1 "Muyandikili mtumikila wa lipinga lya wandu weni kumkwinila Kilisito weni kuwela haku Salidi nagha,"

"Hagha ndiwa milandu ghaki Kilisito awelili na zila mpumulo isaba zya Sapanga na zila ndondwa isaba. Ninguyamanya matendu ghako, yiwa wandu wangulonga yiwa wenga ni mkomu ila uhova kala!" 2 Uyimuki! Uvigangamalisi vila vimayaghani vyamaha kihighalili kwa vila hata hagha yawela pabehi na kuhova. Kwaikiva, mbaka hinaa niwonile matendu yaikila ng'ogha vila Sapanga ghangu angupala. 3 Ukumbwike, ghala uyahyoghanila na kuvulwa na kukwinila, uyayitikili na kuleka sambi na kumghalambukila Sapanga, handa pamteghola ng'ogha hagha nitekuhikila bila wenga kumanya, na wala utemanya ng'ogha lisaa nitekuhikila. 4 Ila kuwela na wandu mayaghani kulipinga lya wandu weni kumkwinila Kilisito haku Salidi wandu weni kughola ng'ogha sambi. Weni wateyenda pamonga na nenga, wakiwela wavala nguu mbulete, kwaikiva ingupalwa waweli nagha. 5 Na wala watesinda atevaliswa nguu mbuleti handa weni, na nenga nitehumisa ng'ogha lihina lyaki kukihitabu kya ukomu ila nitemtangasa kuulongolo gha Tati ghangu na kuulongolo gha watumikila ghaki wa kundumba yiwa ni wanenga.

6 Yula mweni mapulukilo gha kuyughanila, na ahyoghanili ghala Mpumulo wa Sapanga anguwalongela mapinga gha wandu weni kumkwinila Kilisito.

7 "Muyandikili mtumikila wa lipinga lya wandu weni kumkwinila Kilisito weni kuwela haku Filadelifia nagha,"

"Hagha ndiwa angulonga mweni kawela mbulete pee na mchakaka, mwenikuwela niwela na funguu gha Daudi. Na kila angukiwoposola kwahela mweni kuwesa kukiwopa, na kila angukiwoposola kwahela mundu mweni kuwesa kukiwopa." 8 Ningumanya mighalu ghako hyogha! Hinaa, niwoposola mlyango kuulongolo ghako wenikuwela kwahela mundu mweni kuwesa kutata, ningumanya yiwa pamonga na yiwa uwela ng'ogha na makakala nesu, ila uliyitikila lilando lyangu wala ulikanila ng'ogha kuulongolo gha wandu. 9 Nitewaghola wala wandu wa lipinga lya Lihyukana, wandu weni kuilongela yiwa ni Wayahudi, uchakaka ni wahwangi. Nitewaghola wahiki kwa wenga na watekutundamila manung'una kuulongolo ghako, na wamanyi yiwa ningukupala. 10 Nenga nikulongela kuwela mfumilili, na wenga ukaniyitikila nenga, hinu nitekugholokela lipindi lya lung'ai palihika wandu wa mlima wogha ili kuwesa kuwayesa. 11 Ninguhika kwa wenga kwa kubwitukila! Ukoli nesu kila uwela nachu, ili pakotoho kuwela na mundu wa kukupokola hupo ghako gha kusinda. 12 Atesinda nitemghola aweli mghomba mu Lighuta lya Sapanga wa nenga, na atehuma ng'ogha hamu. Kangi niteyandika kunani ghao lihina lya Sapanga wanenga na lihina lya mbwani wa Sapanga wanenga, ingumanisa Yelusalemu hyonu, mbwani uvile utesuluka kuhuma kunani kundumba kwa Sapanga wanenga. Kangi niteyandika lihina lyangu lahyonu kunani ghao.

13 Mweni mapulikilo gha kuhyoghanila, hinu, na ayahyoghanile yala Mpumulo wa Sapanga anguwalongela mapinga gha wandu weni wamkwinila Kilisito.

14 "Muyandikili mtumikila wa lipinga lya wandu weni kumkwinila Kilisito weni kuwela haku lawodikia nagha,"

"Hagha ndiwa milandu ghaki mweni kukemwa Hina, anguilonga kwa uchakaka yala awonili na kuhyoghanila na uvile ni mchakaka. Hayu mweni kuwela mtumbulo kya viumbi vyogha avilumbili Sapanga." 15 Ninguyamanya matendu ghako hyogha. Ningumanya yiwa wenga uwela ng'ogha handa mahihimo wala ng'ogha makalipa. Mbaha ungaliwela handa mahihimo au makalipa. 16 Ila kwaikiva wenga kwa mhutuhutu ng'ogha mhihimo wala makalipa nenga nitekulukula. 17 Wenga ulongile, "Nenga ni naisa, nijivikila hindu ngoo, wala nipala ng'ogha kindu chochosi." Ila ungumanya ng'ogha yiwa wenga uwela ng'ogha na kindu na ungupalwa kuwonelwa luhungu na mkapuku na ungali mihu na kangi mwenekuwela ngelengi. 18 Kwa nagha ningukulongela uhemeli kuhuma kwa nenga zahabu yeni kuwofulwa kwa lyoto ili upati kuwela mnaisa, na nguu mbulete ili uvali na kuhumisa honi gha kukotoho kuwela na nguu, na uhemeli mtela wa mihu upakali kumihu ghako upati kulola kangi. 19 Nenga ndiwa mweni kuwakalipila na kuwanyokola wogha ninguwapala. Hinu uyangali kuleka sambi na kumhyukila Sapanga. 20 Uyughanili, Nenga ningugholoka na kukuwa mlyango na kukema. Mundu pakayughanila lilowi lyangu na kuwoposola mlyango, niteyingila mlighuta lyaki na kulyegha mulyo pamonga na mweni, na mweni atelyegha pamonga na nenga. 21 Msindi nitempegha fwasi kutama pamonga nanenga ku kitamilo kyangu kya kinkosi. Handa vila nenga nisindili nikatama pamonga na Tati ghangu kukitamilo kyaki lya kinkosi.

22 "Mweni awelili na mpulikilo lya kuyughanila, na ahyoghanile yala yawelili Mpumulo wa Sapanga anguwalongela wandu weni kumkwinila Kilisito."