1 Hinu nikalola Mwanakondolu kagholoka kunani gha litumbi Sayuni. Na mweni awelili pamonga na wandu ilaki imonga na ielufu ialobaini na njechi, na kunani gha kibhungi kya wuso gha wandu ghaki kuwelili kuyandikwa lihina lyaki na lihina lya Tati ghaki. 2 Nikahyoghanila lilowi kuhuma kundumba handa lilowi lya masi matangala yeni kuyenda kwa kuloposela, na handa mlindimu mkulu wa ladi, lilowi hali nilihyoghanilile liwelile handa lilowi lya ligombogombo vikuwilwi na wandu watangala. 3 Wawelili wanguyimba uyimbu mhyonu kuulongolo gha kitamilo kya kinkosi na kuulongolo gha wala viumbi wakomu wanjechi na wala wagogolo. Kwahela mundu awesili kulivula uyimbu hau, ila wandu wala ilaki imonga na ielufu ialobaini na njechi wala weni kukombolwa kumlima wogha ndiwa weni kuumanya. 4 Wandu hagha ndiwa wala wahighalile kundambu gha kujumilwa na Sapanga bila kuwonja na wadala. Weni wangumkovekela mwanakondolu kila paayendili. Hagha wakombolilwi kuhuma kwa wandu waghangi, wakagholwa litambiku lya mtumbulo kwa Sapanga na kwa Mwanakondolu. 5 Weni katu walongela ng'ogha uhwangi, wala wawelili ng'ogha na uhakata wowosi.

6 Hinu nikamlola mtumikila mghangi wa kundumba akijumba kunani, na mweni awelili na kihitabu kya Habali Maha gha machuwa hyogha bila mwihu na kuwatangasila wala wandu wogha wangulikala kumlima wogha, kwa kila mlima, na likabila, na luga, na ukolu. 7 Akalongela kwa lilowi likulunga, "Mtundamili Sapanga na mpeghi ukulu, kwaikiva lisaa lya Sapanga kuwatosa wandu wogha lihika kala. Mumyupi mweni alumbili kundumba na mlima wogha na bahali na uhimbuki wa masi."

8 Mtumikila waivili wa kundumba wa Sapanga akakovikela akilonga, "Uguwa! Uguwa Babeli mmbwani mkulu, kwaikiva ndiwa weni kuwalowelesa milima hyogha difwai likalipa lya ungongola ghaki."

9 Na mtumikila wa itatu wa kundumba wa Sapanga awakovekelili wala waivili akalonga kwa lilowi likulunga, "Handa mundu yoyosi atemyupa hayu likokolo na ling'omung'omu lyaki na kuvikwa kilangihi kyaki kukibungi kya wusu ghaki au mmawoko ghaki, 10 mweni hilahila atenywegha difwai gha lilaka lya Sapanga yeni kuhanganywa kukikombi kya lilaka lyaki Sapanga bila kuhanganywa na masi. Mundu hayu atehakilwa kwa lyoto lya madini gha baluti kuulongolo gha watumikila wa kundumba wa Sapanga na kuulongolo gha Mwanakondolu. 11 Lyohi lya lyoto lyeni kuwahakila lingukwela kunani machuwa hyogha bila mwihu. Wandu hagha weni kuliyupa hali likokolu na ling'omung'omu lyaki na kuvikwa kilangihi kya lihina lyaki, watepumlila ng'ogha pamuhi na uhiku."

12 Hinu, wangupalwa wandu wa Sapanga, wala weni kuyitikila malaghilo gha Sapanga na kumkwinila Yesu, waweli na ufumilifu.

13 Kuulongolo nikahyoghanila lilowi kuhuma kundumba, likilongela, "Uyandiki hali, kutumbula hinaa watehighilwa wandu wogha wenikuhova wakiwela wangumkwinila Bambu."

Na mweni Mpumulo wa Sapanga akalongela,"Hina watepumulila kuhuma kulung'ai lwau kwaikiva ghala ghamaha wayagholile yatewela pamonga na weni."

14 Nikalolesa, nikalola lihindu mbulete na kunani gha lihindu lila atamili mundu mweni kulandana na mwana wa mundu mweni likokoma lya zahabu kumutu ghaki na kukola mbopu kuliwoku lyaki. 15 Hinu mtumikila wa kundumba wa Sapanga mghangi akahuma Mlighuta lya Sapanga, na mweni akamkema kwa lilowi likulunga yula awelili katama kunani gha lila lihindu akilonga, "Utoli mbopu ukabeni kwaikiva lipindi lya mabeno lihika kala, kwaikiva mabeno gha kumlima wogha yakamala kala." 16 Yula mundu mweni kulikala kunani gha lihindu, akabena mabeno gha mlima wogha.

17 Hinu, mtumikila mghangi wa kundumba wa Sapanga akahuma Kulighuta lya Sapanga lya kundumba akiwela na mbopu kikalipa kya kubenela.

18 Kuulongolo mtumikila mghangi wa kundumba wa Sapanga mwenikuwela mgholokela wa lyoto, akahuka kukihanja, akamlongela kwa lilowi likulunga yula mtumikila mweni mbopu kikalipa, "Utoli mbopu lyako lyeni kuwela kikalipa na udumuli vikonyu vya sabibu kuhuma kulitawa kwaikiva sabibu zipia kala." 19 Hinu, mtumikila wa kundumba hayu akadumula kwa mbopu lyaki mlima wogha, akadumula sabibu sya mlima wogha, akazivika mghati gha kyombo kikulunga kya kukamulila sabibu, kyombu haki ni lilaka lya Sapanga. 20 Sabibu sikakamulwa iwelili panji na mmbwani, mwahi ukahululuka kuhuma mghati gha kila kyombu kya kukamulila ikawela handa mlweni mkulunga mbaka ikahika utali wa kilomita imia itatu, na utali kuyenda pahi uwelili imita imonga na inusu.