1 Nenga Paulo, muwopwa kwaikiva gha Kilisito Yesu, pamonga na mlongu Timoseo,

ningukuyandikila wenga Filimoni mpalwa, mghola lihengu pamonga na twenga, 2 na kwa mhacha wa twenga mpalwa Afia, na mtovangondu myetu ku Kilisito Alikipo na lipinga lya wandu wamkwinila Kilisito lila lingukongine ukaya kwa wenga.

3 Tunguwatakila manemu na kukotoho kutovana kuhuma kwa Sapanga Tati wa twenga, na kwa Bambu Yesu Kilisito.

4 Kila paniwela kumayupo na panikukumbwike wenga Filimoni ningumshukwile Sapanga, 5 kwaikiva ninguhyoghanila vila ungumkwinila Bambu Yesu na vila unguwapala wandu wogha wamkwinila Kilisito. 6 Ningukuyupila ili ukwinila hau unguughola pamonga na twenga ukuwesesi kumanya nesu highili zyogha tungupokela patuwela pamonga ku Kilisito. 7 Upalo ghako, unighola niweli na luheku nesu na kutaywa moyu nesu! Wenga hilahila ugholile mioyu gha wandu wa Sapanga kukalamuka.

8 Hata nagha ku Kilisito ningaliwesa kukulaghila yala ungupalwa kughola, 9 ila kwaikiva gha upalo ni mbaha nesu nikuluwi. Ningughola nagha pamonga na nenga Paulo ni mgogolo na hinaa niwopwa kwaikiva gha Kilisito Yesu. 10 Hinu, nivile na lilando limonga kukuluwa na hali ni kwa hayu mwanaghangu Onesimo, yula avile ni mwanaghangu kuukwinila wa Kilisito, kwaikiva niwela Tati ghaki wa kimpumulo paniwela kuuwopwa. 11 Ni yula yula Onesimo avile kula dahile awelili wamaha ng'ogha kwa wenga, ila hinaa ni wamaha kwa wenga na kwa nenga hilahila.

12 Hinaa ningumlaghila kwa wenga, kwaikiva ningumpala kwa moyu ghangu wogha. 13 Ningalipala alikali baha na nenga ili anitangi akitola fwasi ghako paniwela kuuwopwa kwaikiva gha Habali Maha. 14 Ila niteghola ng'ogha chochosi mbaka uniyangi yiwa uyitikila. Nenga nipala ng'ogha kukuhukumula hukumula unitangi, kwaikiva ulungwana ghako ungupalwa uwoneki kuhuma mmoyu ghako ng'ogha kuhuma kumhukumulo.

15 Pangi Onesimo ahukili kwa wenga lipindi mayaghani hela ili uwesi kangi kuwela na mweni machuwa yayendelela, 16 hinaa kamhusutu ng'ogha, ila kamaha kupiti mhusutu, mweni kamlongo wa twenga mpalwa ku Kilisito. Kampalwa kwa nenga, na kwa wenga atevile mpalwa nesu, handa mhusutu na mlongu kuukwinila wa Bambu.

17 Hinu, ikiva ungunimanya nenga yiwa ni myako ku Kilisito, umpokeli hilahila handa vila unganipokela nenga mweni. 18 Ikiva awelili kakuhakila, au kawela na hindu ghako angupalwa kuhipa, unongeli nikuhipi. 19 Ninguyandika mghalu hau kwa liwoku lyangu mweni. Nenga Paulo nitekuhipa. Kangi nitekukumbusa ng'ogha yiwa wenga ungupalwa kuhipa kyokyosi kwa nenga kungalilu ghako. 20 Mlongo ghangu, ningukuluwa unigholeli mghalu hau kwaikiva gha lihina lya Bambu, ili uhekilesi moyu ghangu handa mlongu ku Kilisito.

21 Ninguyandika kunu nikikwinila yiwa uteniyitikila haku kuluwa kwa nenga, na kangi ningumanya yiwa uteghola makulunga hata kupiti hagha ningukuluwa. 22 Pamonga na hagha, uniyandalili kyumba kya wahenja kwaikiva ningukwinila yiwa kwa mayupo gha mwenga, Sapanga atenihuyisa kwa mwenga handa kuyitikila mayupo gha mwenga.

23 Epafula, muwopwa myangu kwaikiva gha Kilisito Yesu, angukujambusa. 24 Hilahila na Maliku na Alisitako na Dema na Lukasi, waghola lihengu wayangu, na weni wangukujambusa. 25 Ninguwatakila mwenga wogha manemu gha Bambu Yesu Kilisito.