1 Hinu kwaikiva selia gha Sapanga ampeghili Musa ni kisisi hela kya mighalu maha hila gha kuulongolo, ng'ogha picha gha mighalu chakaka. Kwaikiva gha nagha, iwesekana ng'ogha kwa matambiko yayeghwa lichuva kwa lichuva, kuwaghola wala wangutundamila hai waweli watimila. 2 Handa hagha wandu wamtundamila Sapanga wangaliwela wangughululwa sambi syao chakaka, wangaliyendelela ng'ogha kuilola yiwa wavile na sambi kangi, na matambiko hagha hyogha yangaliwela ng'ogha kangi. 3 Ila kwa njila gha matambiko hagha wandu wangukumbuswa sambi syao kila lichuva, 4 Kwaikiva mwahi gha ng'ombi likambaku na mbuhi iwesa ng'ogha kuhumisa sambi.

5 Ndiwa kwaikiva Kilisito paawelili akihika kumlimawogha, amlongelili Sapanga,

Upalili ng'ogha litambiko hata hupo,

ila mhigha univikilili kala.

6 Matambiku gha kulungusa au

na hupo gha kuhumisa sambi yakunoghela ng'ogha.

7 Ndiwa nikalongela, "Nabaha Sapanga,

kutimilisa yala unguyapala

handa niyandikilwa kukihitabu kya selia." 8 Mtumbulo ailongile, "Angunoghelwa ng'ogha na matambiku, matambiku gha kulunguswa na gha kuhumisa sambi." Ailongile nagha pamonga na yiwa matambiku hagha hyogha yangutolwa kukovekelana na selia wenga mweni uwapeghili. 9 Hinu akalonga, "Nabaha, nihika kughola mapalo ghako." Hinu Sapanga kahumisa hagha matambiku hyogha gha dahile na mahala paki akalivika litambiku lighangi limonga. 10 Kwaikiva Yesu Kilisito atimilisili mapalo gha Sapanga, twenga tungughululwa sambi kwa lila litambiku lya mhigha ghaki ajihumilisi lihanja limonga hela, ikakwila.

11 Kila mtambika angugholoka kuulongolo gha Sapanga kila lelo kwa kughola mayupu na kuyegha litambiku lilalila mihanja itangala hali liwesa ng'ogha kuhumisa sambi. 12 Ila Kilisito agholile litambiku limonga hela kwaikiva gha sambi, litambiku lyeni kughola lihengu machuwa hyogha bila mwihu, na hinu akalikala upandi wa utundamilu wa Sapanga, 13 angulindila wahakata ghaki mbaka wavikwi pahi gha ulongosi ghaki. 14 Hinu kwa litambiku lyaki limonga kawaghola wala waghululilwi na kuwela wandu ghaki machuwa hyogha bila mwihu.

15 Mpumulo wa Sapanga hilahila angutulongela habali hai akilonga,

16 "Hali ndiwa Lilaghano nitelighola na weni,

machuwa gha kuulongolo. Nitevika selia ghangu mumioyu gha weni,

na kuyandika kumawachilo ghao." 17 Kangi akayendelela kulonga, "Ngumbuki ng'ogha kangi sambi hata mahakata ghao." 18 Hinu, sambi pazihumiswa, patewela ng'ogha na lukani lwa kuyegha litambiko lya kuhumisa sambi.

19 Hinu, walongu, kwa mwahi gha Yesu tungupeghwa uhighiliso mkulu wa kuyingila mahala Pambuleti Pee. 20 Mweni katuwoposelela njila hyonu, njila gha ukomu, kupitila lila lipazila, ingumaanisa higha ghaki mweni. 21 Hinu, tuvile na Mtambika Mkulu avile na ulongosi kulighuta lya Sapanga. 22 Hinu tumhikili Sapanga kwa mioyu mbuleti na ukwinila utimila, tukiwela na mioyu ivile ighululwa kuhuma kulukani luhakata, na mihigha gha twenga ikiva ighululwa kwa masi mbulete. 23 Tulikoli nesu lila litumaini lyetu tungulikwinila na kulilonga, kwaikiva yula atupeghili hali lilaghano kangughalambuka ng'ogha. 24 Tuyangalahi kupeghana moyu ili tupalane na kugholelana umaha. 25 Tukotoho kuleka kukongine pamonga, handa waghangi vila waileka kughola nagha machuwa hyogha, ila tupeghani moyu twenga kwa twenga na kupiti hyogha tugholi hai mighalu kwaikiva lichuwa lya Bambu lya pabehi kuhika.

26 Kwaikiva, patuyendelela kughola sambi kwa lukani badili gha kumanya uchakaka, kwahela litambiko liwesa kutolwa kangi kwaikiva gha kuhumisa sambi. 27 Lila lihighala ni kulindila hela kwa holu ulamula wa Sapanga kwa lyoto likalipa litewayalamisa wala wogha wangumkingama Sapanga. 28 Mundu yoyosi kapughanya selia gha Musa akomilwi wakiva wamwonela ng'ogha luhungu pakiwela na uhighilisu gha wandu waivili mbaka waitatu. 29 Mnguliwachila niki, mundu yula mweni kumpughanya Mwana wa Sapanga na kupughanya mwahi wa lilaghano lya Sapanga amghululili, na mundu yula kamlighu Mpumulo wa Sapanga mweni kuyegha ghamaha, ingumpala apokeli kunyokolwa kwa ukulunga wa ghuli? 30 Kwaikiva tungummanya Sapanga alongile, "Ni lihengu lya nenga kuhuyisila. Ni nenga nitehuyisila." Na mweni akailongela kangi, "Bambu Sapanga atewalamula wandu ghaki." 31 Ni mghalu wa kutisa nesu mundu kakongine na ulamulo kuhuma ku Sapanga avile mkomu.

32 Mngumbuki mighalu iwoneka lipindi lya kuhyetu pamtumbulile kumkwinila Kilisito. Pamonga na yiwa mkolilwe na mahakilo ila mfumilili. 33 Lihanja ghangi wawelili wakiwalighu na kuhakilwa paluagha, lipindi lighangi muwelili na luhujulu lwa kuwatanga wala wagholelilwi uhakata. 34 Muwawonelili luhungu wala wawelili mukihungu, na mwenga mujumilili kwa luheku kupokwa hindu, kwaikiva mmanyili yiwa mumioyu gha mwenga muwelili na hindu maha nesu na vyeni kulikala machuwa hyogha bila mwihu. 35 Hinu mkotoho kuuleka hau mgangamalo, kwaikiva utewapatila hupo ngulu kuhuma kwa Sapanga. 36 Mngupalwa kufumilila ili pamyomola kughola mapalo gha Sapanga mpati kila wahighilisili. 37 Kwaikiva, handa vila Mayandiko yayandikwa,

"Kuhighala lipindi mayaghani hela,

hayu mwenikuhika atehika,

itetola ng'ogha lipindi litali kuhika.

38 Ila mundu ghangu avile maha atelikala kwa kunikwinila nenga,

ila pakaleka kunikwinila

nitempala ng'ogha." 39 Ila twenga ng'ogha amonga gha wala wenikuleka kumkwinila Sapanga na kuyaghamika, ila twapamonga na wala weni kumkwinila na kulokolwa.