1 Hinu, kukawoneka kilangihi kya makangasu kundumba, mdala mweni kuvikwa lijuwa na mwehi ukawela pahi gha maghulu ghaki, na kunani gha mutu ghaki kukawela na likokoma lya ndondwa ikumi na ivili. 2 Mdala hayu awelili na ndumbu, na mweni akalila nesu kwa lusungu kwaikiva awelili pabehi na kuliwopola.

3 Hinu, kilangihi kighangi kikawoneka kundumba, linjoka likulunga likeli lyeni vimutu viisaba na pembi ikumi na mikokoma isaba kuvimutu vyaki. 4 Kangi mkila ghaki ukawela ukikungula selusi imonga gha ndondwa zyogha zya kunani na kuzitagha pahi kumlimawogha. Ndiwa lila linjoka likagholoka kuulongolo gha yula mdala, mweni kuwela pabehi na kuliwopola ili lipati kummila mwana lipindi ateweleka. 5 Yula mdala akaiwopola mwana mlumi, atelongosa milima hyogha kwa hyatu ghaki gha lyuma. Ila hayu mwana akanyasulwa na kuyeghwa kwa Sapanga na kweni kitamilo kyaki kya kiinkosi. 6 Yula mdala akatuwilila kulivagha, kula Sapanga amyandalili mahala ili awesi kupeghwa mulyo haku kwa lipindi lya machuwa lya ielufu imonga na imia ivili na isitini.

7 Kuulongolo kukahumila ngondo kundumba. Mikaeli na watumikila wa kundumba wa Sapanga wala kawela nau wakatovana na linjoka lila, na linjoka likiwela na watumikila ghaki likatovana na weni. 8 Ila linjoka na watumikila ghaki wakasindwa, na wakawingwa wahuki kundumba. 9 Lila linjoka likulunga likadangwa pahi, linjoka hali ndiwa lila linjoka lya dahile lyeni kuwela likikemwa hilahila Mlulunganyi au Lihyukana, lyeni kuungonga mlima wogha. Likadangwa pahi kumlimawogha, lyeni na watumikila ghaki wogha.

10 Hinu, nikahyughanila lilowi likulunga kuhuma kundumba likilonga, "Hinaa uhika ukombola na makakala na unkosi wa Sapanga wa twenga, na ulongosi wa Kilisito ghaki! Kwaikiva yula mweni kuwasitaki walongo wa twenga kuulongolo gha Sapanga kataghwa pahi, chakaka kataghwa pahi hayu mweni kuwasitaki uhiku na pamuhi. 11 Wakwinila wayetu wakamsinda kwa mwahi gha Mwanakondolu na kwa kulonga uchakaka kwa habali gha Yesu, weni walolile ng'ogha yiwa ngalilu zyau yiwa ndiwa zya maha, watilile ng'ogha kihu katu. 12 Hinu uhekeleli, wenga kundumba na wogha weni kulikala hamu! Ila watekolwa na mahakata wala wogha wenikulikala kumlimawogha na kubahali, kwaikiva yula mlulunganyi kahuluka kwa mwenga, na mweni kamema lilaka, kwaikiva angumanya yiwa lipindi lihighala ni lihupi nesu."

13 Linjoka lila palimanya yiwa lihuluswa pahi kumlimawogha, likamkovekela yula nyongo mwenikuwela kaliwopola mwana mlumi. 14 Ila nyongo hayu akapeghwa mbapatilo ziivili gha tai awesi kuhuluka kuyenda. Ayendi mbaka kuluvagha kula ayandalililwi awesi kuvikwa maha kwa machuwa ielufu imonga imia ivili na isitini. 15 Hinu, lila linjoka likalukula masi matangala handa lweni, ili yamtutiki hayu nyongo. 16 Ila mlima ukamtanga hayu nyongo, ukajigubutula handa mlomo na kumila masi ghala yeni kuhuma kumlomu gha linjoka lila. 17 Hinu, linjoka lila likamhyomela nesu hayu nyongo, na likahuka, likayenda kutovana na wana ghaki waghangi. Wana wa mdala ni wala wandu weni kuyitikila lilando lya Sapanga na wangulongela ghala Yesu avulile. 18 Hinu, lila linjoka likagholoka muufuo wa bahali.