1 Hinu, mleki uhakata wogha; uhwangi na mbindingu na wifu na kumlongelela mahakata mundu ghangi. 2 Na muweli handa wanachali mpali maweli gha chakaka gha kimpumulo ili muwesi kukula kuulokola, 3 kwaikiva hinaa mwenga mmanya yiwa Bambu ni mlungwana.

4 Hinu muhiki kwa mweni yula avile liganga lyeni ukomu lilemilwi na wandu ila Sapanga kalihaghula na ni lya kutundamilwa kwa mweni, 5 Mwenga hilahila ni handa maganga yeni ukomu mchengwa na kuwela lighuta lya kiupumulo ili muweli watambika wahaghulwa kwaikiva gha Sapanga, myeghi matambiko gha kimpumulo yavile yangujumilwa na Sapanga kwa njila gha Yesu Kilisito. 6 Kwaikiva Mayandiko yangulonga,

"Yoghanila! Ninguvika liganga haku Sayuni,

liganga lya kikalilu, lihaghulilwi na lya kutundamilwa.

Mundu yula atemkwinila hayu atepughanyika ng'ogha."

7 Kwa mwenga mngukwinila, liganga hali ni lya mapesa ngulu, ila kwa wala wakwinila ng'ogha,

"Liganga walilemili wachengi,

hinaa liwela liganga likulunga lya kitamilo."

8 Kangi Mayandiko yangulonga, " Liganga hali linguwaghola wandu walikwali, mghomba wa kuwaguwisa wandu." Wandu wangulikwala kwaikiva wakwinila ng'ogha hula ujumbi, na ndiwa wayandalilwa kuhuma mtumbulo. 9 IIa mwenga ni ukolu uhaghulilwi, watambika wa lighuta lya unkosi, mlima mkwilikihi, wandu ghaki Sapanga mwenibaha, mhaghulilwi kutangasa matendu maheli gha yula awakemili mhuki kulwiha, akawayingisa kumhana ghaki wa kukangasa. 10 Lipindi limonga mwenga muwelili ng'ogha wandu wa Sapanga, hinaa mwenga ni wandu ghaki, lipindi limonga kawawonela ng'ogha luhungu Sapanga. Hinaa mpokela luhungu lwa Sapanga.

11 Waghanja ghangu, ninguwalongela nesu mwenga mkiva handa wahenja na wandu wakutyanga mumlimawogha hau! mleki lumatamata lwa kihigha lukiva lungukingamana na mpumulo. 12 Muweli na matendu maheli ulongulu gha wandu wala wammanya ng'ogha Sapanga, ili hata pawatepala kuwabaisila yiwa mngughola mahakata watelola matendu ghamwenga ghamaha na wamkwilikihi Sapanga. 13 Hinu, mumtundamili kila kilongosi avikilwi na wandu, hai iweli kwa nkosi avile kilongosi mkulu, 14 au vilongosi wavile kawahaghula. ili kuwanyokola wala wahakata na kuwajumila wala wagholili mighalu gha ulungwana. 15 Kwaikiva ni mapalu gha Sapanga, yiwa kwa kughola mighalu ghamaha mnyamalisi milando gha kisiisii gha wandu wangali mahala, 16 Mlikali handa wandu pekesu, ila mkotoho kutumila upekesu wa mwenga kuhigha mighalu gha uhakata, ila mulikali handa watumikila wa Sapanga. 17 Muwatundamili wandu wogha, muwapali walongu wa mwenga wala wamkwinila Sapanga, mumtundamili Sapanga, mutundamilili nkosi.

18 Mwenga wahusutu, muwatundamili wakulu wa mwenga kwa utundamililu wogha, ng'ogha wala wakulu wawelili walungwana na wanyalinyali wekaghao, hata wala wawela wakalipa. 19 Sapanga anguhekelela ikiva mngufumilila mang'eng'eleko gha mahakili mpalwa ng'ogha kuyapokela kwaikiva mngumanya mapalo gha Sapanga. 20 Kwaikiva mtepokela hupo liki, pamfumilila mkitovwa kwaikiva gha mahakata? Ila ikiva mungufumilila mahakili hata pamghola ghamaha, Sapanga atewahighila kwaikiva gha nagha. 21 Hagha ndiwa mkemililwi, kwaikiva Kilisito mweni ahakilwi kwaikiva gha twenga, akawalekela mlandanu, hinu mgholi handa aigholile mweni. 22 Mweni kaghola ng'ogha sambi, hata mlomo ghaki ulongile ng'ogha uhwangi. 23 Pakalighwa mweni Kawayanga ng'ogha kwa kuwawuyisila lilighu, pawamhakilili mweni kawaghola ng'ogha watili, ila avikili litumaini lyaki kwa Sapanga, yula avile ni mlamula kanguwesa kulamula maha kwa wogha. 24 Mweni atolili sambi sya twenga muhigha ghaki mnani gha lipingika, ili tuhovi kwaikiva gha sambi, na tulikali kwa mighalu imhekelesa Sapanga. Kwa vilonda vyaki mwenga mlamiswa. 25 Mwenga muwelili handa kondolu wayaghamila, ila hinaa mumhuyila mhungaji na mgholokela wa mipumulo gha mwenga.