1 Hinu, wenga mwana ghangu, uvile na makakala kumanemu ivile mghati mwa Kilisito Yesu. 2 Uniyoghanila yala niyavulili kuulongolo gha wandu. Hinaa ningukupala uwalongeli mighalu haghahagha wakwinila waghangi wala wanguwesa kuwavula wandu waghangi hilahila. 3 Utoli fwasi ghako kumahakilo handa mtovangondo maha wa Kilisito Yesu. 4 Mtovangondo kungondu angujilekanisa na mighalu gha panji gha ngondu, ili awesi kumhekelesa mkulu ghaki. 5 Hila hila hata mtulambilo yoyose awesa ng'ogha kusinda na kupokela hupo gha usindi ikiva atekovekela ng'ogha malaghililo. 6 Mtukutula yula agholili lihengu likamala angupalwa kupokela mahala gha mtumbulo gha mabeno. 7 Uyawachilili hagha ninguyalongela, kwaikiva Bambu atekuwesesa umanyi kila kindu. 8 Mkumbwike Yesu Kilisito ahindulilwi kuhuma kukihu, yula awelili wa ukolu wa Daudi, handa ingulonga Habali Maha hai niitangasa, 9 na kwaikiva gha nagha nahakilwa na niwopilwa minyololu handa mhakata. Ila lilando lya Sapanga liwesa ng'ogha kuwopwa. 10 Kwa nagha ningufumilila mighalu hyogha kwaikiva gha waghaghulwa wa Sapanga, lukuni na weni hilahila wapati kulokoka kupitila kwa Yesu Kilisito na ukwilikihi wa machuwa yayendelela. 11 Ulongela hau ni chakaka,

"Ikiva tuhovili pamonga na mweni,

kangi tutelikala pamonga na mweni." 12 Handa tukiyendelela kufumilila,

kangi tutelongosa hilahila pamonga na mweni.

Handa tutemkanila,

na mweni hilahila atetukanila. 13 Handa tukwinila ng'ogha,

mweni ateyendelela kukwinilwa,

Kwaikiva mweni kawesa ng'ogha kujikanila mweni.

14 Hinu uwakumbusi wandu ghako mighalu hai na kuwakanisa kuulongolo gha Sapanga waleki kusindana kwa milando ivile ng'ogha gha maha. Kusindana haku kwa milando kwamaha ng'ogha, ila kunguyegha ukolonganyo kwa wala wanguyoghanila. 15 Uyangalai nesu kughola maha ili upati kujumilwa kuulongolo gha Sapanga handa mghola lihengu awesili ng'ogha kuwela na honi akivula kwa kiuchakaka ujumbi wa uchakaka. 16 Ulikali kutali na malongelano yamyinula ng'ogha Sapanga. Kwaikiva itewaghola wandu wayendeleli kumkwinila ng'ogha Sapanga. 17 Mavulo ghao yatelandala handa lilonda mbama, na amonga gha wala wavulili hagha ni Humenayo na Fileto. 18 Ikiva wauleka uchakaka na wangulonga yiwa uhinduko uhumila kala na wangukologhanya ukwinila wa wandu ghangi. 19 Ila kitamilo kivikwa na Sapanga kiwesa ng'ogha kuhukumulwa kigangamala na kiyandikwa milando hai, "Bambu angumanya wandu ghaki wogha" na hila hila "wogha wavile wa Bambu wangupalwa waleki mahakata."

20 Hinu kulighuta lya mweni vindu ngoo kuvile na mabakuli na vyombu vya kila mtindu; vyombu vya zahabu na feza, vyombu vya mindakali na mibiki. Na vyombu vighangi kutumila kwa kutundamilwa na vighangi ng'ogha. 21 Hinu mundu pakalighulula kwa kulikala kutali na mighalu hagha mihakata, atewela kyombu kya kutundamilwa, kwaikiva kalivika kala kwa Bambu ghaki na kuliyandala kughola kila lihengu maha. 22 Jiviki kutali na lumatamata lihakata lwa usongolo, ukovekeli njila maha, na ukwinila, na upalo, na kukotoho kutovana, na pamonga na wandu wogha wangumyupa Bambu kwa moyu maha. 23 Uleki ndyangilo gha milando gha utatala iwesa ng'ogha kumtundamilisa Sapanga na gha kisiisii, ungumanya yiwa hagha yanguyegha mikologhanyiko. 24 Kangi ingupalwa ng'ogha mtumikila wa Bambu kuwela na makologhanyiko. Aweli mnyalinyali paanguvula, na mfumilifu kwa wandu wogha, 25 kangi ingumpala kuwalongela kwa unyalinyali wala wangusindana na mweni, ili ikiwesekana Sapanga awapeghi lipindi lya kuleka sambi na kuumanya uchakaka, 26 kwa nagha luhala lwa weni lutewahuyila kangi, ili wahuki kumtegho wa Lihyukana hula awelili kawategha na kuwaghola wagholi mighalu ghaki.