1 lihamba hai inguhuma kwa nenga Paulo, mtumikila wa Sapanga na mndumindumi wa Yesu kilisito.

Nenga niyeghwa kuwalongela wahaghulwa wa Sapanga yala yangulongela ukwinila na kuwavula wamanyi uchakaka hula unguwalongosa kundamilu gha kumtundamila Sapanga, 2 uchakaka hau uvile kitamilo kyaki ni kupokela ukomu wa machuwa yayendelela. Sapanga ailongile ng'ogha uhwangi atulaghilili ukomu hau pambila gha kulumbwa kwa mlima wogha, 3 na mweni kwa lipindi lyaki Sapanga akaugubutula kulilando lyaki nenga nihaghula kulilando hali nitangasi kukovekelana laghililo lya Sapanga mlokola wa twenga.

4 Ningukuyandikila wenga Titusi, mwana wa nenga wa chakaka kuukwinila hula tunguukovekela.

Ningukutakila manemu na kulikala maha kuhuma kwa Sapanga Tati, na kuhuma kwa kilisito Yesu, mlokola wa twenga.

5 Nikulekili kula ku Kilete lukani ugholi maha hila mighalu yahighalile kuwoneka maha, na kuwahaghula wagogolo kukila mmbwani handa vila nikulaghilili. 6 Mgogolo wa lipinga lya wandu wa Sapanga wamkwinila Kilisito angupalwa kuwela mundu kawela ng'ogha na uhakata, avile na mdala mmonga hela, na wana ghaki wangupalwa kuwela wakwinila, wakotoho kuwoneka watatala au wahakata. 7 kwaikiva kilongosi wa lipinga lya wandu wa Sapanga wamkwinila Kilisito ni mgholokela wa lihengu lya Sapanga, hinu angupalwa kuvile mundu avile ng'ogha na kulalamikilwa, hilahila aweli ng'ogha na mikwinakwina, akotoho kuwela myuyughu wa lilaka, mlowela, na akotoho kuwela mundu mweni lumatamata lwa mapesa ghaki ng'ogha. 8 Angupalwa kuvile mundu yaapala wahenja na angupala mighalu maha. angupalwa kuvile mundu mweni kujilongosa mweni, angughola ng'ogha uhakata, mundu yapala kughola maheli na kughola yala yangupalwa na mundu kahaghulwa kwaikiva gha Sapanga na mweni ndyangilu maha. 9 Ingumpala akoli maha lila lilando lya ukwinila handa linguvulwa. Lukasini awesi kuwataya moyu waghangi kwa mavulo gha uchakaka na kuwesa kuyavika lipala mahakata gha wala wandu wanguyangingama mavulo hagha.

10 Kwaikiva kuvile na wandu watangala nesunesu wahumili kudini gha Wayahudi, wavile ni watatala wangulonga milando yavile na maha ng'ogha na kuwabyodosa waghaghi. 11 Ingupalwa kuwakanisa wandu hagha kwaikiva wangubyodosa mighuta itangala kwa mavulo ghao gha uhwangi, wangughola nagha lukani waipatili mapesa. 12 Hata mmonga wa walota ghao, avile ni Mkilete, ailongile, "Wakilete wangulonga uhwangi machuwa hyogha, ni handa mikokolu mihakata, wapweli na wadomela matongi !" 13 Milando hai ailongile ni uchakaka na kwaikiva gha nagha, ungupalwa kuwakalipila kwa kukalipa, ili wawesi kugangamala kuukwinila ghao, 14 Wakotoho kukovekela mahumu gha Wayahudi au malaghililo gha wala wandu waukanila kala uchakaka. 15 Kila kindu kijumilwa kuulongolo gha Sapanga kwa wala wandu wajumilwa kuulongolo gha Sapanga. Ila kwahela chochosi kijumilwa kuulongolo gha Sapanga kwa wandu wala wanguliwachila uhakata kwaikiva mawachilo gha weni yamema uhakata. 16 Wandu handa hagha wangulidumbila yiwa wangummanya Sapanga, ila kwa matendu gha weni wangumkanila Sapanga. Hagha ni wandu wahakata na wayitikila ng'ogha na wamaha ng'ogha kwa mghalu wowosi maha.