1 Uwakumbusi wandu kuwanyenyekela vilongosi na wala wavile na ukulu, kuwayoghanila na kuliyandala kwa kughola mighalu hyogha maha. 2 Walongeli wakotoho kumligha mundu yoyosi, ila walikali wakotoho kutovana, na waweli wanyalinyali na wanyenyekela machuwa hyogha kwa wandu wogha. 3 Kwaikiva lipindi limonga na twenga tuwelili wasihisihi, watatala na wabyodoka. Tuwelili wahusutu wa lumatamata na luheku lumhekelesa ng'ogha Sapanga. Tulikalili na uhakata na wifu, wandu watuhyomelilili na twenga baha tukahyomelana. 4 Ila lipindi lya ulungwana na upalo wa Sapanga, mlokola wa twenga paugubutulwa, 5 atulokolili ng'ogha kwaikiva gha mghalu maha tuughola twenga, ila kwaikiva gha luhungu lwaki. Atulokolili kwa kutuhumisila mahakata gha twenga ingumanisa kulelwa hyonu kwa njila gha Mpumulo wa Sapanga, 6 Sapanga kamlaghila Yesu Kilisito mlokola wa twenga kutupegha Mpumulo ghaki kwa utangala, 7 ili kwa ulungwana ghaki tupati kujumilwa kuulongolo gha Sapanga na kuwela walihi wa ukomu wa machuwa yayendelela handa tungulitumaini. 8 Mghalu hau ni chakaka.

Ningupala uwavuli kwa mkasu, ili wala wamkwinila Sapanga wawesi kuvile na luhujulu lwa kughola maha machuwa hyogha mighalu hai ni maheli na kangi yavile na hupo kwa wandu wogha. 9 Ila uhyeti utatala wa kisiisii, kulongelana mahina gha ukolu na makologhanyo na masindano yala yalongelela laghilo, kwaikiva mighalu hai ivile ng'ogha na hupo na gha yaghiyaghi. 10 Mundu yula angughola mikologhanyo umkanisi akotoho kughola lihanja lya mtumbulo na lihanja lya ivili na kuulongolo umleki. 11 Umanyi yiwa mundu wa nagha kabyodoka, na sambi ghaki inguhighilisa yiwa kabyodoka.

12 Nipala kumlaghila Alitema au Tukiko kwa wenga. Paahika pepayi uyangalahi nesu ukongine na nenga haku ku Nikopoli, kwaikiva nilamula kulikala haku lipindi lya lupepo. 13 Uyangalayi kuwayegha Zenasi yula mundu wa ulamulo na Apolo na uhighilisi yiwa wavile na kila kindu kingupalwa mumwanja. 14 Wandu wa twenga ni lasima walivuli kughola maha ili wakongine na iwatangi lipindi lya lung'ai. Wakotoho kuwela wandu wasio na fwaida.

15 Wandu wogha wawela pamonga na nenga wangukujambusa. Uwajambusi wala wangutupala twenga kuukwinila.

Ninguwatakila wogha manemu gha Sapanga.