1 Nenga Yakobu, mtumikila wa Sapanga na mtumikila wa Bambu wa twenga Yesu Kilisito,

ninguwayandikila makabila ikumi na ivili weni kulandala kumlima wogha. Jambu.

2 Walongo wa nenga mhekeleli pamkolwa na lung'ai lwa wekaweka, 3 kwaikiva mngumanya yiwa kukwinila kwa mwenga pakunguyeswa kunguwayeghela mwenga kufumilila. 4 Hinu myendeleli kufumilila mbaka mwihu, ili mpati kutimila bila kulepelelwa na kindu chochosi. 5 Paikawela mmonga wa mwenga kalepelelwa na luhala, hayu angupalwa kumyupa Sapanga mwenikuwapegha wondu wogha mweni atempegha mundu hayu luhala bila kukalipila. 6 Ila angupalwa kuyupa kwa kukwinila bila kutila yiwa atepokela au atepokela ng'ogha, kwaikiva mundu mwenikuwela na holu angulandana na liwimbi lya bahali lyeni kuhukumulwa haku na haku kwa liyegha. 7 Hinu mundu handa hayu akotoho kuliwachila yiwa atepokela chochosi angukiyupa kuhuma kwa Bambu. 8 Kwaikiva kakola mawachilo maivili, na mweni kughalambuka ghalambuka kundyangilu ghaki.

9 Mlongo mwenikukwinila pakawela mkapuku angupalwa ahekeleli kwaikiva Sapanga angumlola yiwa ni mundu mweni kutundamilwa. 10 Mnaisa hilahila angupalwa ahekeleli kwa kuhuluswa na Sapanga. Kwaikiva atelaghalika handa uluwa wa kulitawa, 11 atelaghalika kwaikiva lijuwa likalipa linguhomola na kuyumisa mahamba na uluwa unguguwa pahi, na umaheli ghaki wogha unguyalamika. Hinu mnaisa na mweni ateyalamiswa lipindi paanguwela kumahengu ghaki.

12 Kahighilwa mundu yula mweni kufumilila mayeso, kwaikiva pakayomola kufumilila, atepeghwa hupo gha ukomu hila Sapanga awalongilile yiwa atewapegha wala weni kumpala. 13 Mundu paanguyeswa agholi uhakata akotoho kulonga yiwa, "Anguyeswa na Sapanga." Kwaikiva Sapanga kanguwesa ng'ogha kuyeswa na mahakata na mweni hilahila kanguwesa ng'ogha kumyesa mundu yeyosi kwa mahakata. 14 Ila mundu anguyeswa paangukweghwa na kuwomela na lumatamata lwaki mweni luhakata, 15 Lipindi lumatamata hali palikomala lingumghola mundu agholi sambi, na sambi paikamala inguyambusa kihu. 16 Walongo wa nenga wapalwa, mkotoho kungongwa. 17 Kila kindu kyeni kupeghwa na kya maha na kitimila, kinguhuma kunani, kinguhuma kwa Tati mlumba wa miyengi, mwenikuwela kangughalambuka ng'ogha. 18 Kwa kupala mweni atulelili kwa lilando lyaki lya chakaka, ili tuweli handa masau gha mtumbulo paghati gha viumbi ghaki.

19 Walongo wa nenga mviki hali kumutu, kila mundu aweli myuyughu pakuyughanila ila aweli mtopa pakulongela, na mtopa pakuhyoma, 20 kwaikiva mundu mweni lilaka kanguwesa ng'ogha kutimilisa mapalo gha Sapanga. 21 Hinu mleki mighalu hyogha mihakata, na mpokeli kwa kunyenyekela mavulo yakulililwi kumioyu gha kwaikiva yeni ndiwa yenikuwesa kuwalokola. 22 Mkotoho kulingonga mwaweni kwa kuhyoghanila weka lilando lyaki, ila muweli mngughola handa lilando vila lingulonga. 23 Mundu yeyosi mweni kuhyoghanila na akaleka kughola kila kakihyoghanila, hayu angulandana na mundu yula mweni kutama na kuilola mweni kukiou. 24 Hayu anguilola mweni na kumwihu anguyenda zyaki, na bwitu anguisemwa vila kawela. 25 Ila yula mweni kulolesa kwa utali laghilo lya Sapanga lyeni kutimila, lila lyeni kuyegha upekesu, na akaleka kuisemwa kila akihyoghanilile, ila akakighola, atehighilwa kukila angukighola. 26 Handa kuwela na mundu mwenikuilola yiwa kana njila gha kumyupa Sapanga vila ingupalwa na akaleka kukanisa lulimi lwaki, hayu anguingonga mweni, na njila ghaki gha kumyupa Sapanga ingumtanga ng'ogha chochosi. 27 Ila mundu mweni kumyupa Sapanga vila ingupalwa angupalwa kughola hagha, kuwatanga weni kuhovilwa na wahumbu kukila walepelelwa na tukotoho kuleka mlima wogha hau utugholi tuweli wahakata.