1 Ninguwaluwa nesu wagogolo wavile haku kwa mwenga nenga nivile mgogolu muyenu, na nilolili kwa mihu ghala mahakilo gha Kilisito na ni mmonga wa wala watewela kuukwilikihi hula utegubutuliwa kuulongolo. Hinu ninguwaluwa nesu, 2 mlihungi lila lipinga lya wandu wa Sapanga mpeghilwi, mlitumikili maha hata ng'ogha kwa kuhukumulwa, ila kwa kupala mwaweni handa angupala Sapanga. Mgholi lihengu hali wala ng'ogha kwa kupala mapesa, ila kwaikiva mvile na luhujulu lwa kutumikila. 3 Mkotoho kuwagholokela kwa makakala hagha wavikwa pahi gha ugholokela wa mwenga, ila mwenga muweli mlandano wa lipinga hali lya Sapanga. 4 Mweni mhunga mkulu pakahighiliswa mwenga mtepokela hupo lya ukwilikihi hila iyaghamika ng'ogha,

5 hilahila na mwenga wahongolo mngupalwa kujivika pahi gha ulongosi wa wagogolo wa mwenga. Mwenga wogha mngupalwa kuwela na kunyenyekelana, kwaikiva Mayandiko gha Sapanga yangulonga, "Sapanga hukingama na wandu weni likwinakwina, ila huwapegha highili wandu wala wangutundamila." 6 Hinu, mnyenyekeli pahi gha Sapanga yula avile na makakala nesu, ili awayinuli kwa lipindi lyaki. 7 Mumpapisi mweni maghaso gha mwenga hyogha, kwaikiva mweni huwavika maha mwenga.

8 Mlikali mihu lipindi lyogha, kwaikiva mhakata wa mwenga, Lihyukana, angutindila tindila handa himba angulunguluma akihakula mundu amlakatuli. 9 Muweli mgangamala kuukwinila na mumkingami hayu, mkiva mmanya yiwa walongu wa mwenga kumlimawogha wanguhakilwa na maghaso handa hagha. 10 Ila mwenga pamhakilwa kala kwa lipindi mayaghani, Sapanga wa manemu hyogha yula awakemili kuyingila kuukwilikihi ghaki wa machuwa yayendelela mghati gha Kilisito, mweni baha atewachenga kwa uhyonu, atewahuyisa hyonu, atewapegha makakala na kuwagangamalisa. 11 Uwesa unamweni baha machuwa yayendelela na yayendelela. Yinaa.

12 Silivano kanitanga nenga kuyandika hai lihamba hupi, mlongu yula ningummanya na kumkwinila. Ningupala kuwapegha moyu na kuwalongela yiwa mghalu hau ni manemu gha Sapanga gha chakaka. Mgangamali kumanemu hagha.

13 Lipinga lya wandu wamkwinila Kilisito wavile baha Babeli, lihaghulilwa pamonga na mwenga wanguwajambusa. Hilahila Maliku awela handa mwana ghangu anguwajambusa. 14 Mlijambusi kwa kukamulana mawoko handa upalu wa Kilisito.

Ninguwatakila mlikali kukotoho kutovana mwenga mvile wa Kilisito.