1 Haku dahile Sapanga alongili mianja itangala na watati wa twenga kwa kutumila walota, 2 ila kumachuwa hagha gha mwihu Sapanga angulonga na twenga kwa kupitila Mwana ghaki, yula avile kamvika agholokeli vindu vyogha, na kwa kupitila mweni Sapanga alumbili mlima wogha. 3 Mweni ni mng'anyimo wa ukulu wa Sapanga, na angulangiha vila Sapanga kawela, anguyambusa vindu vyogha vikonganiki pamonga handa viwela kwa lilando lyaki lyeni makakala. Badili gha kuwaghulula na kuwahumisila wandu sambi zyau, akatama haku kunani kundumba, mbandi gha kuliyila gha Sapanga Mkulu.

4 Mwana wa Sapanga agholilwe mkulu kupiti watumikila wa kundumba wa Sapanga, na lihina apeghilwi na Sapanga ni likulu kupiti mahina hyogha. 5 Kwaikiva Sapanga amlongelile ng'ogha hata mmonga wa mtumikila ghaki wa kundumba yiwa, "Wenga ni Mwana ghangu, nenga lelo niwela Tati ghako." Na hilahila kalongela ng'ogha milando hai kwa mtumikila yoyosi wa kundumba wa Sapanga, "Nenga nitewela Tati ghaki, na mweni atewela Mwana ghangu." 6 Kangi Sapanga paamyeghili Mwana ghaki, muwelekwa wa mtumbulo, kumlimawogha ailongile, "Watumikila wogha wa kundumba wa Sapanga wamyupili hayu." 7 Ila kwa mbandi gha watumikila ghangu wa kundumba, ailongile, "Niwaghalambusa watumikila ghangu wa kundumba kuwela liyegha na watumikila ghaki kuwela mivalika gha lyoto." 8 Ila kwa habali gha Mwana ghaki Sapanga ailongile, "Wenga Sapanga unkosi ghako utelongosa machuwa hyogha bila mwihu, wenga unguwalongosa vila ingupalwa. 9 Wenga ungupala mighalu hila ingupalwa kuwela na unguyahyomela mahakata. Ndiwa kwaikiva Sapanga kakupegha luheku na utundamilu kupiti wayoko wogha." 10 Kangi akalonga, "Bambu, wenga ulumbili mlima wogha haku dahile, na kundumba ukugholile kwa mawoku ghako." 11 Hazi zitehuka, ila wenga unguhighala machuwa hyogha bila mwihu, na zyogha zitehakala handa nguu. 12 Utevibindililabindilila handa lihabiti na lihakala viteghalambulika handa nguu, ila wenga ni yulayula na kulama kwa wenga kutewela ng'ogha na mwihu. 13 Ila ni kwa mtumikila ghani wa kundumba ayesili kumlongela, "Uwaviki wahakata ghako pahi gha ulongosi ghako." 14 Ila watumikila wa kundumba wa Sapanga ni mkina ghani? Ni mipumulo wangumtumikila Sapanga, wangulaghilwa kuhuma kwa Sapanga kuwatanga wala watepokela ulokola.