1 Waghanja ghangu, hai ni lihamba gha ivili nivile ninguwayandikila. Kulihamba hasi ivili ninguyesa kuhindula mawachilo maha muluhala gha mwenga kwa kuwakumbwisi muweli na mawachilo ghala yangumuhekelesa Sapanga. 2 Ningupala mwenga mkumbwiki milandu ilongilwi dahile na walota wa Sapanga wa dahile na lila lilaghilo lya Bambu na mulokola mpeghilwi na wandumindumi wa mwenga. 3 Pambila gha hyogha, mmanyi yiwa ku machuwa gha mwihu watehika wandu wavile wangulongoswa na ndyangilo zyao wenibaha na lumatamata na watewapughanya mwenga. 4 Na kulonga, "Alaghilili yiwa atehika hinaa, kakogha? Mighalu ni yilayila kuhumila mambuyi wa twenga pawahweghili kila kindu kiyendelela handa kiwelili kuhuma mtumbulo wa kulumbwa mlima wogha." 5 Ila weni wangulisiisa kwa lukani uchakaka hau yiwa Sapanga alongili, na kundumba na mlima wogha viwumbilwi. Sapanga alumbili mlima wogha kuhuma mumasi na kwa kutumila masi, 6 kupitila kwa masi hagha mlima wogha ukayalamiswa. 7 Kangi kwa lilando halihali kundumba na mlima wogha vivikwa ngoko kwaikiva gha lyoto, kuvikwa maha mbaka lichuwa lila lya ulamulo na gha kuyalamiswa kwa wandu wala wamtundamila ng'ogha Sapanga.

8 Ila waghanja ghangu, mkotoho kuisemwa lilando hali, yiwa kwa Bambu, lichuwa limonga lilinganila na machuva ielufu na machuva ielufu yangulinganila na lichuwa limonga. 9 Bambu angutimila lilaghano lyaki kwa lipindi lya chakaka, ng'ogha handa wandu waghangi wanguliwachila yiwa angukawila. Mweni anguwafumilila mwenga kwaikiva kapala ng'ogha hata mmonga wa mwenga ayalamiki ila angupala kila mmonga wa mwenga aleki sambi.

10 Ila lichuwa lya Bambu litehika handa mwihi. Ndiwa kundumba zyogha zitehuka kwa visindu vikulu na viumbi vyaki vyogha viteyalamiswa kwa lyoto na mlima wogha pamonga na vindu vyaki vyogha viteyalamiswa kwa lyoto. 11 Hinu kwaikiva vindu vyogha vitekolonganyika handa hagha, ghuli mwenga, mngupalwa kuvile wandu wa ngalilu niki? Mngupalwa kulikala kwaikiva gha Sapanga na kulikala kwa kumtundamila Sapanga, 12 mukilindila lichuwa lila lya Sapanga na kupala ihiki kwa kuloposela. Lichuwa hali ndumba zyogha zitelunguswa kwa lyoto na kuyalamiswa, na viumbi vyaki vyogha vya dahile viteyeyuswa kwa lyotu. 13 Handa alaghilili, tunguilindila ndumba hyonu na mlima wogha hyonu uvile wandu wamhekelesa Sapanga hela wangulikala.

14 Kwa hagha waghanja ghangu, mkiva mngulilindila lichuwa lila, myangalayi muwesi kuwela pekesu kuulongolo gha Sapanga, na mlikali na mweni kwa kukotoho kutovana kuulongolo gha Sapanga. 15 Mngupalwa kulola ufumilifu wa Bambu yiwa ni fwasi ingutughola tulokoki, handa Paulo mlongo wa twenga mpalwa vila kawayandikila kwa kutumila luhala apeghilwi na Sapanga, 16 handa ailongile ku lihamba zyaki zyogha. Mighalu mighangi kulihamba hazi ni ikamala kumanya mighalu hai wandyungi na wala wandu wa kuyumbilayumbila wangubyodosa handa vila wangubyodosa mayandiko maghangi makwilikihi. Hinu wanguyambusa mayalamiso ghao wenibaha.

17 Hinu mwenga wapalwa wa nenga, muimanya kala mighalu hagha, muliloli kwa umaha lukani mkotoho kubyodoswa na mahakata gha wandu wakovekela ng'ogha lilaghililo na kusindwa kugholoka kwa ngangamalu kuukwinila. 18 Ila muyendileli kukula ku ulungwana na kwa kummanya Bambu wa twenga na mlokola Yesu kilisito. Kwa mweni kuvile na ukwilikihi hinaa na hata machuwa yayendelela. Yinaa.