1 Hinu nikalola vilangihi vighangi kunani, vikulu na vyenikukangasa, watumikila isaba weni lung'ai isaba gha mwihu, kwaikiva kukovekelana na lung'ai halu lilaka lwa Sapanga lutewela lutimila.

2 Nilolile handa bahali gha kiou yenikuhanganyika na lyoto. Wala wogha wamsindili likokolo na ling'omung'omu lyaki na inamba gha lihina lyaki wawelili wagholoka mmbali gha bahali. Wandu hagha wawelili na ligombogombo wapeghilwi na Sapanga. 3 Wawelili wakiyimba uyimbo gha Musa, mtumikila wa Sapanga na wa Mwanakondolu,

"Bambu Sapanga mweni makakala,

matendu ghako ni makulu na yenikukangasa nesu!

Wenga nkosi wa milima,

njila zyaku ni zya chakaka na zingujumilika.

4 Bambu ni ghani ateleka kukuyitikila wenga?

Ghani ateleka kuliyinula lihina lyaku?

Wenga weka yaku ndiwa wamaha nesunesu.

Wandu wa milima hyogha itekuhikila na kukuyupa,

kwaikiva matendu ghako gha chakaka yawoneka paluagha."

5 Badili gha hagha nikalola Lighuta lya Sapanga liwopolwa kundumba, lighuta hali liwelili handa lihema lya Sapanga, pavile Sapanga atamili pamonga na wandu ghaki kulivaghana. 6 Hinu, wala watumikila wa Sapanga wa kundumba isaba weni lung'ai isaba wakahuma hamu Mulighuta lya Sapanga, wakiwela wavwala nguu mbulete pee zyeni kung'anyima na wavwala mihungi gha sahabu kuvitivi vyau. 7 Ndiwa mmonga wa wala viumbi wanjechi weni ukomu akawapegha wala watumikila isaba wa kundumba wa Sapanga mabakuli isaba gha zahabu yenikumema lilaka lya Sapanga, mweni kulikala machuwa hyogha bila mwihu. 8 Lighuta lya Sapanga likamema lyohi lyenikuyambuswa na ukulu na uwesa wa Sapanga, na kwahela mundu awesili kuyingila mbaka yatimili malung'ai hyogha isaba gha wala watumikila wa kundumba wa Sapanga isaba.