1 lihamba hai inguhuma kwa nenga Simoni petelo, mtumikila na mndumindumi wa Yesu kilisito,

ninguwayandikila mwenga kupitila kwa kupegha kwa kukotoho kubhaghula kwaki Sapanga wa twenga na mlokola Yesu Kilisito mpokela ukwinila hulahula gha galama ngulunga hila tuipokela na twenga.

2 Ninguwatakila manemu na ukwinila ngeju kwa kummanya Sapanga na Yesu Bambu wa twenga.

3 Kwa uweso ghaki Sapanga katupegha kila kindu tukipalwa ku ngalilu gha twenga ili tulikali ngalilu gha kumuhekelesa mweni, kwa kummamya mweni atukemili kwa ukulu ghaki na ulungwana ghaki. 4 Kwaikiva gha nagha, atupeghili laghilo ngulu na gha galama zila atulaghilili. Ili kupitila malaghilo hagha tulikali kwa kumkovekela Sapanga na kuhuka kuubyodogha hula uyegha lumatamata lwa maha ng'ogha lwa mumlimawogha. 5 Kwaikiva nagha, myangalayi kuukwinila wa mwenga muyongesi ulungwana, na kuulungwana muyongesi kujivula, 6 na kwa kujivula muyongesi kujilongosa mweni, na kukujilongosa muyongesi kufumilila, na kukufumilila kwa mwenga myongesi kumtundamila Sapanga, 7 na kukumtundamila Sapanga muyongesi upalo wa ulongo, na kuupalo wa ulongo muyongesi upalo. 8 Mighalu hai hyogha paiwela kwa mwenga kwa utangala mtewela ng'ogha wapweli na mteleka ng'ogha kughola mighalu maha kuhabali gha kummanya Bambu wa twenga Yesu Kilisito. 9 Ila mundu yoyosi avile ng'ogha na hagha mundu hayu kawesa ng'ogha kulola kutali na ni angali kulola. Kaisemwa vila kalekeselwa sambi syaki haku dahile.

10 Kwaikiva gha nagha, walongu ghangu, myangalayi kuhighilisa kukemwa mwenga na kuhaghuliwa kwa mwenga kwaikiva pamghola nagha mteguwa ng'ogha katu, 11 na mtepokelwa kwa umaha muyingili ku Unkosi wa machuwa yayendelela wa Bambu na mlokola wa twenga Yesu kilisito.

12 Kwa nagha niteyendelela kuwakumbusa mighalu hagha machuwa hyogha, hata ikawela mngumanya na mvile wagangamala kuuchakaka mlivulili. 13 Nenga ningulola ni maha kuwakumbusa mighalu hagha lipindi nambila kulama, 14 Kwaikiva ningumanya yiwa lipindi lyangu lya kuhwegha lya pabehi handa Bambu anilongilile lipalalipala. 15 Niteyangala nesu kuwapatila njila gha kuwesa kukumbwike mighalu hagha, machuwa hyogha hata badili gha kuhwegha kwa nenga.

16 Patuwamanyisa ukulu wa Bambu wa twenga Yesu Kilisito tutumila ng'ogha luhumu waliundila kwa ukalamuka ila tuulolile ukwilikihi ghaki kwa mihu gha twenga twaweni. 17 Kwaikiva apokelili utundamilu na ukwilikihi palihuma lilowi kuhuma kwa mweni yula avile mkwilikihi na mkulu, paalongili, "Hayu ndiwa mwana ghangu mpalwa nipalilwi na mweni." 18 Twenga wenibaha tuhyoghanilili lilowi kuhuma kundumba patuwelili pamonga na mweni kunani gha litumbi lya Sapanga.

19 Kangi ujumbi wa walota ungutuhighilisila mghalu hau na mwenga mteghola maha ikiva mngaliuyughanila nesu, kwaikiva ni handa mlangaso ungung'ala kulwisa, mbaka lichuwa lila pakuchia na ndondwa gha malawila ing'ali kumioyu gha mwenga. 20 Pamonga na hagha hyogha mngupalwa mmanyi yiwa kwahela ulota ku Mayandiko gha Sapanga uhika kwa kughalambulwa handa aipalile mlota mweni, 21 kwaikiva kwahela ulota wowosi uyeghilwi kwa mapalo gha kimundu, ila wandu walongili habali zya Sapanga handa walongosilwi na Mpumulo wa Sapanga.