1 Badili gha hagha nikawalola watumikila wa kundumba wa Sapanga wanjechi wagholoka mbandi njechi zya mlima wogha, wangukingama liyegha likotoho kuyenda mbandi zyogha njechi zya kumlimawogha au kubahali au kumibiki. 2 Hinu, nikamlola mtumikila mghangi wa kundumba wa Sapanga akikwela kunani kuhuma kula linguhumila lijuwa, hayu awelile kakola muuli wa Sapanga mweni ukomu akawakema kwa lilowi likulunga wala watumikila wanjechi wa kundumba wa Sapanga weni kulongelwa wayalamisi mlima na bahali akilonga, 3 "Mkotoho kuyalamisa mlima, wala bahali wala mibiki, mbaka tuyomoli kuwataya muuli watumikila wa Sapanga wa twenga kukibungi kya wuso." 4 Hinu, nikahyughanila uvalangi gha wala wavikilwi vilangihi hai, wandu laki imonga na ialobaini na njechi ielufu wa kabila zyogha zya Izilaeli. 5 Wandu wavikilwi muuli kuhuma likabila lya Yudasi wawelile ielufu ikumi na ivili, na kuhuma kulikabila lya Lubeni wawelile ielufu ikumi na ivili na kuhuma kulikabila lya Gadi wawelile ielufu ikumi na ivili. 6 Kuhuma kulikabila lya Asheli wawelile ielufu ikumi na ivili, kuhuma kulikabila lya Nafutali wawelile ielufu ikumi na ivili, kuhuma kulikabila lya Manase wawelile ielufu ikumi na ivili. 7 Kuhuma kulikabila lya Simioni, wawelili ielufu ikumi na ivili, na kuhuma likabila lya Lawi wawelili ielufu ikumi na ivili, na kuhuma likabila lya Isakali wawelili ielufu ikumi na ivili. 8 Kuhuma likabila lya Zebuloni wawelili ielufu ikumi na ivili, na kuhuma likabila lya Yosefu, wawelili ielufu ikumi na ivili, na kuhuma likabila lya Benjamini wawelili ielufu ikumi na ivili.

9 Hinu, nikalola pala kuulongolu ghangu lipinga likulunga nesu lya wandu liwesa ng'ogha kuvalangwa na mundu yeyosi, kuhuma kila mlima, na kila likabila, na kila ukolu, na kila luga, wagholoka kuulongolu gha kila kitamilo kya kinkosi na kuulongolu gha Mwanakondolu. Wawelili wavala nguu mbulete na wawela wakola miputila gha mitendi, 10 Wakatova lilowi wakilonga, "Ulokola wa twenga unguhuma kwa Sapanga wa twenga mweni kutama kukitamilo kya kinkosi, na kuhuma kwa Mwanakondolu" 11 Watumikila wogha wa kundumba wakagholoka kukitindila kitamilo kya kinkosi, wagogolo isilini na njechi na wala viumbi wakomu wanjechi. Wakaguwa kifulifuli kuulongolo gha kitamilo kya kinkosi na kumyupa Sapanga, 12 wakilonga, "Hina! Kuyinulwa, na ukulu, na luhala, na kushukwile, na utundamilu, na uweso na makakala viweli kwa Sapanga wa twenga, machuva hyogha bila mwihu! Hina!"

13 Hinu mmonga wa wala wagogolo waisilini na njechi akanikonya, "Ni ghani hagha weni kuvala nguu mbulete, na weni wahumili kugha?"

14 Nenga nikamyanga, "Mkulu nenga nimanya ng'ogha, wenga ungumanya ni akina ghani hagha." Namweni akanilongela,

"Hagha ni wala wahumili kulila lung'ahi likulunga, naweni waghululili nguu zyau kumwahi gha Mwanakondolu na kughola lihabiti zyao kuwela mbulete nesu," 15 Hagha unguwalola, "Kuulongolo gha kitamilo kya kinkosi kya Sapanga. Wangumtumikila Sapanga uhiku na pamuhi kulighuta lyaki na mweni mwenikulikala kukitamilo kya kinkosi atewagubika kwa kuwela naweni kwa vila kawela pamonga na weni na kuwagholokela. 16 Watewela ng'ogha na njala wala kuyumililwa kangi. Wala lijuwa wala kifukengi likalipa lya kuwalungusa, 17 kwaikiva Mwanakondolu mwenikuwela kukitamilo kya kinkosi atewela mhungaji wau, na mweni atewalongosa kuuhimbuki gha masi gha ukomu. Na Sapanga atepyate masosi ghao hyogha."