1 Hinu, nikalola kundumba kuhyonu na mlima wogha mhyonu. Kundumba ila ya kwa mtumbulo na mlima wogha wa mtumbulo viwelile vihuka, na bahali hilahila ikahuka. 2 Nikalola mmbwani wa Sapanga, Yelusalemu hyonu yenikuwela mmbwani wa Sapanga, ukihuluka kuhuma kundumba kwa Sapanga. Uwelile uyandalwa maheli handa mdala wa uposo mweni kuvikwa malembu kwaikiva gha mngwana ghaki. 3 Hinu nikahyoghanila lilowi likulunga kuhuma kukikalilo kya kiinkosi likilonga, "Hinaa Sapanga atelikala paghati kwa weni, Sapanga atelikala pamonga na weni, watewela wandu ghaki, Sapanga mweni atewela na weni na mweni atewela Sapanga ghao." 4 Mweni ateyapyata masosi ghao hyogha, kwaikiva kuhwegha kutewoneka ng'ogha kangi, wala malumbililo, wala kililo, wala mahakilo, kwaikiva mighalu gha mtumbulo ipita kala.

5 Hinu, yula mweni kutama kunani gha kikalilo kya kiinkosi akalonga, Uloli ningughola hyogha mahyonu. Kangi akanilongela , "Uyandiki mghalu hau, kwaikiva milando hai ni gha kujumilika na gha chakaka!" 6 Akalongela kangi, "Yatimila! Nenga ni Alufa na Omega, Mtumbulo na Mwihu. Yula mweni kuwela na kuyumilila nitempegha masi gha ukomu anyweghi bila kuhipa chochosi, . 7 Yula mweni kusinda mighalu mihakata atepokela hagha hyogha, nenga nitewela Sapanga ghaki, na mweni atewela mwana ghangu. 8 Ila wandu weni kutila, weni kulema kunikwinila, wahakata, wakomaji, na waghola ngongola, na wahawi, na watundamila ming'omung'omu, na wahwangi wogha, nitewatagha kulihiwa lyeni kuyaka lyoto na baluti. Haki ni kihu kya ipili."

9 Hinu mmonga wa wala watumikila isaba wa kundumba wa Sapanga weni kuwela na yala mabakuli isaba yenikuwela yamema lung'ai gha mwihu akahika na kunilongela, "Uhiki! Na nenga nitekulangiha mdala wa uposo, ngumanisa mhumbu wa Mwanakondolo!" 10 Hinu, Mpumulo wa Sapanga akanilongosa mbaka kula kulitumbi likulungu na litali akanilangiha Yelusalemu mmbwani wa Sapanga ukihuluka kuhuma kundumba kwa Sapanga. 11 Uwelili uking'anyima kwa ung'anyimu weni kuhuma kwa Sapanga. Mng'anyimu ghaki uwelili handa wa liganga lya mapesa matangala lyeni kulandana na madini gha yasipi, yeni kuwoneka maha. 12 Kuwelili na likuta likulunga kuutindila mbwani na kyeni milyango mikulunga ikumi na ivili, na pawelili na watumikila ikumi na ivili wa kundumba wa Sapanga kukila mlyango. Kunani gha milyango hila kuwelile kuyandikwa mahina gha makabila ikumi na ivili gha Waizilaeli. 13 Kila upandi Kuwelile na milyango miitatu, mbandi gha kuhumila lijuwa kuwelili na milyango miitatu, na mbandi gha kaskazini kuwelili na milyango miitatu, na mbandi gha kusini kuwelili na milyango mitatu, na mbandi wa kuhongela lijuwa kuwelili na milyango miitatu. 14 Likuta lya mmbwani hau liwelili lichengwa kunani gha maganga ikumi na ivili gha kitamilo, na kunani gha kila liganga pawelile payandikwa imonga gha mahina gha wala wandumindumi ikumi na ivili wa Mwanakondolu. 15 Hinu yula mtumikila wa kundumba wa Sapanga mwenikuwela angulongela na nenga awelili na hyatu gha zahabu gha kupimila hau mmbwani, milyango ghaki na likuta lyaki. 16 Mmbwani hau uwelili ungulandana kila mbandi, utali ghaki ungulandana na lukingika ghaki. Mtumikila wa kundumba wa Sapanga akapima mmbwani hula kwa hyatu ghaki, utali na lupingika na kimo lyaki uwela handa ikilomita ielufu ivili na imia njechi. 17 Hinu akapima unene wa likuta kyaki hilahila, na kyeni kiwelile na imita isitini kwa kipimu kya kimundu kila mtumikila wa kundumba wa Sapanga awelile akikitumila. 18 Likuta haki kiwelile kichengwa kwa maganga makeli gha mapesa matangala yangukemwa yasipi, na mmbwani weni uwelile uchengwa kwa zahabu maha, yeni kung'anyima handa kiou. 19 Maganga gha kitamilo kya likuta kya mmbwani hau kiwelile kivikwa malembu gha ndambu wekaweka gha mapesa matangala. Liganga lya mtumbulo lya kitamilo liwelili ngeli, na lya ipili liwelile lya langi gha sambalau, lya itatu kalikedoni na lya injechi liwelili zumalidi, 20 lya mhanu liwelile salidoniki, na lya isita liwelile akiki, na lya isaba liwelile Kilisolito, na lya inane ni zabalajadi, na lya itisa manjanu, na lya ikumi kilisopulaso, na lya ikumi na imonga hiakinito, na lya ikumi na ivili ni amesisto. 21 Hilahila hila milyango mikulunga ikumi na ivili, iwelili ichengwa kwa lulu ikumi na ivili, na kila mlyango mmonga uchengwa kwa lulu imonga. Njila ngulunga gha mmbwani hau iwelili gha zahabu maheli yeni kung'anyima handa kiou.

22 Nenga niwonili ng'ogha Lighuta lya Sapanga kumbwani hau, kwaikiva Bambu Sapanga Mweni uwesa wogha na yula Mwanakondolu weni ndiwa Lighuta lya Sapanga kumbwani hau. 23 Mbwani hau ungupala ng'ogha mhana wa lijuwa wala mbalamwehi, kwaikiva ukulu wa Sapanga wenikuhuma kwa Sapanga unguulangasila mmbwani hau na limbamba lyaki ni yula Mwanakondolu. 24 Wandu wa milima hyogha watetyanga kumhana ghaki na wankosi wa kumlima wogha watayegha unaisa ghao kumbwani hau. 25 Milyango gha mmbwani hau itewopwa ng'ogha, kwaikiva mghati ghaki kutewela ng'ogha na uhiku. 26 Utundamilu na ukulu vya wandu wa milima hyogha viteyeghwa kumbwani hau. 27 Ila kwahela kindu chochosi kyeni kujumilwa ng'ogha na Sapanga kiteyingila hamu, wala mundu yeyosi mweni kughola mighalu gha kuhyomelesa au gha ululunganyi ateyingila ng'ogha hamu. Wateyingila hamu ni wala weka wenikuyandikwa kukihitabu kya ukomu kya Mwanakondolu.