1 lihamba hai ni kuhuma kwa nenga Petelo, mndumindumi wa Yesu Kilisito, ninguwayandikila mwenga

wahaghulwa wa Sapanga, mvile mlandala na mtyelembukila haku na mngulikala handa wahenja ku Ponto na Galatia, na Kapadokia na Asia na Bisinia. 2 Tati Sapanga awahaghulili mwenga kwaikiva gha lukani lwaki na awamanyili kuhuma dahile, na mgholwa kuwela wahaghulwa kwaikiva gha Sapanga kwa Mpumulo ghaki, ili mpati kumkwinila Yesu Kilisito na Kughululwa kwa mwahi ghaki.

Ninguwatakila ulungwana na kulikala kwa kuponga.

3 Ahighilwe Sapanga na Tati wa Bambu wa twenga Yesu kilisito! kwa luhungu lwaki lukulu akatughola tuwelekwi kangi ku uhinduki wa Yesu kuhuma kwa wahovili. Katupegha litumaini lyeni ukomu, 4 hinu tungulindila kulihi yala yavile Sapanga katuvikila wandu ghaki. Sapanga katuvikila highili hasi kundumba zivile ziwesa ng'ogha kuwola au kukologhanyika au kusisila. 5 Mighalu hai ni kwaikiva gha mwenga ivile kwa njila gha ukwinila mngugholokelwa na makakala gha Sapanga kwaikiva gha ulokola hula uyandalwa kala kuhighiliswa lipindi lya mwihu.

6 Mhekeleli nesu kwaikiva gha mghalu hau, pamonga na yiwa hinaa mngung'ung'uliswa kwa lipindi mayaghani kwaikiva gha mayesu wekaweka. 7 Mayesu hagha yawahikila ili kuhighilisa ukwinila wa mwenga ivile ghamaha kupiti zahabu, pamonga na kuyeswa kulyoto ili iwoneki yiwa ghamaha hata ikawela ingupela. Ili ukwinila wa mwenga uyeghi umaheli wa mwenga na ukwilikihi na utundamilu lipindi Yesu Kilisito paategubutulilwa. 8 Mwenga mumlolili ng'ogha ila mngumpala na mngumkwinila, pamonga na yiwa mumlola ng'ogha hinaa. Nagha, mnguhekelela kwa kiheku kilongeleka ng'ogha kivile na ukwilikihi, 9 kwaikiva mngupokela ulokola wa mpumulo wa mwenga hila ni lukani lwa ukwinila wa mwenga.

10 Kwa habali gha ulokola hau wala walota wa Sapanga wahakulili kwa kuyangala na kwa kulolesa kwa umaha wailongile kwa habali gha manemu yavile yangaliwahikila mwenga. 11 Wayesili kumanya ni lipindi ligha na mahala kugha ivile Mpumulo wa Kilisito yula awelili mghati mwa weni alangilili, pakalangiha yala mahakilo gha Kilisito yatehika na ukwilikihi hula uvile ungalihika kuulongolo. 12 Sapanga awagubutulili wala walota wa Sapanga yiwa wajitumikila ng'ogha weni ila wanguwatumikila mwenga pawalongili mighalu hila ivile hinaa yatangaswa kwa mwenga na wala wawatangasila mwenga Habali Maha kwa uwesa wa Mpumulo wa Sapanga yula ayeghilwi na Sapanga kuhuma kundumba. Hata watumikila wa kundumba kwa Sapanga wawelili wangupala kumanya mighalu hai.

13 Kwa nagha, myandali mawachilo gha mwenga kwa lihengu na mlikali kutali na lumatamata lula lumhekelesa ng'ogha Sapanga na mviki litumaini lya mwenga wogha kumanemu ghala mteyapokela lipindi Yesu Kilisito paatehighiliswa. 14 Muweli handa wana weni utundamilu, mkotoho kujumila kukovekela kangi lumatamata luhakata lula mulukolili pamuwela muumanya ng'ogha uchakaka wa Sapanga, 15 ila mngupalwa kuwela wahaghulwa kwaikiva gha Sapanga ku ndyangilu hyogha, handa vila yula awakemili kawela. 16 Kwaikiva iyandikwa, "Muweli wahaghulwa kwaikiva gha Sapanga handa vila nenga niwela."

17 Sapanga yula mwenga mungumkema Tati pamumyupa, ndiwa yula kangulamula wandu wogha kulandana na matendu ghao bila kubhaghula. Kwa nagha mumtundamili nesu Sapanga kwa lipindi hali livile mngutama hamu kumlimawogha handa wahenja. 18 Na mwenga mngumanya yiwa mkombolwa kuhuma ku ndyangilu gha mwenga ghamaha ng'ogha hula muwelili mlihi kuhuma kwa wambuyi wa mwenga ng'ogha kwa vindu vihakala handa zahabu na lidini lya feza, 19 ila kwa mwahi wa utundamilu wa Kilisito yula awelili handa mwanakondolu avile na ng'ogha uhakata hata malembu. 20 Mweni awelili kahaghulwa na Sapanga yambila gha mlima wogha kulumbwa, ila akahighiliswa ku machuwa hagha gha mwihu kwaikiva gha twenga. 21 Kwa kupitila mweni, mngumkwinila Sapanga yula amhindulili kuhuma kwa wahovili na akampegha ukwilikihi, ili mukwinili Sapanga na mumtumaini.

22 Kwaikiva hinaa, kwa kuyitikila uchakaka, mwenga mjighulula mioyu ili kuwapala wakwinila wayenu mkiva ng'ogha na umbindingu, hinu mjipali kwa moyu wogha. 23 Kwaikiva gha lilando lila lya Sapanga livile na ukomu mwenga mlelwa kangi na ng'ogha handa wana wa tati anguwesa kuhova bali tati awesa ng'ogha kuhova machuwa hyogha bila mwihu. 24 Handa Mayandiko yangulonga,

"Kila mundu ni handa mahamba

na ukulu ghaki wogha ni handa uluwa wa matawa.

Mahamba yangunyala na uluwa unguguwa. 25 Ila lilando lya Bambu lingutama machuwa yayendelela." Lilando hali ni lila Habali Maha mtangasilwi.