1 Hinaa mhyoghanili mwenga wanaisa! Mlili na kulumbilila kwaikiva gha lung'ai lula lutewahikila. 2 Unaisa wa mwenga uwola, na nguu zya mwenga zitahunwa na ng'ongolo mweni kukemwa mmehe. 3 Sahabu na feza zya mwenga vilyeghwa na kutu, Na kutu hai ndiwa itewasitaki, na yeni iteyalamisa mihigha gha mwenga handa lyoto vila linguyalamisa. Kwaikiva mlikungulila vindu vitangala kumachuwa hagha gha mwihu. 4 Munguwahipa ng'ogha lihomosi watumikila wala wagholile lihengu kumatawa gha mwenga. Myughanili vila lihomosi lyao lingulalama! Kililo kya wala wabenili kumatawa gha mwenga kimhikila Bambu wa watovangondo. 5 Mulikala na kuhekelela unaisa wa mwenga mkulu kumlimawogha hau, mwenga muwela na mahuta kwaikiva gha lichuwa lya utoso handa likokolo lyeni kuwela na mahuta lyeni kuyandalwa kuhinjwa. 6 Muwatosa na kuwakoma wandu wawela ng'ogha na mahakata, Na weni wawangingamili ng'ogha.

7 Hinu walongo wa nenga, mfumilili mbaka kuhika kwa Bambu lihanja lya ipili. Mumloli mtukutula vila angulindila masau ghaki yeni umaha yakuli kulutupi. Anguyalindila kwa luhujulu mbaka yapati ndonya zya mtumbulo na mwihu. 8 Mwenga hilahila mngupalwa mfumilili. Mgangamali kumoyu, kwaikiva kuhika kwa Bambu kwa pabehi. 9 Walongo wa nenga mkotoho kung'ungulikilana, mkayambusa kutoswa. Mtosa kapabehi kuhika. 10 Walongo wa nenga mgholi handa walota wa Sapanga wailongile yala Bambu kawalongela walonge, weni wakolilwi na maghasu matangala ila wafumilili. 11 Tunguwakema wandu hagha yiwa wahighilwa, kwaikiva wafumilili. Myoghanila kala habali gha ufumilifu wa Ayubu, na mngumanya vila Bambu kamgholela kumwihu. Kwaikiva Bambu kamema luhungu na umaha. 12 Pamonga na hagha hyogha walongo wa nenga, mkotoho kulapa kwa kundumba au kwa mlima wogha, hata kwa kindu kighangi chochosi. Mlongi "Ndiwa" iweli mngumanisa ndiwa, na mlongi ng'ogha iweli mngumanisa ng'ogha, na kwa hali mtetoswa ng'ogha na Sapanga. 13 Mundu wa mwenga pakawoneka na lung'ai na amyupi Sapanga. Pakawoneka na moyu wa kuhekelela, ayimbi uyimbu wa kumsifila Sapanga. 14 Hilahila pakawoneka anguvina, angupalwa kuwakema wagogolo wa lipinga lya weni kumkwinila Kilisito. Na weni watemuyupila na kumpakala mahuta kwa lihina lya Bambu. 15 Handa mtekwinila mvina atelamiswa. Bambu atemlamisa, na handa uvina ghaki uhika kwa kughola sambi atehumisilwa sambi. 16 Hinu mlipetuli mwenga kwa mwenga, na myupilani ili mpati kulamiswa. Kwaikiva kuyupa kwa mundu mwenikughola yeni kumhekelesa Sapanga ghamaha nesu na ingughola matangala kuhumila. 17 Mlota wa Sapanga Elia awelili mundu handa twenga, ayupili kwa kuyangala ndonya ikotoho kutonya, na yeni ikaleka kutonya kwa lipindi lya machuva miitatu na miei isita. 18 Kuulongolo akaluwa kangi, ndonya ikatonya na mlima ukamelesa masau. 19 Walongo wa nenga, yeyosi paghati gha mwenga pakabyodoka na kuleka kukwinila, na mghangi akamuhuyisa, 20 mmanyi yiwa, hayu mweni kumuhuyisa mweni sambi, kuhuma kunjila ghaki ihakata atelokola mpumulo wa hayu mweni sambi kuhuma kukihu na Sapanga atemlekesela sambi syaki sitangala.