1 Hinu Mwanakondolu paakitwenyula kila kibandiku kya isaba, kukawela kunyamala jii kundumba kwa lipindi lya nusu lisaa. 2 Hinu, nikawalola wala watumikila isaba wa kundumba wangugholoka kuulongolu gha Sapanga, na weni wapeghilwi mipembi gha limgambo isaba.

3 Mtumikila mghangi wa kundumba wa Sapanga awelili na kiyonjo kya zahaba, akahika na kugholoka kuulongolu gha kihanja kya kulungusila ubani. Na mweni akapeghwa ubani utangala ayeghi handa litambiku pamonga na mayupo gha wandu wogha wa Sapanga kunani gha kihanja kya zahabu, kyeni kuwela kuulongolu gha kitamilo kya kinkosi kya Sapanga. 4 Hula lyohi lya ubani pamonga na yala mayupo gha wandu wa Sapanga, vikakwela kunani kuulongolu gha Sapanga, kuhuma mumawoko gha yula mtumikila wa kundumba wa Sapanga. 5 Na yula mtumikila wa kundumba akakitola kila kiyonjo, akakimemesa lyoto lya kihanja, akalidanga lyoto kunani gha mlima wogha, kukawela lilowi lya ladi na lumuli na mhihimo wa mlima.

6 Hinu, wala watumikila isaba wa kundumba kwa Sapanga wakaliyandala kupulila hila mipembi lya limgambo zyao.

7 Mtumikila wa mtumbulo akapulila lipembi lya limgambo, ikahumila ndonya gha miganga yenikuhanganyika na lyoto pamonga na mwahi, vikadangwa kwa likakala kunani gha mlima wogha na selusi gha mlima wogha ikayalamika, selusi gha mibiki ikayalamika na manyahi hyogha mavihi yakayalamika.

8 Na mtumikila wa ivili akalipulila lipembi lya limgambo. Na kindu handa litumbi likulunga lyeni kuyaka lyoto kikataghwa mbahali. Selusi imonga kya bahali ikawela mwahi, 9 selusi imonga gha viumbi wa mbahali vikahova, na Selusi imonga gha whatu ngulungwa sikakologhanyiwa.

10 Mtumikila wa itatu akapulila lipembi lya limgambo, na ndondwa ngulu ikawela ikiyaka handa lyoto, ikaguwa kuhuma kunani, ikaguwila Selusi gha milweni na kuuhimbuhimbu zya masi. 11 Ndondwa hai ingukemwa "lusungu". selusi gha masi yakawela na lusungu na wandu watangala wakahova kwaikiva gha masi hagha kuwela na lusungu.

12 Mtumikila wa injechi na mweni akapulila lipembi lya limgambo lyaki. Ndiwa selusi imonga gha lijua, na selusi imonga gha mwehi na selusi imonga gha ndondwa, vikatovwa, vikawela na lwisa na selusi imonga gha pamuhi ikawela ng'ogha na mhana na selusi imonga gha uhiku ikawela ng'ogha na mhana.

13 Hinu, nikalola ngwasi mkulungwa akighuluka kunani nesu. Nikayughanila akitova lilowi akilonga, "Mtepokela lung'ai, mtepokela lung'ai, mtepokela lung'ai yatewahikila wala wangulikala mumlimawogha lipindi watumikila wa itatu wa kundumba wa Sapanga wahighalili watepulila mipembi gha limgambo lyau!"