1 Walongo wa nenga, kwa vila mumkwinila Bambu Yesu Kilisito, Bambu wa ukulu, katu mkotoho kuwabaghula wandu. 2 Paikahumila mundu mmonga mweni kuvala peti gha sahabu na nguu zya maheli anguyingila kukonganiko lya mwenga, hilahila akayingila mundu mkapuku mweni kuvala nguu zihakala, 3 na mwenga mkampokela kwa utundamilu yula mweni kuvala nguu maheli na kumlongela, "Utami haku mahala maheli," ila yula mweni kuvala nguu zihakala mkamlongela, "Wenga ugholoki pala, au utami haku pahi pabehi na maghulu ghangu," 4 Ghuli, mghalu hau ungulangiha ng'ogha yiwa mngubaghula? Na kwa kughola nagha mngulongoswa ng'ogha na mawachilo mahakata? 5 Walongo ghangu wapalwa, mhyoghanili huti! Sapanga kawahaghula wakapuku wa mlima wogha hau lukani waweli wanaisa kukukwinila, na weni wapokeli Unkosi hula Sapanga alongile yiwa atewapegha wandu weni kumpala. 6 Ila mwenga munguwapughanya wakapuku. Ghuli, hagha wanaisa ng'ogha ndiwa weni kuwapokola vindu vya mwenga na kuwabuluta kunjenga kaya wakawasitaki? 7 Ghuli, ng'ogha weni kulilighu lihina maheli lya Bambu wa mwenga mkemilwi? 8 Mtewela mngughola maheli handa mtewela mngutimilisa laghililo maha liyandikilwi kumayandiko gha Sapanga, "Umpali myako handa vila unguipala umweni," mtewela mghola maheli. 9 Ila paikawela mngubaghula wandu, mngughola sambi, na laghilo linguwalamula mwenga yiwa mungukosela. 10 Ningulonga nagha kwaikiva yeyosi mweni kukola laghilo lyogha, kunu akakosela hata monga hela atewela katenyula malaghilo hyogha, 11 kwaikiva yula mweni kulongela, "Ukotoho kughola ngongola," ndiwa yulayula Sapanga mwenikulongela, "Ukotoho kukoma." Hinu paikawela ungughola ng'ogha ngongola ila ungukoma, unguwela mtenyula laghilo. 12 Hinu, mngulongela na kughola handa wandu wala watetoswa kupitila laghilo lila lyeni kuyegha upekesu, 13 kwaikiva Sapanga atewela ng'ogha na luhungu, pala paatemtosa mundu yula mwenikuwela ng'ogha na luhungu. Ila hata kweni utoso Sapanga anguwawonela wandu luhungu.

14 Walongo wa nenga, kuwela na fwaida liki paikawela mundu angulongela kangukwinila kunu kangulangiha ng'ogha vitendu vya kukwinila. Ghuli kukwinila haku kunguwesa kumlokola? 15 Paikawela mhacha au mhaja kahakala nguu au kahela mulyo, 16 mmonga wa mwenga akamlongela, "Sapanga aweli pamonga na wenga!" Hai ingumtanga niki? Paumpegha ng'ogha kindu kya kumtanga. 17 Havi ndiwa iwela kukwinila weka ghaki pakukonganika ng'ogha na matendu, kuhova. 18 Paakahumila mundu mtenu akalonga, "Inguwesekana kuwela na kukwinila ukaleka kughola matendu." Ninguwesa kuyanga, "Unihighilisili vila uwela na kukwinila bila matendu, na nenga nitehighilisa vila niwela na kukwinila pamonga na matendu." 19 Ungukwinila yiwa kuwela na Sapanga mmonga. Ungughola maheli! Ila mahoka yangukwinila kuwela na Sapanga mmonga na kangi yanguhighimila kwa holu nesu. 20 Wenga msihisihi! Ghuli, ungupala kulangilwa ukwinila ughola ng'ogha lihengu yiwa uhova? 21 Ghuli, mbuyi wa twenga Abulahamu ajumililwi ng'ogha na Sapanga kwa njila gha matendu ghaki? Mweni amuhumisili mwana ghaki Isaka aweli litambiku kunani gha kihanja. 22 Kupitila hali unguwesa kulola vila kukwinila kugholile lihengu pamonga na matendu ghaki, hinu kukwinila kwaki kukatimiliswa kupitila matendu ghaki. 23 Ndiwa yakatimila mayandiko gha Sapanga, "Abulahamu amkwinilile Sapanga, na kwa kukwinila haku akagholwa kuwela kajumilwa na Sapanga," na kwaikiva gha nagha akakemwa ghanja wa Sapanga. 24 Hinu mnguwesa kuilolela yiwa mundu kanguwesa kujumilwa kuulongolo gha Sapanga kwa matendu ghaki na ng'ogha kwa kukwinila weka ghaki. 25 Hilahila hai ihumilile kwa Rahabu yula mngongola, ajumiliwi na Sapanga kwa matendu ghaki, lipindi paawapokela wajumbi weni kulaghilwa na Musa kulolesa na kuwahumisa kupitila njila ghangi. 26 Hinu, handa vila mhigha bila mpumulo uhova, hilahila kukwinila bila matendo uhova.