1 Kwaikiva tuiwonela weni kwa wayetu watutindila vila wamkwinilili Sapanga, hinu tutaghi kutali yala hyogha yangutuhuyisa kuyetu kumhekelesa Sapanga, twenga tutuwi mbilo kwa ufumilifu kumasindano ghala yavikwa kuulongolo gha twenga. 2 Tumyendeli Yesu yula ndiwa mtumbulo wa ukwinila hau wa twenga na ndiwa mweni kuwesa kutimilisa ukwinila wa twenga, kwaikiva gha luheku luvikwa kuulongolo gha mweni afumilili lipingika, na kuwela ng'ogha na honi gha hali lipingika, hinaa mweni kalikala upandi wa ukulu wa Sapanga.

3 Mliwachili vila yamkola Yesu, vila kafumilila mayeso kuhuma kwa wandu weni sambi, ili mkotoho kutoka kumkwinila Sapanga. 4 Pamonga na yiwa mnguyangala kusinda sambi, ila mwambila kutovana mbaka kuyita mwahi. 5 Ghuli munguisemwa hila milando gha kuwataya moyu yiwa Sapanga anguwakema mwenga ni wana ghaki?

"Mwana ghangu ukotoho kupughanya mnyokolu wa Bambu,

wala ukotoho kuhuya kuhyetu kuukwinila paakukalipila.

6 Kwaikiva Bambu anguwanyokola wala wogha anguwapala,

mweni angumkalipila kila mundu mweni kumjumila kuwela mundu ghaki." 7 Mufumilili mnyokolu kwaikiva ni mavulo, kwaikiva Sapanga anguwagholela mwenga handa wana ghaki. Kwaikiva ni mwana ghani kanyokolwa ng'ogha na mlela ghaki? 8 Sapanga anguwanyokola wana ghaki wogha paikawela Sapanga kawanyokola ng'ogha mmanyi yiwa mwenga ni handa wana wa panje na ng'ogha wana ghaki. 9 Kupiti hagha, twenga tunguwatundamila walela wa twenga watulelili hata pawatunyokola. Hinu, tungupalwa kumtundamila nesu Tati wa twenga wa kimpumulo ili tupati kulama. 10 Watati wa twenga haku kumlimawogha watunyokolili kwa lipindi, handa weni vila walolili yiwa ni maha kutunyokola, ila Sapanga angutunyokola kwaikiva gha fwaida gha twenga weni, ili tupati kukonghanila ku umbuleti pee handa mweni. 11 Kwahela mundu mweni kuhekelelela mnyokolu ila angunyengemala ila wandu wenikuivula kuwela na ndyangilu maha kwanjila gha kunyokolwa wangulikala kwa umaha na kwa kughola mighalum yenikujumilika kuulongolo gha Sapanga.

12 Hinu muyapeghi makakala mawoku gha mwenga yala yapola, na manung'una gha mwenga yeni ulepelelu. 13 Myendeleli kutyanga kunjila zya maha, ili kila kiwela ng'ogha na makakala kikotoho kubyodoka ila kipati ukomu.

14 Mgangamali kwa kulikala kula kuvile ng'ogha na matovano na wandu wogha na kulikala kukubaghulwa kwaikiva gha Bambu, kwaikiva kwahela mundu kalikala ng'ogha ngalilu gha kumtundamila Sapanga atewesa kumlola Sapanga. 15 Mlolesi maha, paghati gha mwenga pakotoho kuwela mundu yeyosi atesindwa umaha wa Sapanga, hata akotoho kuwela handa mkegha wa libiki likalipa na kutipuka na kuhakila watangala kwa sumu ghaki. 16 Mlikali mihu ili paghati mwa mwenga pakotoho kuwela na mundu mngongola au mundu kamtundamila ng'ogha Sapanga handa Esau, mweni kuwusa uwelekwa ghaki wa mtumbulo kwa mulyo mmonga. 17 Mwenga mngumanya yiwa kuulongolo, paapalili kulihi hila highili kangi, walemili kumpegha, kwaikiva apatili ng'ogha fwasi gha kuluwa kuleka sambi, pamonga na yiwa ahakulili kwa masosi.

18 Mwenga mhika ng'ogha kulitumbi walikema Sinai, lila linguwesa ng'ogha kukolwa kwa mawoko handa waigholile wa Izilaeli na mhika ng'ogha kulyoto liyaka na kula kweni lwisa, liyegha likalipa, 19 lilowi lya lipembi na lilowi lya milando. Wala wayoghanilili lilowi lila waluwili wakotoho kulihyoghanila kangi na wapalili wakotoho kulongelwa kangi, 20 kwaikiva wasindilwi kufumilila selia wapeghilwi, "Mweni kuyavisa litumbi hali hata akawela likokolo litetovwa maganga mbaka kuhova." 21 Mighalu hila iwagholili watili nesu, hata Musa akalonga, "Ningutila na ninguhihimila nesu kwa holu."

22 Ila mwenga mhika kulitumbi Sayuni, Yelusalemu gha kundumba, mlima wa Sapanga avile mkomu, na maielufu gha watumikila wa kundumba wa Sapanga walikungula, 23 Mhika kulipinga likulunga lya wawelekwa wa mtumbulo wa Sapanga mahina ghao yayandikwa kundumba, Mngugholoka kuulongolo gha Sapanga avile mlamula wa wogha, na kuulongolo gha mpumulo wa wandu wala maha wavile Sapanga kawaghola wajumiliki kuulongolo ghaki. 24 Muhika pabehi na Yesu mweni kuwela mghola ndulumu wa wandu na Sapanga kulilaghano lyonu, na kumwahi ghaki iyitwa yenikulonga na twenga milando maha nesu kupiti mwahi gha Abeli.

25 Hinu, mliloli mwa weni ili mkotoho kulema kumyoghanila hayu mweni kuilongela na mwenga. Handa wala walemili kumuyoghanila yula awakanisili haku kumlimawogha walokoka ng'ogha, twenga tutewesa ghuli kulokoka handa tulema kumuyoghanila yula mweni kutukanisa kuhuma kundumba. 26 Lipindi lya dahile ahihimilisili mlima, ila hinaa ailongile, "Nitehighimilisa mlima na kangi ng'ogha mlima weka itewela pamonga na kundumba hilahila." 27 Lilando hali livile lingulongelwa kangi, "kwa lihanja lingi kangi" lingulangiha yiwa vindu vyogha alumbile Sapanga haku kumlimawogha vitehhihimila ili vihighali vindu vila vitewesa ng'ogha kuhighimila.

28 Hinu twenga tungupalwa kushukwile, kwaikiva tungupokela unkosi uwesa ng'ogha kuhihimaliswa. Tuweli na kushukwile na kumtundamila Sapanga kwa njila itemghola ahekeleli, kwa mayupo na holu. 29 Kwaikiva Sapanga wa twenga chakaka ni lyoto likalipa liwesa lyeni kuyalamisa.