungufumilala mahakilo pamonga kwaikiva gha Yesu na unkosi ghaki. Niwelili kukihiwa kya Patimo kwaikiva haku avikilwi mkihungu kwa kuwoneka na kosa lya kutangasa Habali Maha gha Yesu Kilisito. 10 Lichuwa limonga lya ijumapili lya kumyupa Bambu, kunu nikiyupa ku Mpumulo wa Sapanga, kuhyetu ghangu nikayoghanila lilowi likilonga handa lya lipembi lya limgambo, 11 likilonga, "Uyandiki kukihitabu hagha hyogha unguyalola, na hinu uyayeghi hagha kumalipinga isaba gha wandu weni kumkwinila Kilisito haku, Efesu na Similina na Peligamo na Siatila na Salidi na Filadelifia na Lawodikia."

12 Hinu nikaghalambuka ili nimloli hayu mwenikulongela na nenga. Panihyukile nikalola vindu viisaba vya kuvikila mimbamba vyeni kugholwa kwa zahabu, 13 kangi paghati ghati gha vila vindu vya kuvikila limbamba nimwonili mundu mlandanu wa Mwana wa Adamu, na mweni awelili kavala lihabiti litali na luhunga lwa zahabu uwopilwi kukitivi. 14 Mutu ghaki na hwila ghaki ziwelili mbulete pee, na mihu ghaki handa myengi gha lyoto. 15 Lwayo ghaki ni handa shaba yeni mng'anyimo nesu, na lilowi lyaki likawela handa mlindimo lya masi matangala yakihuluka kuhuma kulitumbi. 16 Kuliwoku lyaki lya kuliyila akolili ndondwa isaba na kumlomu ghaki kuhumili lipanga liwelili na ukalipa kunu na kunu. Na wusu ghaki uwelili ungung'anyima handa mhana wa lijuwa likalipa. 17 Hinu panimlola, nikaguwa kifulifuli kuulongolo gha maghulu ghaki handa mundu ahovile. Akavika liwoku lyaki lya kuliyila kunani gha nenga na kulongela, "Ukotoho kutila, nenga niwamtumbula na wa mwihu." 18 Nenga ni yula mweni ukomu! Niwelili nihova, ila uloli, hinaa ni mkomu machuwa hyogha bila mwihu, na nenga ninguuwesa kukihu na kumambi. 19 Hinu, hinaa uyandiki mighalu hai ungulola, mighalu itehumila hinaa na hila hila yetehumila kuulongolo. 20 Nitekulongela zila ndondwa isaba uzilolili kukuliwoku lyangu lya kuliyila na nitekulongela vila vindu isaba vya zahabu vya kuvikila limbamba, ni ghani. Zila ndondwa isaba ni watumikila wa Sapanga wa kundumba weni kugholokela mapinga isaba gha wandu weni kumkwinila Kilisito, na vila vindu viisaba vya zahabu vya kuvikila limbamba ni mapinga isaba gha wandu weni kumkwinila Kilisito.