1 Hilahila mwenga wadala, muwatundamili walumi wa mwenga, ili ikiva kuvile na wandu wakwinila ng'ogha lilando lya Sapanga wawesi kukwinila kwa kulola ndyangilo gha mwenga hata ikiva muwalongela ng'ogha lilando, 2 kwaikiva watelola vila ndyangilu gha mwenga handa wandu wahaghulwa kwaikiva gha Sapanga na weni kutundamila. 3 Kulilemba kwa mwenga kukotoho kuwela kwa panji hela, handa vila kuluka mitindu wekaweka gha hwila, kuvalila malembo wahongolili kwa zahabu na kuvalila nguu zyeni malembo, 4 ila kulilemba kwa mwenga kuweli mghati gha moyu, hula uwesa ng'ogha kusisila au hula ukologhanyika ng'ogha wa mpumulo gha nyalinyali na kuponga ivile gha kutundamila nesu kuulongolo gha Sapanga. 5 Kwaikiva ndiwa wailembwili wadala wa dahile wala wahaghulilwi kwaikiva gha Sapanga hagha wavikili litumaini kwa Sapanga kangi wawelili wakiwatundamila walumi ghao. 6 Kwa mlandano Sala amtundamilili Abulahamu, akamkema bambu. Mwenga muwela wana wa Sala ikiva mteghola ghamaha kwa kukotoho kutila vitisu vyovyogha.

7 Havihavi na mwenga walumi mlikali na wadala wa mwenga kwa luhala na mwenga muwapeghi utundamilu mkimanya yiwa weni ni wandu wapweli na handa walihi pamonga na mwenga kuhupo gha ukomu mgholi nagha ili Sapanga awapeghi kukotoho kuwela na chochosi kya kukingama mayupo gha mwenga.

8 Mghalu wa mwihu ni hau, mngupalwa mwenga wogha mlikali kwa kuyoghanilana, na mlolelani luhungu, na mngupalwa mjipali kiulongu, na muweli walungwana na mnyenyikelani. 9 Mkotoho kuwahuyisila wandu uhakata kwa uhakata, au lilighu kwa lilighu, ila muwahighili, kwaikiva mwenga mkemilwi na Sapanga ili mpati kulihi highili. 10 Handa yangulonga Mayandiko gha Sapanga,

"Mweni kupala kulama,

na kulola machuwa ghatangala gha maheli,

ni lasima ajikanisi lulimi lwaki likotoho kulonga mahakata,

na milomo ghaki ileki kulonga uhwangi."

11 Lasima akotoho kughola uhakata agholi gha maheli,

lasima ahaki kulikala kwa kukotoho kulitova na kughola kulama haku kukotoho kuhuka. 12 Kwaikiva Bambu Sapanga huwalola kwa umaha wala walungwana

na kuwayughanila mayupo ghao.

Ila anguwapingika wandu waghola mahakata.

13 Ghani atewesa kuwahakili mwenga ikiva mnguyangala kukughola ghamaha? 14 Ila mhighilwa hata pamhakilwa kwa kughola maha. Mkotoho kutila mighalu ghao hilahila mkotoho kuwela na holu. 15 Ila mumtundamili Kilisito handa Bambu mumioyu gha mwenga. Mliyandali machuwa hyogha kumyanga kila mundu yula anguwakonya milandu gha litumaini lya mghati mwa mwenga Ila kwa unyalinyali na utundamilu, 16 ila mgholi nagha kwa unyalinyali na utundamilu. Muweli na lukani lwa maha pamlighwa, ili wala wangulonga uhakata kwaikiva gha ngalilu gha mwenga handa wakilisito, waloli honi. 17 Hinu ni mbaha kuhakilwa kwaikiva gha kughola ghamaha, handa Sapanga aipalile, kupiti kuhakilwa kwaikiva gha kughola uhakata. 18 Kwaikiva Kilisito ahovili lihanja limonga weka kwaikiva gha wogha, avile ng'ogha na sambi kwaikiva gha wala weni sambi, ili awayeghi mwenga kwa Sapanga. Akomilwi kihigha ila akagholwa mkomu kiupumulo, 19 na kwa njila gha mpumulo ayendili kusitangasila sila mpumulo ziwelili mkihungo. 20 Hagha ndiwa wandu wala walemili kumkwinila Sapanga pakawalindila kwa ufumilifu lipindi Nuhu paawelili akighola lisafina. Mghati mwa kyombu kila kuwelili na wandu mayaghani hela, imaanisa ni wainane hela, ndiwa walokolilwi kumasi, 21 yala masi yavile handa mlandano wa ubatisu hula unguwalokola mwenga hinaa. Ng'ogha kwaikiva gha kuhumisa ndaka kuhigha, ila ni lilaghano kwa Sapanga lingugholeka kulukani lwa maha. Ubatisu hau ndiwa unguwalokola mwenga kupitila uhinduki wa Yesu Kilisito, 22 yula ayendili kundumba na hinaa kalikala mbandi gha liwoko lya kuliyila gha Sapanga, na watumikila wa kundumba wa Sapanga na wakulu na weni makakala wakiva pahi ghaki.