1 Hinu kukwinila ni kuwela na mawachilo yeni uhighilisu gha kupokela kila ungukilindila, kangi kukwinila nesu mighalu hila ivile tunguilola ng'ogha hinaa. 2 Kwa njila hai gha kumkwinila Sapanga wagogolo wa twenga wamhekelesili nesu Sapanga.

3 Kwa kukwinila tungumanya yiwa mlima wogha ulumbilwi kwa lilando lya Sapanga, vindu vyogha viwoneka vilumbilwi kwa vindu viwoneka ng'ogha.

4 Kwa kukwinila Abeli amyeghelili Sapanga litambiko maha nesu kupiti Kaini. Kwa kukwinila kwaki akajumilwa na Sapanga yiwa ni wamaha, Sapanga mweni ajumilili litambiku lyaki, pamonga na yiwa Abeli ahovili ila kukwinila kwaki kunguyendelela kuwela mlandano mmaha mbaka lelo.

5 Kwa kumkwinila Sapanga kukamghola Henoko atolilwi, kuhuma kumlimawogha hau bila kuhova. Kawoneka ng'ogha kangi kwaikiva Sapanga awelili kamtola. Mayandiko yangulangiha yiwa pambila gha kutolwa, mweni awelili kamhekelesa Sapanga. 6 Kwahela mundu kanguwesa kumhekelesa Sapanga pakawela ng'ogha na kumkwinila Sapanga. Kwaikiva kila mundu mweni kumyendela Sapanga angupalwa kukwinila yiwa Sapanga kabaha, na anguwapegha hupo wala wangumuhakula kwa kuyangala.

7 Kwa kukwinila Nuhu kukamghola ayitikili Sapanga pamkanisili kunani gha mighalu itehika kuulongolo ivile iwelili yambila kuhumila. Ndiwa akachenga lisafina ili Sapanga awalokoli mweni pamonga na wandu wa mlighuta lyakina kuwalamula wandu wa kumlima wogha wenikuwela wamkwinila ng'ogha Sapanga, kwaikiva gha nagha ikamghola Nuhu ajumilwi na Sapanga.

8 Kukwinila kwaki Abulahamu, kukamghola amyitikili Sapanga pakalongelwa ayendi kumlima uvile Sapanga angalimpegha kuulongolo paweli kwa mweni, ayitikilili na akayenda, pamonga na yiwa amanyili ng'ogha kula anguyenda. 9 Kwa kukwinila kwaki alikalili handa mhenja kumlima alaghilililwi na Sapanga. Alikalili haku kukibimilo handa walikalili Isaka na Yakobu haku dahile, wavile hilahila na weni wawelili na lilaghano handa lila. 10 Kwaikiva Ibulahimu alindilili kulola mlima weni mghomba ugangamala, mlima hula Sapanga mweni ndiwa mchenga mkulu awachililile na kuuchenga.

11 Kwa kupitila kukwinila, Sala mweni hilahila, pamonga na yiwa awelili mgogolo nesu, apeghilwi uweso wa kupokela ndumbu kwaikiva akwinilili yiwa Sapanga atetimilisa lilaghano lyaki. 12 Kwa nagha, kuhuma kwa mundu hayu mmonga, Abulahamu, mweni kuwela handa kahova kala, wakahumila wandu watangala wawesa ng'ogha kuvalangwa handa ndondwa zya kundumba na mhanga wa mmbali mwa bahali.

13 Wandu hagha wogha wahovili kunu wakimkwinila Sapanga. Wahovili pambila gha kupokela mighalu ivile Sapanga awelili kayalonga atewapegha, ila kwa kutali wayalolili, wakahekelela, na kulonga lipala lipala yiwa weni wawelili wahenja na wenikuwela na mwanja hela kumlima wogha. 14 Wandu wala wangulonga milando handa hagha, wangulangiha lipala yiwa wanguhakula mlima ghao wenibaha. 15 Handa wangaliwachilila mlima hula wahumila dahile, wangaliwesa kuhuya haku. 16 Ila badili ghaki wangupala mlima wa maha nesu, kwaikiva gha nagha Sapanga kalola ng'ogha honi kukemwa Sapanga wa weni kwaikiva kawayandalila kala mlima kwaikiva gha weni.

17 Abulahamu kwa kumkwinila kwaki Sapanga kukamghola amtoli mwana ghaki Isaka handa litambiku paamyesili. Mweni awelili kalongelwa na Sapanga yiwa angalipokela wana watangala, akajumila kumyegha mwana ghaki, yula awelili mwana ghaki wa weka, 18 Sapanga awelili kamlongela, "Ni kwa kupitila Isaka utepokela wawelekwa ghako." 19 Abulahamu akwinilili yiwa Sapanga anguwesa kuwahindula wandu wahovili hai ni handa Abulahamu kanipokela kangi mwana ghaki kuhuma kukihu.

20 Kukwinila kwa Isaka kukayambusa awahighilili Yakobu na Esau, wapati highili zila zitehika kuulongolo.

21 Kwa kupitila kukwinila kwa Yakobu, paawelili anguhova kukamghola, amhighilili kila mmonga wa wana wa Yusufu, na kumyupa Sapanga akiva kasaghamila mutu gha mkongocho ghaki. 22 Kwa kukwinila kwaki, Yusufu paawelili pabehi na kuhova, alongili habali zya kuhuka kwa wana wa Izilaili haku Misili na akawapegha malaghilo gha mihupa ghaki.

23 Kwa kupitila kukwinila, walela wa Musa kukawaghola wamhighi Musa kwa lipindi lya miehi miitatu badili gha kuwelekwa, kwaikiva walolili yiwa mmaha, hata watila ng'ogha lilaghilo lya nkosi wa Misili.

24 Kwa kukwinila kwa Musa paawelili mundu mkomi, akalema kukemwa mwana wa biti Falao. 25 Aliwachilili yiwa ni mbaha kuhakilwa pamonga na wandu wa Sapanga kupiti kuhekelelela sambi kwa lipindi lihupi. 26 Alolili yiwa kupughanywa kwaikiva gha Kilisito kuvile na hupo ngulu nesu kupiti, unaisa wa Misili, kwaikiva awelili kalindila hupo gha kuulongolo ivile Sapanga atempegha.

27 Kwa kukwinila Musa kukamghola ahuki ku Misili bila kutila lilaka lya nkosi, kwaikiva awelili handa angumlola yula Sapanga kawoneka ng'ogha. 28 Kwa kukwinila akaighola lichuwa lya Pasaka, na kulaghila mwahi uyitwi kunani gha mihimu gha milyango, lukani yula mtumikila wa kundumba wa Sapanga mweni kukoma wandu akotoho kuwakoma wawelekwa wa mtumbulo wa Izilaili.

29 Kwa kukwinila wandu wa Izilaili wahubhukili bahali gha Shamu handa wangutyanga mahala kuyumu, ila Wamisili pawayesa kughola nagha wahovili kumasi.

30 Kwa kukwinila mikuta gha mlima wa Yeliko iguwili badili gha Waizilaili pawatindila kala mikuta hila kwa machuwa isaba. 31 Kwa kukwinila kwa Lahabu mwenikuwela mngongola kukamghola akotoho kukomwa pamonga na wala wamhyukile Sapanga, kwaikiva mweni awakemili kuukaya walaghililwi kulolesa mlima wa weni.

32 Hinu nilonge niki? Nivile ng'ogha na lipindi lya kulongela habali zya Gideoni na Balaka na Samsoni na Yefita na Daudi na Samweli na walota, 33 kwa kukwinila hagha wogha watovanili ngondu na wankosi, wakasinda, wagholili yala yamhekelesa Sapanga, wakapokela yala alaghilili Sapanga. Wawopili milomo gha himba, 34 wajimisili makakala gha lyoto, walokokili kuughwegha kwa lipanga mngondu, wapeghilwi makakala badili gha kuwela wawesa ng'ogha, wakawela na makakala kungondu na kuwasinda watovangondo wa kihenja. 35 Na wadala wala weni kwinilili wahuyisililwi walongu ghao wala wahovili wakiwela wahindulwa,

ila amonga gha weni wakanili kuwoposolwa, wakahakilwa mbaka kuhova ili wapati kuhinduliwa na kuyingila kungalilu maha nesu. 36 Waghangi wapughanyilwi na kutovwa hyatu, na kuwopwa minyololu na kuvikwa muuwopwa. 37 Waghangi wahovili kwa kutovwa na maganga, waghangi wadumulilwi vipandi vipandi kwa msumenu, au kuhova kwa lipanga. wawelili wakiyelejayeleja wakivala ngosi gha kondolu au mbuhi, wakilikala wakiva wavile ng'ogha na hindu, wakihakilwa na kugholwa maha ng'ogha. 38 Wandu wa mlima wogha wawapalile ng'ogha kuwela na wandu maha handa hagha. Hagha wakapalwa kutindila tindila kulivagha na kumitumbi, kumambaku na lyumba pahi gha lutupi.

39 Wandu hagha wogha wawonekanili yiwa wamaha kwaikiva gha kukwinila kwau, ila kwahela hata mmonga wa weni kapokela ghala Sapanga alongile yiwa atewapegha. 40 Kwaikiva Sapanga awelili katuvikila mighalu maha nesu ili twenga pamonga na weni tupokeli ghala yavile Sapanga ailongoile yiwa atetupegha.