1 "Muyandikili mtumikila wa lipinga lya wandu weni kumkwinila Kilisito weni kuwela haku Efesu nagha,"

"Hai ndiwa milandu anguilongela yula mweni kuzikola zila ndondwa isaba kukuliwoku lyaki lya kuliyila na kutyanga paghati ghati gha vindu viisaba vya zahabu vya kuvikila limbamba." 2 Ningumanya matendu ghako hyogha, ningumanya kuyangala kwa wenga na ufumilifu ghako. Ningumanya yiwa unguwesa ng'ogha kuwafumilila wandu wahakata, na yiwa uwayesili wala weni kuilongela yiwa ni wandumindumi ila wawela nahang'ogha, na wenga ukamanya yiwa ni walongela uhwangi. 3 Wenga ni mfumilifu na uhakilwa kwaikiva gha nenga ila utenyukili ng'ogha. 4 Ila nikali kuwela na mghalu mmonga lyeni kunighasa kwa wenga, uleka kunipala handa vila ugholile haku mtumbulo. 5 Hinu, ukumbwiki pala ugholile sambi, ughalambuki na uleki mahakata ghako na ughola handa ugholile haku mtumbulo, kihyetu na kughola nagha nenga nitehika kuhumisa kindu kyako kya kuvikila limbamba. 6 Ila ningukusifila kunani gha mghalu mmonga, Wenga unguyahyomela ghala wanguyaghola Wanikolai handa vila nenga ninguwahyomela.

7 "Mweni mapulikilo gha kuhyoghanilila, na ahyoghanile ghala yangulongelwa na Mpumulo wa Sapanga kumapinga gha weni kumkwinila Kilisito!"

"Yula mweni kusinda nitempegha fwasi gha kulyegha matungula yeni kuhuma kulibiki lyeni ukomu uwelili kulitawa lya Sapanga."

8 "Muyandikili mtumikila wa lipinga lya wandu weni kumkwinila Kilisito weni kuwela haku Similina nagha."

"Hau ndiwa ujumbi wa yula wa mtumbula na wa mwihu, mwenikuwela nihovili na kuhinduka." 9 Ningumanya vila unguhakilika, ningumanya hilahila ukapuku ghako, ila wenga ni mnaisa, ningumanya vila wangukulonge maha ng'ogha wala wenikuikema ni Wayahudi ila ng'ogha Wayahudi wa chakaka bali weni ni lipinga lya Lihyukana. 10 Ukotoho kutila ghala mahakilo yatekukola. Ningukulongela hayu Lihyukana litewataya amonga gha mwenga mlighuta lya wawopwa ili kuwayesa na mwenga mtekolwa na lung'ai kwa lipindi lya machuwa ikumi. Uyendeleli kunikwinila na ujumili kuhova kwaikiva gha nenga, na nenga nitekupegha hupo gha ukomu.

11 Yula mweni mapulikilo gha kuhyoghanilila, hinu na ahyoghanili ghala Mpumulo anguyalongela mapinga gha wandu weni kumkwinila Kilisito!

"Yeyosi mweni kufumilila hai, atehakilwa ng'ogha na kihu kya ipili."

12 "Muyandikili mtumikila wa lipinga lya wandu weni kumkwinila Kilisito weni kuwela haku Peligamo nagha."

"Hau ndiwa ujumbi kuhuma kwa yula mweni lipanga lyeni ukalipa mbandi zyogha ivili." 13 Ningukumanya kula ungulikala, ndiwa kweni ulongosi wa Lihyukana. Ningumanya yiwa wenga ungunikwinila, wenga ukanila ng'ogha kulonga yiwa ungunikwinila nenga. Hata lipindi lila Antipasi mtumikila ghangu paatolilwi na kukomwa kumbwani mkulu wa nenga uvile Lihyukana angulongosa ila mkanila ng'ogha kulonga mngunikwinila. 14 Pamonga na hyogha, niwela na mighalu mayaghani kwa wenga. Amonga gha mwenga mngukovekela mavulo gha Balaamu, yula amlongelili Balaki awavuli wandu wa Waizilaeli wagholi sambi kwa kulyeghi mulyo iyeghilwi kwa ming'omung'omu handa litambiku na kughola ngongola. 15 Hilahila, paghati gha mwenga kuwela na wandu weni kukovekela mavulo gha Wanikolai. 16 Ila, ulonge sambi syako na kuleka. Paulema kuleka, nitehika kwa wenga njenji na kutovana na wandu hagha kwa lipanga lihuma pamlomu ghangu.

17 "Yula mweni mapulukilo gha kuhyoghanila, hinu na ahyoghanili ghala Mpumulo anguwalongela mapinga gha weni kumkwinila Kilisito!"

"Yula mweni kusinda nitempegha mulyo kyeni kukemwa mana kyeni kuhighwa. Nitempegha hilahila liganga mbulete lyeni kuyandikwa lihina lyonu na hali kwahela mundu kalimanya ila yula mweni kulipokela."

18 "Muyandikili mtumikila wa lipinga lya wandu weni kumkwinila Kilisito weni kuwela haku Siatila nagha."

"Hau ndiwa ujumbi wa Mwana wa Sapanga, hayu mweni kunganyima mihu handa lyoto, na lwayo ghaki handa shaba ikeyilwi nesu." 19 Ningumanya matendu ghako na upalu ghako, na kukwinila ghako, na utumikila ghako na ufumilifu ghako. Ningumanya yiwa hinaa ungughola maha kupiti kula mtumbulo. 20 Ila, niwela na mghalu mmonga kwa wenga. Wenga ungumfumilila yula mdala wangumkema Yezebeli mwenikuikema mlota wa Sapanga, mwenikuvula na kubyodosa watumikila wa nenga wagholi ngongola na kulyegha mulyo iyeghwa litambiku kwa ming'omung'omu. 21 Nikampegha lipindi lya kuleka kughola mahakata, ila kalema kuleka kughola ngongola ghaki. 22 Hyoghanile hinaa nitempegha uvina mkulunga, weni utemghola asindwi kutandamka kukindanda, kangi niteyegha mahakilo makulungwa kwa wala weni kughola ngongola pamonga na mweni handa walema kuleka matendu ghao mahakata. 23 Kangi nitewakoma kwa uvina mhakata wala wandu weni kukovekela mavulo ghaki, ili mapinga hyogha gha wandu weni kumkwinila Kilisito yatemanya yiwa nenga ndiwa mweni kulolesa mioyu na mawachilo gha kila mundu, na nenga nitemlamula kila mundu kukovekelana na vila kaghola.

24 "Ila mwenga waghangi wenikuwela haku Siatila weni kukovekela ng'ogha mavulo ghaki Yezebeli na mlivula ng'ogha kila wangukimanya wavulwa ghaki kyeni kukemwa, ‘Mighalu gha mghati nesu gha Lihyukana’ ninguwalongela yiwa nitewapegha ng'ogha malaghilo ghangi matopeu muyakovikeli." 25 Ila muyendeleli kuyitikila ujumbi wa nenga hula muwela nau. Muyendeleli kunikwinila mbaka panitehika. 26 Mundu yula mweni kusinda na kughola ghala Sapanga anguyapala mbaka mwihu, nitempegha ulongosi kwa wandu wa milima hyogha. 27 Atewalongosa kwa makakala kwa kukovekela malaghilo, na wala watekovekela ng'ogha atawametula metula handa vimbundi. 28 Nenga hilahila nipokela kulongosa haku kuhuma kwa Tati. Kangi nitempegha mundu hayu ndondwa gha malawila.

29 "Mweni mapulikilo gha kuhyughanilila, hinu ahyoghanile ghala Mpumulo wa Sapanga anguwalongela mapinga yeni kumkwinila Kilisito!"