1 Hinu kwaikiva gha alongeleli Sapanga yiwa tuteyingila kumbumulilo hila yambila kuwela, hinu tulikali mihu kwa hali ili paghati mwa twenga pakotoho kuwela hata mmonga wa twenga atesindwa kuyingila. 2 Kwaikiva twenga hilahila tutangasilwa Habali Maha handa itangasilwi kwa weni. Ila ujumbi hau uwatangili ng'ogha wandu wa dahile, kwaikiva wauyoghanilili ila waupokelili ng'ogha kwa ukwinila. 3 Hinu twenga weni kuwela tungukwinila tunguyingila kuhupo gha mbumulilo. Handa ailongile Sapanga,

"Nihyomili, nikalapa,

‘Wateyingila ng'ogha mahala kwa nenga nipumulila.’"

Sapanga alongili hagha pamonga na yiwa lihengu lyaki liwelili liyomoka kala kuhuma alumbili mlima wogha. 4 Mahala kutenu Mayandiko gha Sapanga yangulongelela lichuwa lya isaba yiwa, "Badili gha kughola mahengu hyogha Sapanga apumulili lichuwa lya isaba." 5 Na haku hilahila payandikwa kangi yiwa, "Wateyingila ng'ogha kumbumulilo ghangu." 6 Kwaikiva, hali laghililo lya kuyingila kumbumulilo lyambila kuwela, kukovekelana na wala watangasililwi Habali Maha kula mtumbulo wasindilwi kuyingila hamu kwa kusindwa kumyitikila Sapanga. 7 Sapanga avikili lichuwa lingi lingukemwa "Lelo." Badili gha kulonga hagha machuwa gha kuulongolo akalonga kangi kwa kupitila Daudi,

"Handa lelo mteyoghanila lilowi lya Sapanga, mkotoho kuleka kuyitikila." 8 Kwaikiva handa Yoshua angaliwela kawapegha wandu wala kupumulila, Sapanga angalilonga ng'ogha kangi kuulongolo kulongelela lichuwa lingi lya mbumulilo. 9 Hinu lihighala lichuwa lya kupumulila kwa wandu wa Sapanga. 10 Kwaikiva kila yula ayingila kumahala pambumulilo gha Sapanga atepumulila kulihengu lyaki handa vila Sapanga apumulili pakamalila lihengu lyaki. 11 Hinu, tuyangalayi kuyingila kumbumulilo hai, ili akotoho kuwela yoyosi paghati mwa twenga ateleka kuyitikila na kusindwa kuyingila handa waigholile wala wa dahile. 12 Kwaikiva lilando lya Sapanga ni lyeni ukomu na makakala, ni likalipa kupiti lipanga lila lyeni kudumula mbandi ivili haku na haku, linguyingila hata kuwesa kulekanisa moyu na mpumulo na hata vikongonu na uloto wa kumihupa. Hilahila lingumanya lukani na mawachilo gha mundu. 13 Kwahela kindu kyeni kulumbwa kinguwesa kuhighwa kuulongolo gha Sapanga, ila vindu vyogha vingugubutulilwa na kuwela lipala kuulongolo ghaki, hayu ndiwa tutemyeghela mavalango gha matendu tughola.

14 Hinu, kwaikiva tuvile na Mtambika Mkulu nesu kayingila kundumba, na hayu ni Yesu Mwana wa Sapanga hinu twenga tukoli nesu mighalu tunguyakwinila. 15 Kwaikiva tuvile na Mtambika Mkulu nesu avile angumanya nesu ulepelelu wa twenga, na mweni ayesilwi handa twenga kwa njila wekaweka ila kaghola ng'ogha sambi. 16 Hinu tuyendeli pabehi kukitamilo kya ukulu tukileka kuwela na holu, ili tupokeli luhungu na umaha wa kututanga lipindi lya lung'ai.