1 Hinu, nikamlola mtumikila wa kundumba wa Sapanga akihuluka kuhuma kundumba akiwela kakola ufunguu wa liwumba likulunga lya mlima wa wahovili na mnyololu mkulunga. 2 Akalikola lila linjoka mweni kuwela linjoka likulunga lya dahile, mweni kukemwa Mlulunganya au Lihyukana, akamwopa kwa minyololu kwa machuva ielufu imonga. 3 Akamdanga kulila liwumba lya kumlima wa wahovili akamuwopa mula na kulivika kibandiku ili kumlemesa akotoho kuwalulunganya wandu wa mlima wogha mbaka machuva hagha ielufu imonga yatimili, badili gha hagha lasima awopolwi kwa lipindi lihupi.

4 Hinu nikalola wala wapeghilwi uweso wa kutosa watama kuvitamilu vya kinkosi na nikalola mipumulo gha wala weni kudumulwa mutu kwaikiva gha kutangasa habali gha Yesu na kwaikiva gha lilando lya Sapanga. Wandu hagha wawelile ng'ogha wamyupa likokolo hali wala ling'omung'omu lyaki na wapokela ng'ogha hila kilangihi kya muuli kyaki. Kukibhungi kya wusu ghao au kumawoku ghao. Watumikila wa Sapanga hagha watepokela ukomu kangi na kulongosa pamonga na Kilisito machuva ielufu imonga. 5 Wala waghangi wahovili wahindulwa ng'ogha mbaka ila machuva ielufu imonga paitemila. Hau ndiwa uhindulu wa utumbulo. 6 Sapanga atewahighila nesu wala wandu awahindulo mtumbulo kangi watewela wandu wa Sapanga, kihu kya ivili kitewela ng'ogha na makakala kwa weni. Na weni watewela watambika wa Sapanga na Kilisito na watelongosa na mweni kwa machuva hai ielufu imonga.

7 Badili gha machuvai ielfu imonga paitimila, Lihyukana atewopolwa kuhuma kukihungu kyaki, 8 mweni atehuma ili kuwalulunganya wandu wawela kumlima wogha kogha, ingumanisa gogu na magogu. Lihyukana litewakungula pamonga kwaikiva gha ngondu na weni watewela watangala handa mhanga wa ufuoni. 9 Watyangili kumlima wogha kogha wakatindila pala walikala wandu wa Sapanga na mmbwani wa Sapanga anguupala, ila lyoto ukahuluka kuhuma kundumba na kuwayalamisa. 10 Na mweni Lihyukana mweni uwalulunganya akadangwa kweni lihiwa lyeni lyoto likalipa na baluti. Hamu ndiwa wataghilwi wala likokola lila likulunga na mlota yula wa uhwangi, na weni watehakilwa pamuhi na uhiku machuwa hyogha bila mwihu.

11 Hinu, nikalola kitamilo kya kinkosi kikulunga kimbulete kya na mweni akikalili kukitamilo haki, kundumba na mlima vikahuka kuulongolo ghaki na viwonekana ng'ogha kangi. 12 Nikawalola wandu wakulunga na wanung'una wahovili wagholoka kuulongolo gha kila kitamilo kya kinkosi. Vihitabu vikagubutulwa, hinu kihitabu kighangi kikagubutulwa na kyeni ni kihitabu kya ukomu. Wandu wahovili wakatoswa kukovekelana na matendu ghao yeni kuyandikwa kweni vihitabu havi. 13 Bahali ikawahumisa wandu wahovili weni kuwela hamu, kihu na liwumba likulunga lya mlima wa wahovili vitehumila wandu weni kuwela hamu. Kila mundu atetoswa kukovekelana na matendu ghaki. 14 Hinu, kihu na liwumba likulunga lya wandu wahovili litetaghwa kulihiwa lila lya lyoto na baluti. Hali lihiwa lya lyoto na baluti ndiwa kihu kya ivili. 15 Mundu yoyosi mweni kuwela lihina lyaki liyandikwa ng'ogha kukihitabu kya ukomu na mweni hilahila ataghilwi kulihiwa lya lyoto na baluti.