1 Mmonga wa wala watumikila isaba wawelili na yala mabakuli isaba akahika akanilongela, "Uhiki, nitekulangiha yula mngongola vila atenyokolwa. Mweni kulikala kunani gha masi yatangala. 2 Wankosi wa mlima wogha waghola ngongola pamonga na mweni, na wandu wa mlima wogha walowela difwai gha ngongola ghaki."

3 Hinu Mpumulo wa Sapanga akanilongosa mbaka kulivagha. Haku nimuwonili mdala atamili kunani gha likokolo mkeli mweni awelili kayandikwa higha hyogha mahina gha kumlighu Sapanga. Likokolo hayu awelili na mitu isaba na pembi zyaki ikumi. 4 Hayu mdala awelili kavala nguu zya langi gha sambalau, na ngeli, akililemba kwa vindu vya zahabu, madini gha mapesa ngoo na lulu mmawoko ghaki awelili kakola kikombi kya zahabu kimemili mighalu gha kuhyomela na matendu mahakata gha kulangiha vila angughola ngongola. 5 Kweni kibhungi kyaki kya wusu ghaki kayandikwa lihina lya kuhigha, "Babeli mkulu, nyongo wa waghola ngongola na mighalu gha kuhyomela kumlima wogha." 6 Hinu nimuwonili yula mdala kalowela mwahi gha wandu wa Sapanga, na mwahi gha wandu wakomilwi kwaikiva gha kumtangasa Yesu.

Panimlolili mdala hayu, nilikangasili nesu. 7 Ila mtumikila wa kundumba wa Sapanga akanilongela, "kwa kyani ungulikangasa? Nenga nitekulongela kifisu kya mkokola hayu mweni mitu isaba na pembi zyaki ikumu na kifisu kya mdala hayu ampapili. 8 Hayu likokolo, mweni umuwonili, lipindi limonga awelili, ila hinaa kahova, na mweni anguliyandala kuhuma ila ateyalamiswa. Wandu wogha kumlima wogha mahina ghao yayandikwa ng'ogha kukihitabu kya ukomu kuhuma kulumbwa kwa mlima wogha watekangaswa kulola likokolo hayu mweni dahile awelili hinu akahova na hinaa atehumila kangi.

9 Mghalu hau ungupalwa luhala na malangu. Vila mitu isaba mweni yula mdala atamili kunani ghaki ni mitumbi isaba na wankosi isaba. 10 Na paghati gha wala wankosi isaba, wamhanu wahova kala, na mmonga akali akilongosa na yula ghangi yambila kahika ng'ogha, na patehika atelongosa lipindi lya mayaghani. 11 Hayu likokolo awelili mkomu haku kuhyetu ila hinaa kangulama ng'ogha kangi, mweni ni nkosi wainane. Ni paghati gha wala wankosi waisaba wamtumbulo, na mweni kanguyenda kuyalamiswa.

12 Na zila pembi ikumi usilolili ni wankosi ikumi wawelili wambila kupokela unkosi ila weni watepokela uweso wa kulongosa kwa lipindi lya lisaa limonga pamonga na yula likokolo. 13 Hagha wawela na mghalu mmonga, na weni watemlekela yula likokolo makakala ghao na ulongosi ghao. 14 Watetovana na Mwanakondulu, ila Mwanakondolu atewasinda kwaikiva mweni ni Bambu wa mabambu na mnkosi wa wakosi mweni atewela na pamonga na wandu ghaki awakemili, na wahaghulilwi ghaki, wala wayendelela kumkwinila."

15 Mtumikila wa kundumba wa Sapanga akanilongela kangi, "Yala masi uyalolili pala paatamili yula mghola ngongola, ni mapinga gha wandu wa kila mlima na ukolu na luga." 16 Zila pembi zyaki ikumi uzilolili, pamonga na hayu likokolo, watemhyomela hayu mghola ngongola, na watetola kila kindu na kumleka bila nguu, na watemlyegha liwondu lyaki na mihupa ihighalili na yeni iteyalamiswa kwa lyoto. 17 Sapanga mweni kawaghola watimisi lukani lyaki, kwa kujumila kumpegha yula likokolo uweso ghao wa kulongosa mbaka yala alongili Sapanga yahumili.

18 "Na yula mdala umulolili ndiwa hula mbwani mkulu weni kulongosa wankosi wa mlima wogha."