1 Hinu Lilaghano lila lya mtumbulo liwelili na njila zyaki zya kuyupa na mahala pahaghulilwi pakumyupila Sapanga. 2 Lihema lichengwili likiwela na mahala ghaki papanji wakipakema Pambuleti pee. Hamu kuwelili na mbaku gha kuvikila limbamba, mesa na mibumunda iwela ivikwa kuulongolo gha Sapanga. 3 Kuhyetu gha lipazila lya ipili, kuwelili na kibimilo wakikema mahala Pambuleti Pee. 4 Mghati mula kuwelili na kyombu kya kutumililila ubani, kigholilwi na zahabu. Hilahila kuwelili na lisanduku lya lilaghano lipakalwa zahabu mbandi zyogha na mghati mwa lisanduku lila kuwelili na kimbundi kya zahabu kyeni mana, na hyatu gha Haluni yeni kutomola mahamba mmbalimbali, na fibau viiwili vyeni kuyandikwa malaghanu. 5 Kunani mwa lila lisanduku kuwelili na viumbi weni mbapatilu, na mbapatilu zyao ziligubika kitamilo kya ukulu, ila hinaa tuwesa ng'ogha kulongela mighalu hai kwa utali.

6 Havi ndiwa wavikili vindu vila vyogha. Hinu watambika wayingilili machuwa hyogha kukila kyumba kya mtumbulo kwa kughola mahengu ghao. 7 Ila kulihema lila lya ivili mtambika mkulu anguyingila weka ghaki na kangi hai iwelili lihanja limonga hela na kwa lichuva. Na hayu apalilwi kuyegha mula mwahi gha likokolu kuyeghwa handa litambiko kwaikiva gha sambi syaki mweni na kwa waghangi kukovekelana na sambi syau. 8 Kukovekelana na ndyangilu hai Mpumulo wa Sapanga anguvula lipala yiwa lipindi kibimilo kya panji pakiwela kikali kinguyendelela kughola lihengu, njila zya kuyingila mahala Pambuleti Pee kwa wandu waghangi ikawela yambila kuwoposolwa. 9 Hau ni mlandano wa lipindi lya hinaa ungulangiha yiwa hupo na litambiku lila liyeghwa kwa Sapanga liwesa ng'ogha kumghulula. 10 Hagha hyogha ni mighalu gha ndyangilu gha wandu hela, milyo na vinywegha na kuighulula kwa panji. Hagha hyogha malaghilo yangupalwa kuyendelela mbaka pala Sapanga paateghola lilaghanu lyonu.

11 Kilisito kahika kala, akiwela Mtambika Mkulu wa mighalu ivile maha, ivile hinaa ihika kala. Na mweni angughola utumikila ghaki kulihema ghangi lya maha na litimila nesu. lihema hali ligholwa ng'ogha na mawoko gha wandu na kwa nagha ng'ogha lya mlima wogha hau. 12 Mweni ayingilili mahala Pambuleti Pee lihanja limonga hela, akiwela katola ng'ogha mwahi gha mbuhi na ng'ombi, ila katola mwahi ghaki mweni, akatupatila ukombola wa machuwa hyogha bilamwihu. 13 Kwa nagha wandu wala wajumilwa ng'ogha kumayupo wawelili wakighululika na kuwela maha pawayitilwa mwahi gha mbuhi na ng'ombi likambaku pamonga na malifu gha ng'ombi mnung'una. 14 Ila kwa mwahi gha Kilisito, mighalu mikulunga nesu ingugholeka! Kwa makakala gha Mpumulo wa Sapanga wa machuwa hyogha bila mwihu, Kilisito ajihumisili mweni kuwela litambiku litimila kwa Sapanga. Mwahi ghaki utetughulula matendu yeni kuyegha kihu, ili tupati kumtumikila Sapanga avile mkomu. 15 Kwaikiva gha nagha, Kilisito ni mghola ndulumu wa lilaghano lyonu, kwa kupitila kuhova kwaki awakombolili wandu kuhuma kusambi wawelili wangughola haku kuhyetu wakiva na uloghosi wa lilaghano lya mtumbulo, lukani wala wahaghulwa na Sapanga wapati ulihi wa machuwa hyogha bila mwihu hula awahighilisilili. 16 Machuwa hyogha lihamba liyandikwa kwa kulihi hindu lingughola lihengu hela pala yula mwenikuyandika kahova chakaka. 17 Kwaikiva lihamba linguwela na makakala weka lipindi mundu kahova kala, katu unguwesa ng'ogha kuwela na makakala lipindi yula auyandikili hula ulihi ambila kamkomu. 18 Kwaikiva gha nagha hata lila lilaghano lya mtumbulo livikwa ng'ogha yaghiyaghi ila mbaka pauyitika mwahi. 19 Kwaikiva, mtumbulo Musa awatangasilili wandu amuli zyogha handa iwela ku selia, hinu akatola mwahi gha ng'ombi mnung'una pamonga na masi, na kwa mahamba gha libiki lya isopo na pamba ngeli, akakimichila kila kihitabu kya selia na wandu wogha. 20 Akilonga, "Hau ndiwa mwahi wa lilaghano wenikuilangiha yiwa lilaghanu hali ni lya chakaka, livile Sapanga kawalaghila kulitundamila." 21 Hilahila Musa akamichila hula mwahi kukibimilo na kuvyombu vya kuyupila. 22 Chakaka kukovekelana na selia, vindu vyogha vinguhululwa kwa mwahi, na sambi siwesa kuhumiswa ikiva mwahi uyitwa.

23 Vindu havi vivile ni mlandano hela wa mighalu chakaka gha kundumba, vipalilwi kughululwa kwa njila hai, ila vindu vya kundumba vingupala litambiku livile maha nesu. 24 Kwaikiva Kilisito kayingila ng'ogha mahala Pambuleti Pee pachengilwi na mawoko gha wandu, wavile ni mlandano wa kila kivile chakaka. Mweni ayingilili kundumba chakaka, ili awoneki kuulongolo gha Sapanga kwaikiva gha twenga. 25 Mtambika Mkulu wa Wayahudi anguyingila kumahala Pambuleti Pee kila lichuwa, akipapa mwahi gha likokolu. Ila Kilisito kayingila ng'ogha hamu lukani ajitoli mweni litambiku mihanja itangala. 26 Handa ingaliwela nagha, angalipalwa Kilisito kuhakilwa mihanja itangala kuhuma kulumbwa kwa mlima wogha. Ila hinaa, machuva payahika pabehi mwihu ghaki, mweni kahuma lihanja limonga hela, kuhumisa sambi kwa kujitola mweni aweli litambiku. 27 Handa mundu vila kavikilwa kuhova lihanja limonga hela na badili gha kuhova kulamulwa. 28 Hilahila Kilisito ajitolili lihanja limonga hela kuwela litambiko ili azitoli sambi sya wandu watangala, na mweni atehika lihanja lya ipili, ng'ogha kutola sambi, ila kuwayeghela ulokola wala wandu wangumlindila kwa luhujulu nesu.