1 Kwaikiva gha nagha tungupalwa kuyalolesa maha yala hyogha tuyoghanilili ili tukotoho kuwela kutali na ghala tuyoghanilile. 2 Kwaikiva ujumbi hula wapeghilwi wagogolo wa twenga na watumikila wa kundumba wa Sapanga uwonekanili yiwa ni wa chakaka, hata mundu yoyosi avile kaukovekela ng'ogha au kuutundamila anyokolelilwi handa impalili kunyokolwa. 3 Tutewesa ghuli kulokoka ikiva tuteupughanya ulokola mkulu handa hau? Ulokola hau, uvile haku mtumbula Bambu mweni utangasili ulokola hau, na kangi wala wayoghanilile wakatuhighilisila twenga yiwa ni chakaka. 4 Sapanga hilahila ahighilisili ulokola hau kwa kughola vilangihi na makangaso na kwa makakala gha wekaweka, na kuwapegha wandu hupo zya Mpumulo wa Sapanga handa aipalile mweni.

5 Sapanga kauvika ng'ogha mlima wogha hula utehika na hula tunguulongela habali zyaki kuulongosi gha watumikila wa kundumba wa Sapanga. 6 Ila kuvile na mahala kutenu kumayandiko kuyandika nagha, "Mundu ni kyani hata umuwachililile, mundu ni niki hata umtundamili? 7 Kwa lipindi mayaghani umghola kuwela mnunguna kupiti watumikila wa kundumba wa Sapanga na ukamvalisa likokoma lya ukulu na utundamilu, 8 ukavika vindu vyogha pahi gha ulongosi ghaki," kwa kuvika vindu vyogha kuulongosi ghaki, Sapanga kaleka ng'ogha kuvika chochosi kuulongosi ghaki mundu. Ila kwa hinaa, tulola ng'ogha handa kuvile na mundu angulongosa vindu vyogha. 9 Ila tungumlola Yesu avile Sapanga amgholile mnung'una lipindi mayaghani kupiti watumikila wa kundumba wa Sapanga, ili kwa umaha wa Sapanga ahovi kwaikiva gha wandu wogha. Hinaa tungumlola kavikwa likokoma lya ukulu na utundamilu, kwaikiva gha kuhakilwa na kuhova kwaki. 10 Hinu iwelili maha kwa Sapanga yula alumbili vindu vyogha na kuvigholokela maha, amgholi Yesu kuwela katimila kwa njila gha kuhakilwa, lukani awayeghi wana watangala kuwela pamonga kuukulu ghaki Sapanga. Kwaikiva Yesu ndiwa anguwalongosa wandu wapati kulokoka. 11 Kwaikiva mweni anguwaghulula wandu kuhuma kusambi, mweni pamonga na wala anguwaghulula, wogha wavili na Tati mmonga. Hinu kwaikiva gha nagha Yesu kawela ng'ogha na honi kuwakema walongo ghaki. 12 Handa Yesu ailongile, "Wenga Sapanga, nenga nitewatangasila walongu ghangu matendu ghako. Nitekuyinula kumapinga ghao." 13 Kangi angulonga, "Nitelivika litumaini lyangu kwa Sapanga." Hilahila angulonga, "Nabaha, nenga pamonga na wana ghangu wala anipeghili Sapanga." 14 Hinu kwaikiva hagha wana apeghilwi na Sapanga ni wandu, wavile na higha na mwahi, Yesu hilahila ahikile akiwela na higha handa weni. Agholili nagha lukani kwa njila gha kuhova kwaki amuyalamisi Lihyukana mweni makakala gha kihu, 15 Yesu agholile nagha ili kuwavika pekesu wala wawelili kungalilu gha uhusutu kwaikiva gha kutila kihu. 16 Hinaa ni chakaka mweni kahika ng'ogha kuwatanga watumikila wa kundumba wa Sapanga, ila kuwatanga wawelekwa wa Ibulahimu. 17 Kwaikiva gha nagha impalili alandani na walongu ghaki kumighalu hyogha, ili apati kuwela mtambika mkulu mweni luhungu na mchakaka kukumtumikila Sapanga ili agholi ndulumu kwa sambi sya wandu. 18 Kwaikiva mweni paayesilwi ahakiliwi, hinu anguwesa kuwatanga wala wanguyeswa.