1 Badili gha hagha, nikalola mtumikila mghangi wa kundumba wa Sapanga akihuluka kuhuma kundumba. Awelili na uweso mkulu, na mlima wogha ukalangaswa kwa mng'anyimu ghaki. 2 Mweni kwa lilowi likulunga, akalonga, "Uguwa! uguwa mmbwani mkulunga wa Babeli! Uwela mahala kwa Lihyukana na mahoka, na mahala kwa kila mbongu wahakata na mahala kwa kila likokolo lihakata na lyeni kuhyomelwa." 3 Kwaikiva wandu wogha wa mlima wogha yanywegha uyimbi wa ngongola ghaki. Na wankosi wa mlima wogha waghola ngongola na mweni, na waghola biasala wa mlima wogha wapokela unaisa kwaikiva kana utangala gha hindu ghaki.

4 Hinu nikayoghanila lilowi kangi kuhuma kundumba ikilonga,

"Wandu ghangu mhumi kweni mmwani hau,

mkotoho kukughola vindu vihakata vyeni wandu ghaki wangughola,

ili mkotoho kupokela unyokola uvile Sapanga ateyegha kwa weni.

5 Kwaikiva sambi syaki siwelili sitangala nesu, sililundika mbaka kundumba

na Sapanga akumbwikile uhakata ghao.

6 Mumgholeli handa mweni awagholili mwenga,

mumlipi mihanja ivili kwa yala ayagholili.

Mhanganyileni kukitekelo kyaki mihanja ivili

gha hila difwai ikalipa aihanganyili.

7 Mumpeghi mahakilo na malumbililo kwa vila anguitutumula na ngalilu ghaki gha kuipala mweni,

kwaikiva mmuoyu ghaki kanailongela,

‘Nenga ni malikiya,

Nenga nihovilwi ng'ogha na mlumi ghangu,

wala nitewela ng'ogha na malumbililo.’

8 Kwa nagha mahakata gha kutila yatemkola kwa lichuwa limonga, mavina makulunga na malumbililu na njala ngulunga,

na mweni ateyalamiswa kwa lyoto,

kwaikiva Bambu Sapanga mweni kumtosa kana makakala."

9 Wankosi wa mlima wogha wala wagholile ngongola na mweni na kulama nayu kungalilu ghaki gha unaisa. Watelila na kulumbilila pawalola akilumbilila. 10 Wakigholoka kutali kwa holu kukovekelana na mahakilo ghaki wakilonga, "Yatekupata mahakata wenga mmbwani wa Babeli, mmbwani mkulunga na weni uweso! Utoso ghako uhika kwa lisaa limonga."

11 Waghola biasala wa mlima wogha watelila na kumlumbililila, kwaikiva kwahela mundu mweni kuhemela kangi vindu kuhuma kwa weni, 12 kwahela kangi wa kuhemela zahabu gha weni na madini gha feza na maganga gha mapesa ngoo na madini gha lulu. Na nguu mbulete nesu na nguu zya langi lya zambalau na halili na nguu keli. Na vyombu vya mibiki vya kila ndambu na vyombu vya pembi zya ndembu na gha mibiki gha mapesa ngoo na gha shaba na gha lyuma na malumalu. 13 Hilahila kwahela wa kuhemela mdalasini na iliki na ufumba na manungilu na ubani. Na difwai na mahuta gha miseituni na ukowa maheli na nganu. Na ng'ombi na kondolu na fwalasi na mbutuka gha kukweghwa na falasi na wahusutu, na wandu waghangi. 14 Waghola biasala wangumlongela, "Vindu vyogha uwelili unguvipala nesu viyalamika, vindu vyogha vya mapesa ngenju na vya unaisa vikugholili uwoneki mzuli viyalamika, katu vitewela ng'ogha kangi." 15 Waghola biasala weni kuwela wanaisa kupitila mmbwani hau wategholoka kutali na weni. Kwaikiva gha kutila mahakilo ghaki. Watelila na kulumbilila, 16 wakilonga, "Mighalu mihakata ikukola, mighalu mihakata ikukola mbwani hau mkulunga. Uwelili unguvaliswa nguu mbulete nesu na zya langi gha sambalau na ngeli, na uwelili unguvikwa malembu gha zahabu na maganga gha mapesa ngenju na madini gha lulu! 17 Kwa lisa limonga hela unahisa ghako uyaghanika!"

Kangi walongosa whatu ngulunga wogha na wayenda mwanja ghao na wandu weni kughola biasala mubahali na weni kughola mahengu mbahali, wategholoka kwa kutali, 18 na pawatelola lyosi lya kulungula mmbwani hau, watelila kwa lilowi wakilonga, "Uwoneka ng'ogha mmbwani mkulunga handa mmbwani hau!" 19 Wateyitila malifu kunani gha mitu ghao kulangiha yiwa wangulumbilila. Watelila wakilonga, "Ungukolwa na mahakata, ungukolwa na mahakata kwa mbwani mkulunga! Mlima weni kuwela wandu wogha weni kuwela na whatu ngulunga zyeni kutyanga mbahali waweli wanaisa kukovekelana na unaisa wa mbwani hau, kwa lipindi lya lisaa limu hela uyalamisa kila kindu."

20 Uhekeleli wenga ungulama kundumba, kwaikiva gha uyalamisu gha mmbwani hau. Mhekeleli wandu wa Sapanga, wandumindumi na walota wa Sapanga! Sapanga kautosa mmbwani hau kwaikiva gha mighalu uyagholili kwa mwenga!

21 Hinu, mtumikila mmonga wa kundumba wa Sapanga mweni makakala akanyakula liganga likulunga handa lya kuhyaghila akalidangila mbahali akilonga, "Havi ndiwa mmbwani mkulunga Babeli utedangwa pahi kwa makakala wala utewoneka ng'ogha kangi." 22 Kummbwani hau kutehyoghanika ng'ogha wandu wakiyimba na wakikuwa ligombogombo na wakikuwa filimbi na wakikuwa lipembi lya limgambo, wala fundi yoyosi mweni uweso wa kughola vindu wala nyimbu zya wandu wa kuhyagha. 23 Kangi kutewela ng'ogha na mhana wa limbamba utelangasa, wala kutewela ng'ogha na lilowi lya mhambu gha bambu wa uposo na mdala wa uposo. Waghola biasala ghako wawelili wakulunga mlima wogha, na kwa uhawi ghako milima hyogha yabyodoswili.

24 Mmbwani hau unyokolilwi kwaikiva hamu upatikanili mwahi gha walota wa Sapanga, na mwahi gha wandu wa Sapanga na gha wandu wogha wakomilwi kumlimawogha, Ziwonekanili kumbwani hau.