1 Hinu nikahyoghanila lilowi likulunga likihuma Kulighuta lya Sapanga likiwalongela wala watumikila isaba wa kundumba wa Sapanga, "Mkayiti yala mabakuli isaba gha lilaka gha Sapanga kunani gha mlima wogha!"

2 Mtumikila wa mtumbula wa kundumba wa Sapanga akayenda akayita libakuli lyaki kunani gha mlima. Malipu mahakata na yeni kuhakila nesu yaka wahumila wala wandu weni kilangihi kya yula likokolo na wala wayupili ling'omung'omu lyaki.

3 Mtumikila wa waivili wa akayita libakuli lyaki mbahali, Na bahali ikawela mwahi hela handa mwahi gha mundu ahovili, na viumbi vyogha mbahali vikahova.

4 Mtumikila wa itatu wa akayita libakuli lyaki kunani gha milweni na uhimbuki gha masi na masi ghala hyogha yakahyuka kuwela mwahi. 5 Nikamhyoghanila mtumikila mweni kugholokela masi akilonga, "Wenga mwenikutimila, mwenikuwela na uwelili! Wenga ughola vila ingupalwa kwa kutosa nagha, 6 kwaikiva wawakomili walota ghako na wandu ghako. Hinaa uwapegha wandu hagha wahakata mwahi ili wanyweghi, haki ndiwa wangupalwa wapokeli." 7 Hilahila nikahyoghanila lilowi kuhuma kukihanja likilongela, "Hina Bambu Mweni Makakala! Utoso unguughola ni wa chakaka na ungughola vila ingupalwa."

8 Hinu mtumikila wa njechi wa kundumba wa Sapanga akayita libakuli lyaki kulijuwa. Lijuwa likapeghwa makakala gha kuwanyanya wandu kwa lyoto lyaki. 9 Kwa nagha wandu wakanyanywa nesu, wakamlighu Sapanga mweni uwesa kunani gha lung'ai lyogha, ila walekila ng'ogha sambi na kumhyukila Sapanga na kumpegha ukulu.

10 Mtumikila wa mhanu wa kundumba wa Sapanga akayita libakuli lyaki kukitamilo kya ulongosi kya likokolo, lwiha likavamila ulongosi ghaki, wandu wakaluma milimi ghao kwaikiva gha mahakilo. 11 Wakamlighu Sapanga wa kundumba kwaikiva gha mahakilo yawakolile na vilonda wawela navyu. Ila walekili ng'ogha sambi wasigholili na kumhyukila Sapanga.

12 Hinu, Mtumikila wa isita akayita libakuli lyaki kunani gha lweni mkulunga wenikukemwa Fulati. Masi ghaki yakayuma, ili kuyandala njila gha wankosi wenikuhuma kuhumila lijuwa. 13 Kuulongolo nikalola mahoka waitatu wenikuwela handa miyula, wakihuma kumlomo wa lila linjoka na mmonga mumlomo wa yula likokolo na mmonga mumlomo wa yula mlota wa uhwangi. 14 Hagha ndiwa mipumulo gha mahoka weni kughola makangaso, Ndiwa wenikuyenda kwa nkosi wa mlima wogha na kuwakungula pamonga kwaikiva gha ngondo gha lichuwa lila likulunga lya Sapanga mweni makakala.

15 "Uhyughanili nenga ninguhika handa mwihi! Kahighilwa mundu yula mweni kukesa na kuvala nguu zyaki ili akotoho kutyanga ngelengi haku na haku na akotoho kuwona honi kuulongolo gha wandu."

16 Ndiwa wakawakungula wankosi lipinga kumahala kwa Kiebulania pangukemwa Hamagedoni.

17 Hinu, mtumikila wa isaba wa kundumba wa Sapanga akayita libakuli lyaki kunani. Lilowi likulunga likahyoghanika kuhuma kukitamilo kya kinkosi, Kulighuta lya Sapanga, "Hyogha yayomoka!" 18 Kukahumila lumuli, lilowi, mlindimu na mhihimilo mkulunga wa mlima weni uhumilili ng'ogha kuhuma kwa kulumbwa kwa mundu. Hinu hali liwelili mhihimilo mkulunga wa kukangasa. 19 Mmbwani wula mkulu wa Babeli ukabalulwa pandi itatu, na yeni mimbwani gha milima hyogha, ikayalamika. Sapanga aukumbwike Babeli hula uwelili mkulu na kuupegha kikombi kya difwai lya lilaka lyaki likulunga. 20 Kila Vihisiwa vikawuka na mitumbi iwonekana ng'ogha. 21 Ndonya gha maganga, makulunga yeni utopehu wa handa kilu iamsini kila lindwendi limonga, yakawaguwila wandu, Na weni wandu wakamlighu Sapanga kwaikiva gha lula lung'ahi lwa ndonya gha maganga, kwaikiva hali liwelili likulunga nesu.