1 Nakulaghila kuulongolo gha Sapanga, na kuulongolo gha Kilisito Yesu yula atewalamula wandu wavile wakomu na wahovili, na nakulaghila kwa kuhika kwaki na kwa unkosi ghaki, 2 utangasi lilando lya Sapanga. Kwa lipindi lya maheli au lipindi lya maheli ng'ogha kwa njila gha ufumilifu, kalipila, na uwakanisi na kuwataya moyu na kwa mavulo maheli. 3 Kwaikiva kutehika lipindi wandu wateleka kuhyoghanila mavulo gha uchakaka, ila watekovekela lumatamata lyao wakilihakulila wavula watangala wa kuwavula mighalu hila wanguipala kuhyoghanila. 4 Watelema kuhyoghanila uchakaka, wateghalambukila luhumu luwachenga ng'ogha kuukwinila. 5 Ila ungupalwa kuwela na mawachilo yamaha ku kila mghalu ghako wa utumikila. Ukotoho kutila kuhakilwa kwaikiva gha Bambu uwalongeli waghangi Habali Maha na kuyomola utumikila hula Sapanga akupeghili. 6 Ningukulongela hagha kwaikiva nenga napabehi kuyeghwa handa litambiku lya kunyweghwa lingutaywa kukihanja. Hinaa lipindi lya kuhova nenga litimila kala. 7 Nitovanili ngondu maheli, na mwanja niyomola, na ukwinila niugholokela. 8 Hinaa nivikilwa kala hupo kwaikiva gha ngalilu gha umaha hula Bambu mtosa angutosa vila ipalilwi atenipegha hupo hai lichuwa lila, ila ng'ogha weka ghangu ila na wala wogha wangulindila kwa luhujulu kuhighiliswa kwaki.

9 Uyangalai kuhika kwa nenga kwa uloposelo, 10 kwaikiva Dema aupalili mlima wogha hau akanileka na kuyenda zyaki kummbwani Tesaloniki. Kilesiki ayendili Galatia, na Titusi ayendili ku Dalimatia. 11 Ni Lukasi weka ghaki ndiwa kahighala baha pamonga na nenga. Mhakuli Maliku uhiki na mweni kwaikiva atewesa kunitanga kuutumikila ghangu. 12 Nimlaghilili Tukiko kula Efesu. 13 Pautehika niyegheli likoti lyangu nililekili kwa Kalipo kula Tiloa, niyegheli hilahila vila vihitabu vya nenga nesu nesu vila vya kunyenga. 14 Yula Alekisandilia mghongola hindu vya feza kanigholela mahakata yatangala. Bambu atemhipa kukovekelana na hagha matendu ghaki. 15 Ulikali mihu na mweni kwaikiva akingamili nesu ujumbi wa twenga.

16 Panilitetela kwa lihanja lya mtumbulo kwahela hata mundu mmonga anitangili, wogha wanilekili. Sapanga akotoho kuwavalaghiha lihakata hali! 17 Ila Bambu atamili pamonga na nenga, akanipegha makakala, hata nikawesa kuulongela ujumbi wogha, wandu wavile Wayahudi ng'ogha wauyoghanile, kangi nikalokolwa kuhuma ku kihu. 18 Bambu atenilokola na mighalu hyogha mihakata, na kunitola maha mbaka kuunkosi ghaki wa kundumba. Kwa mweni uweli ukwilikihi machuwa yayendelela na kuyendelela! Yinaa.

19 Wajambusi Pilisila na Akula, pamonga na walongo wa Onesifolo. 20 Elasito ahighalile ku Kolinto, na mweni Tilofimo nimlekili ku Mileto kwaikiva awelili mvina. 21 Uyangalai kuhika pambila gha lipindi lya lupepu. Wangukujambusa Ebulo na Pude na Linusi na Kilaudio na walongo waghangi wogha. 22 Bambu aweli pamonga na mweni,

na manemu ghaki yaweli pamonga na mwenga.