1 Hinu yula mtumikila wa Sapanga wa kundumba akanilangiha lweni lwa masi gha ukomu, masi ghaki yeni kung'anyima handa kiou yakihuma kweni kitamilo kya kinkosi kya Sapanga na Mwanakondolu. 2 "Lweni" halu lupitili paghati gha njila ngulunga gha hau mmbwani. Kwa kila upandi wa halu lweni kuwelile na libiki lya ukomu lyeni kulela matungula ndambu ikumi na ivili weka weka, na ungulela kila mwehi, na mahamba gha libiki hali ni mtela gha kuwalamisa wandu wa milima hyogha. 3 Kutewela ng'ogha na kulapilwa kokosi kangi.

Kitamilu kya kiinkosi kya Sapanga na kya Mwanakondolu kitewela kummbwani hau, na watumikila ghaki watemtumikila, 4 wateulola wusu ghaki, na lihina lyaki liteyandikwa kunani gha vibhungi vya wusu ghao. 5 Uhiku utewela ng'ogha kangi wala watepala ng'ogha mhana wa limbamba wala wa lijuwa, kwaikiva Bambu Sapanga atewapegha mhana na weni watelongosa machuwa hyogha bila mwihu.

6 Hinu yula mtumikila wa kundumba wa Sapanga akanilongela, "Milando hai ni gha kujumilika na gha chakaka, Bambu Sapanga, uwapegha walota mpumulo ghaki, amyeghili mtumikila ghaki wa kundumba kuwalangiha watumikila ghaki mighalu hila lasima ihumile njenji hinaa."

7 Yesu angulongela, "Ninguhika njenji, kana uhighili yula mweni kukola milando gha ulota yeni kuwela kukihitabu haki."

8 Nenga Yohana, ndiwa nilolile na kuhyoghanila mighalu hai, na paniyomola kuhyoghanila na kulola nikalitagha pahi gha kuulongolo gha maghulu gha hayu mtumikila wa kundumba wa Sapanga anilangusili mighalu hai nikapala kumyupa. 9 Ila mweni akanilongela, "Ukotoho kughola nagha! Nenga ni mtumikila myako pamonga na walongo ghako walota na wogha wenikuyayitikila malaghilo yenikuwela kukihitabu haki, wenga mumyupi Sapanga." 10 Kangi akanilongela, "Ukotoho kuhigha milando gha ulota yenikuwela kukihitabu haki kwaikiva lipindi lya kutimila kwaki liwela pabehi. 11 Mundu yeyosi mwenikughola mahakata na ayendeleli kughola mahakata, na yeyosi mwenikughola mighalu gha honi ayendeleli kughola na yeyosi mwenikughola mighalu yeni kujumilwa na Sapanga ayendeleli kughola, na yeyosi awelili mundu wa Sapanga na ayendeleli kuwela mundu wa Sapanga."

12 Yesu angulonga, "Uyughanili ninguhika njenji pamonga na hupo nitempegha kila mmonga kukovekelana na matendu ghaki." 13 "Nenga ni ALUFA na OMEGA, wamtumbulo na wa mwihu, nenga ndiwa mweni kutumbula mighalu na kuyayomola."

14 Wahighilwa wala weni kuwofula nguu zyau, ili wawesi kulekeselwa kulyegha litungula lya libiki lya ukomu na kulekeselwa kuyingila kummbwani hau kupitila milyango ghaki. 15 Ila wala wenikughola mighalu gha honi na wahawi na wangongola na weni kukoma na weni kuyupa ling'omung'omu na wogha wenikupala kulongela uhwangi wateyingila ng'ogha mghati gha mmbwani hau.

16 "Nenga, Yesu, nimyegha mtumikila ghangu wa kundumba awahighilisili mighalu hai kumapinga gha wandu weni kunikwinila. Nenga ni kiwelekwa kya ukolu wa Daudi, hila ndondwa gha yeni kung'anyima malawila!"

17 Mpumulo wa Sapanga na mdala wa uposu wa Mwanakondolu wangumkema Bambu wangulonga, "Uhiki!"

na kila mundu mweni kuhyoghanila hali na alongi, "Uhiki!"

Mweni kuwela na kuyumilila ahiki na kila mweni kupala, na atole masi gha ukomu bila mahipo.

18 Nenga Yohananinguwalemesa wandu wogha wenikuhyoghanila milando gha ulota gha kihitabu haki, mundu yeyosi pakayongesa kindu chochosi kumighalu hai Sapanga atemuyongesela matovu yenikuyandikwa kukihitabu haki. 19 Mundu yeyosi pakapungula chochosi kumilando gha ulota gha kihitabu haki Sapanga atemuhumisila mbandi ghaki kulila libiki lya ukomu na kuhula mmbwani wa Sapanga wenikuwela milando ghaki iyandikwa kukihitabu haki.

20 Hayu mweni kulongela mighalu hai angulonga, "Hina ninguhika njenji."

Na iweli nagha uhiki Bambu Yesu.

21 Ninguwayupilila mwenga wogha ili umaha wa Bambu Yesu uweli na mwenga. Hina.