1 Hinu, nimuwonili mwanakondolu kangutwenyula kibandiku kimonga paghati gha vila vibandiku viisaba. Nikayughanila mmonga wa wala viumbi weni ukomu wanjechi akilonga kwa lilowi likulunga handa gha mlindimu wa ladi, "Uhiki!" 2 Nenga nilolili kuulongolu ghangu awelili falasi mbulete. Mweni amlongosili falasi yula awelili na upindi, namweni apeghilwi likokoma lya usindi. Hinu akahuma akiwela msindi, ili ayendelele kusinda.

3 Hinu, Mwanakondolu akatwenyula kila kibandiku kya ivili. Nikamyughanila yula kiumbi mghangi wa ivili mweni ukomu akilonga, "Uhiki!" 4 Ndiwa akahumila falasi mghangi mkeli nesu. Yula mweni kumlongosa falasi yula apeghilwi uweso wa kuhumisa kuponga kwa wandu wa mlima wogha mweni apeghilwi lipanga likulungwa na kuwaghola wandu wakomani, .

5 Hinu Mwana kondolu akatwenyula kila kibandiku kya itatu. Nikamyughanila yula mundu mghangi wa itatu mweni ukomu akilonga, "Uhiki!" Nikalola na nikawona falasi mghangi mtitu. Mweni amlongosili falasi yula awelili na mzani wa kupimila haku na haku mmawoku ghaki. 6 Nikayughanila kindu handa lilowi likihuma kwa wala viumbi weni ukomu wanjechi. Na lyeni likilonga, "kimbu yimu gha ukowa wa nganu kwa msahala wa lichuwa limonga wa mundu, na kimbu itatu zya shahili kwa msahala wa lichuwa limonga lya mundu. Ila ukotoho kuyalamisa mahuta gha mzaituni wala difwai!"

7 Hinu, Mwanakondolu akatwenyula kibandiku kya njechi. Nikamyughanila yula kiumbi mweni mkomu wa njechi akilonga, "Uhiki!" 8 Panilolesa nikamlola falasi mweni langi gha lifu na yula mweni kumkwela awelile kihu na mweni kumambi awelile akimkovekela kuhyetu ghaki. Naweni wapeghilwi uweso kunani gha lobo gha mlima wogha wawakomi wandu kwa ngondo na kwa njala ngulu na kwa uvina makalipa na kwa mikokolo mikalipa.

9 Hinu, Mwanakondolu akatwenyula kibandiku kya itano. Pala pahi pakihanja kya matambiku gha kulunguswa nikalola mipumulo gha wandu wahinjilwi kwaikiva gha lilando lya Sapanga na kwaikiva gha ghala wawelile wakiyalongela. 10 Wakalila kwa lilowi likulunga, "Wenga Bambu mkulu, Sapanga wa weka na mghola ghamaha, mbaka ligha utelindila kuwatosa na kuwahuyisila wandu weni kutama kumlimawogha kwa kutukoma?" 11 Wakapeghwa kila mmonga nguu mbulete yenikuwela ndali, wakalongelwa wayendeleli kulindila kwa lipindi lihupi, mbaka pautimila utangala wa watumikila wayau wenikuwela watekomwa handa weni.

12 Mwanakondolu paakitwenyula kila kibandiku kya isita. Pakahumila mhihimilo mkulu kumlima, na lijuwa likawela lititu handa nguu lya ligunila ligholilwi kwa mapuku gha mbui, na mwehi wogha ukawela mkeli handa mwahi. 13 Ndondwa zya kundumba sikaguwa kunani gha mlima handa matungula gha libiki lya mkuyu yeni vinyalila yenikuguwa lipindi libiki lyaki lingutikaniswa na liyegha likalipa. 14 Kunani ukahuka handa vila likalatasi linyengwa, mitumbi hyogha na visiwa vyogha vighuswili paviwelili. 15 Na wankosi kumlimawogha na wakulu na watovangondo wakulu na wanaisa na weni makakala na kila muhusutu na mwenikuwela ng'ogha muhusutu, wakalihigha kumbangu na kuhyetu gha miganga mikulunga. 16 Wakailongela hila mitumbi na hila miganga mikulunga, "Mtuguwili, mtuhighi tukotoho kuwoneka na hayu mweni kulikala kukitamilo kya kinkosi na utuhighi kutali gha lilaka lya Mwanakondolu, 17 kwaikiva lichuwa lihakata lya lilaka lya Sapanga na lya Mwanakondolu lihika, kwa nagha ni ghani mwenikuwesa kufumilila?"